2 Samwel 5 - Fanawbuid tagsibaliwas Fakayabian

Dabid ansik Fun sis Talun Israel

¹ Ay fagayu taw Israel nasas Dabid sas furuan Kebrun ay nalong te, “Ami am ngay kalongan ami.

² Siginan ebi, dewa Saul em fun, o wan tagfangguna ngay taw Israel laman namawayan at ngay fawayan. Ay Yawi nalong sa emu te, ‘Nangalaga o ku ngay taw Israel, kata sik tagalaga ngay tupa. Ay o wan tagfangguna anya fagayu.’ ”

³ Nu katanya, Dabid nawat sik nasadian sas Israel at ngay fagtainan, sis Yawi at daga salubangan, ay kanya fagayu naugwag langis sas Dabid at alfuyu laman sik famatoglag te, kanya wan talun Israel at fun.

⁴ Ginanya Dabid at banwa tuluk safulu, ay kanya nafunan kaduge ufatk safuluk banwa.

⁵ Dabid nafunan sis talun Uda fituk banwa ay unumk magdanun ay gbanwan sis Kebrun, ay nafunan yangay ngay taw Israel kaduge tuluk safulu e tuluk banwa, ay gbanwan sis furuan Erusalem.

Dabid Nagbilug Furuan Erusalem

⁶ Sik menit, Dabid ay at ngay tagfawayan nalao sas Erusalem laman namawayan ngay taw Ebus. Ay ngay taw Ebus nalong sas Dabid te, “Wam masakbo stae! Dewa at ngay yud malao ay at yud glag mafaragang way ayu laman wam masakbo sa em furuan.” Kanya fagayu nalong takatanya aroro gamatangan te, Dabid wa makatu gsakbo.

⁷ Dewa katanya, Dabid nagbilug Siun fag furuan at mogat, ay nafangayan te, Dabid at furuan.

⁸ Ay gina Dabid yud nasakbo sas furuan Erusalem, kanya nalong sat ngay tagfawayan te, “Ay dalan nu gsakbo am sas Erusalem, sa yakman fagfamiluganan mamam laman masud am ku ngay fawayan fag ngay taw Ebus takata sik ngay yud glag ay yud malao.” Sanya ginan wan nu kafasigad sik longan te, “Yud glag ay yud malao wa masakbo sas Yawi at bale.”

⁹ Ay Dabid nu nagbilug wan kafag furuan, sanya wan nu gbanwan, ay nafangayan te, Dabid at furuan. Ay Dabid nafafasine ngay alad gfasigad siginans tagligung fag ngay alad anggan sas basad furuan.

¹⁰ Ay Dabid ankaksvn nu mabalyanan aroro Yawi, Dius at Mabalyanan, ggubuk anya.

¹¹ Kiram, talun Tiru at fun, nasugu sas Dabid ngay tagfosuk longan gadgaloan ngay tagsaful kawat bale ay tagfadalusan ngay gang laman at famale, ay kanya nafabuba yangay ngay kayu sidru laman fangawat Dabid at bale.

¹² Sanya ginan, Dabid nasaful te, Yawi nafili anya laman sik fun sis talun Israel ay nafaksvn at fagfagtainanan laman sa sangay taw Israel.

¹³ Ay Dabid nu nalao wan siginans Kebrun ay nasas Erusalem, anfamut yay at mangena; at tiba at mangena at ngay fagsuguan wan, ay anfamut yangay at ngay sisian.

¹⁴ Kayu tuy at ngay baguama at kinsalug sis Erusalem: Samwa, Subab, Natan, Sulumun,

¹⁵ Ibkar, Eliswa, Nefeg, Afya,

¹⁶ Elisama, Elyada, ay Elifelet.

Dabid Nababo ngay Taw Filistia

¹⁷ Ay ngay taw Filistia nu nadungug te, Dabid wan at fun sis Israel, kanya fagayu nafaful at ngay tagfawayan laman nanggamat. Dewa katanya, Dabid nasaful kafag ngay taw at algan ay nalao sa sik furuan at ke alad mogat.

¹⁸ Gina ngay taw Filistia andasug ay anful sis datag Refaim,

¹⁹ Dabid nainto sas Yawi te, “O namawayan ami ngay taw Filistia? Ay o gbabo tua ro mi?” Ay Yawi nabalus te, “Kin, loi wan aroro gfababo kro ayu.”

²⁰ Nu katanya, Dabid nalao sas Baal-Perasim, ay nababo ngay taw Filistia. Ay Dabid nalong te, “Yawi nafamin ku ngay fawayan kata at maksvn fag lugwak nu nadalan si ku daga salubangan.” Nu katanya, nafangayan kanya fag talun te, Baal-Perasim.

²¹ Ngay taw Filistia nafamato at ngay fagsegan, ay Dabid ay at ngay tagfawayan nabul ay nabuba.

²² Ay ngay taw Filistia anfoli sas datag Refaim, ay anful sanya.

²³ Ay Dabid nadog yay nainto sas Yawi, ay Yawi nabalus anya te, “Lag yap vtv namawayan. Ligungi yap, ay nu munakbang wam si sangay fun kayu balsamu, ginanya ya ro nu gfawayan am.

²⁴ Ay nu nadungug ro am sik awang sis tungud kayu balsamu kata sik ngay tagfawayan nu gtadtalasan, loi wa ro vtv laman namawayan, aroro kanya wan fagsafulan te, gfangguna au ayu namawayan ngay taw Filistia.”

²⁵ Ay Dabid nafaning Yawi at suguan, ay ngay taw Israel nafabul ngay taw Filistia siginans Gibyun sitsigons Geser.