2 Samwel 4 - Fanawbuid tagsibaliwas Fakayabian

Isbuset nu Kabul

¹ Isbuset, Saul at baguama, nu nadungug te, Abner anbul wan sis talun Kebrun, kanya ay fagayu taw Israel maksvn nu kalimu.

² Isbuset dua at fun tagfawayan, Baana ay Rekab. Kanya fag dua Rimun at baguama tagsiginans talun Beerut, ay Benamin at kasugfunanan. Beerut, taw Benamin at fagagbilugun.

³ Aroro at dan gbanwan sis Beerut nalagyu wan sas furuan Gitaim, ay kanya fagayu gbanwan sanya dasug katsi kata sik ngay betaw.

⁴ (Ay Yunatan, Saul at baguama, anke baguama sik yud malao, at ngayan Mefibuset. Kanya lima yay kbanwa gina gdungug te, Saul ay Yunatan anbul wan sas fagawayanan sis Esreel. Ay tagalaga Mefibuset nu nadungug takatanya fag barita, nabangkad wa vtv anya ay nalagyu. Ay aroro gabanganan, kanya nafatong Mefibuset ay naslu, ay wa malao ya.)

⁵ Sik menit, Rekab ay Baana, Rimun at baguama fagdua nasas Isbuset at bale. Ay ginanya, Isbuset gfiangalay aroro wabilug menit wan.

^6-7 Ay gina Isbuset gtiug, duksay nasakbo sasad bale ay gfalagan way te, namul trigu. Ay aroro mangaro nasakbo way sas Isbuset at fagtiugan ay naurus Isbuset at ungdan ay nalifung at liug. Ay gina gduksun gbuba Isbuset at alfuyu. Ginanya fag yabi duksay nalao sas datag Urdan.

⁸ Ay duksay nu ndasug sas talun Kebrun, nabuba sas Dabid at daga salubangan Isbuset at alfuyu ay nalong te, “Tuy wan am fawayan Saul tagyafabulun emu at baguama Isbuset at alfuyu. Katsi fag menit, Yawi gfasud Saul fag talanan aroro sat ngay nafakamulun mauri.”

⁹ Ay Dabid nabalus te, “Gfatuyanan au sas Yawi, tagleleg fag Dius te, at nafalangfe angku siginan ngayuk fagidapun,

¹⁰ ebi gina au sis Siklag, e ndasug sa angku ay nalong sa angku te, ‘Saul anbul wan.’ Kanya fag taw gamatangan te, at barita ro masine sa angku. Nu katanya, nasugu au te, ‘Gamati ay fabuli anya!’ laman ku famasud sa anya.

¹¹ Katsi, nataw ro ku fon sa takata ayu at mauri fag ngay taw at nafabul sik taw gina gtiug sit fagtiugan sit sadili bale? At masine gfabul kwan ayu laman kalyam wam ste ginans fagdaul daga.”

¹² Nu katanya, Dabid nasugu at ngay fagsuguan te, “Fabuli Rekab ay Baana.” Ay at ngay fagsuguan nafaning, ay nalifung duksay at take ay at darafa ay narabing at bilug sa sik fun kayu munakbang si sik tigyangan bunaw sis Kebrun. Ay kanya fagayu nabul Isbuset at alfuyu ay nanamoli sas Abner at fagfolian si yangays Kebrun.