2 Samwel 3 - Fanawbuid tagsibaliwas Fakayabian

¹ Siginan ginanya, Saul ay Dabid at ngay tagfawayan gawayan wan. Dabid ay at ngay tagfawayan kaseganama tua. Dewa katanya, Saul at ngay tagfawayan kamomuy way.

² Kayu tuy Dabid at ngay baguama at kinsalug sis furuan Kebrun: taguna Amnun, at baguama sit mangena Akinuam tagsiginans Esreel.

³ Ay at fadua Kilyab, at baguama sit mangena Abigail, Nabal at fagbubayun, fag taw Karmel. Ay at fatulu Absalum, at baguama sit mangena Maaka, fun Talmay at baguina tagsiginans Gesur.

⁴ Ay at faufat Adunya, at baguama sit mangena Kagit. Ay at falima Sefatya, at baguama sit mangena Abital.

⁵ Ay at faunum Itriam, at baguama sit mangena Egla. Kanya fagayu Dabid at ngay baguama at kinsalug sis furuan Kebrun.

Abner Nanangalo Dabid

⁶ Kaduge Saul ay Dabid at ngay tagfawayan gawayan, Abner ansik maseganama fag fun tagfawayan sas Saul at ngay tagfawayan.

⁷ Sik menit, Isbuset nalong sas Abner te, “Wain am fagnafataladanun at sadi ku mama Saul at mangena?” Isbuset at fagfatungulan Rispa, Aya at baguina.

⁸ Ay Abner andotama Isbuset ay nabalus te, “O gamatangan o te, nafamabo au am mama, laman nangasadi sa sangay taw Uda? Siginan ebi, gfaning au am mama ay fagayu at kalongan, ay anggan at ngay fagadgalangan, ay kwa nafababawan emu sas Dabid. Wain katsi am fakamuagun sa angku te, nafataladan au am mama at mangena!

⁹ Nu katanya way nangalo kwa Dabid laman namafasludan Yawi at fatuyanan sa anya. Ay Yawi ban nangus maksvn nu gfaurianan angku kway nagubuk Dabid.

¹⁰ Yawi nafatuyanan te, bunwa ban siginan ya Saul at kasugfunanan at nantubus anya laman sik fun, nu bunway Dabid waban at fun sas fagdaul talun Israel ay Uda, siginans Dan sitsigons Beerseba.”

¹¹ Ay Isbuset nu nadungug takatanya kanya wa garingang ya, aroro maksvn nu kalimu Abner.

¹² Sanya ginan, Abner nasugu ngay tagfosuk longan laman nanlong sas Dabid te, “O tua at matuyan at nanfunan talun Israel. Nu katanya, masine nu kawat ta sik nasadian laman magubuk au emu nangagbilug fagdaul talun Israel.”

¹³ Dabid nabalus te, “Kin, kaylat au nu nangasadi o sa angku, dewa katanya, e fagetun au sa emu, gina ban o stae tabani ku mangena Mikal, Saul at baguina.”

¹⁴ Sanya ginan, Dabid nasugu sik ngay tagfosuk longan sas Isbuset te, “Fafolii wan sa angku ku mangena Mikal, aroro nafon kwan sadik sandan ktaw Filistia balat lulu, laman famayad nu kadadwa ami.”

¹⁵ Nu katanya, Isbuset nasugu te, “Fasaruayani Mikal siginan at mangama Paltiel, Lais at baguama.”

¹⁶ Paltiel gwayway gguyan at mangena Mikal sitsigons Bakurim. Ay Abner nalong sas Paltiel te, “Ulii wan,” ay kanya noli wan.

¹⁷ Ay Abner gfakamatoan ngay taw Israel at ngay fagtainan ay glong te, “Glugo wan nu kaylat am Dabid nu nangasik fun.

¹⁸ Katsi wan at buknga laman kafasludan takatanya, aroro Yawi nafatuyanan sa anya te, ‘Siginan ban ku fagsuguan Dabid, gfalangfe kban ngay taw Israel siginan sangay taw Filistia anggan sa tiba at fawayan.’ ”

¹⁹ Ay Abner nafakamatoan yangay Benamin at ngay kasugfunanan. Ay kanya nalao sas Kebrun laman nanlong sas Dabid te, “Ngay taw Israel ay Benamin at kasugfunanan kaylat yangay nu kasik fun o.”

²⁰ Ay Abner nu ndasug sas Kebrun gadgaloan at ngay tagfawayan fag duak safulu, Dabid nafalganan sik fagmafulun laman sa anya fagayu.

²¹ Ay Abner nalong sas Dabid te, “Em fun, aylati nu glao au sas fagdaul talun Israel laman namasaful au sa anya fagayu te, o wan em fun. Ay ngay taw Israel ban nangasadi ay guseganan yangay ban te, o wan em fun. Ay o waban at fun sas fagdaul talun Israel.” Ay Dabid naylat Abner nu namakamulun takatanya.

Uab nafabul Abner

²² Uab ay at fagfanggunaun fag ngay tagfawayan andasug sas Kebrun, ay kanya fagayu ngayu at famubaun at nabul siginan at fawayan. Ay ginanya Abner nalo wan, aroro Dabid nafalao anya manabayan.

²³ Ay Uab nu nasaful te, Abner, Ner at baguama, nanamakamatoan Dabid, ay nafalao anya manabayan,

²⁴ Uab nalao sas Dabid ay nalong te, “Nataw am nafakamulun? Abner natungul oma emu. Wain am fagnafaloun yay? Katsi nalao wan!

²⁵ Toglag way o Abner, Ner at baguama. Kanya nastae laman e algan namauri ay nanginsaful am ngay fakamulun.”

²⁶ Ay Uab nalao masakit siginans Dabid, ay nasugu sik ngay tagfosuk longan sat ngay tagfawayan te, “Namafalo am Abner.” Ay kanya fagayu nasud Abner sis Sira fag bubun ay nafafoli sas Kebrun. Dewa katanya, Dabid wa saful at kinfasludan.

²⁷ Ay Abner nu ndasug sas Kebrun, Uab nataban anya sas sakbawan furuan daul ay kanya masine nu gfakamatoan anya. Ay Uab naurus Abner at ungdan laman famasud at nafabul Asael at faduksay. Ay Abner anbul wan.

²⁸ Dabid nu nadungug at kinfasludan sas Abner, kanya nalong te, “Yawi nasaful wa te, bunwa au ay ku ngay taw at nafabul Abner, Ner at baguama.

²⁹ Uab way lang ay at ngay kalongan at ke malong Abner at faginbulun, nu katanya, at ngay kalongan ban kabavn gayapvs, gabangbang, galbi, ay kabul sas awayan, ay sik ngay tagfangetan.”

³⁰ Uab ay Abisay nafabul Abner aroro kanya nafabul Asael gina gfawayan sis Gibyun.

³¹ Sanya ginan, Dabid nalong sas Uab ay sas fagayu taw te, “Girati ay ngay lanbung ay suluni saku fagtoglagan te, kabalu am. Waywayi gina am glao sis fagunan laman namoli Abner at bilug.” Ay anggan fun Dabid nanangalo yangay.

³² Ay kanya fagayu nanamoli Abner at bilug sas Kebrun. Kadugenya, fun Dabid maksvn nu gwayway, ay fagayu taw at nanangalo sas fagfolian gwayway yangay.

³³ Fun Dabid nalubad sik alubad laman kabalu Abner. “Wain Abner at faginbulun kata sik takamabul?

³⁴ Kanya wa oma nasiukan at take ay wa oma nasalodan salambitan at bitis; dewa katanya, ngay taw mauri nafabul anya.” Ay ngay taw Israel gdog yay nawayway laman sas Abner.

³⁵ Ginanya fag menit, Dabid wa nafangon ya. Ay ngay taw gfabulun anya te, fangoni. Dewa katanya, Dabid nafatuyan te, “Yawi ro nangus gfaurianan angku nu nafangon kway nusnga setaw fag fakonun yakmay ro gakayabiun.”

³⁶ Ngay taw naylat Dabid at nalong ay at ngay nafakamulun, ay kanya fagayu guseganan.

³⁷ Ay fagayu taw Israel nasaful te, Dabid wa kataip sas Abner at faginbulun.

³⁸ Ay Dabid nalong sat fagsuguan te, “O nunda wam gamatangan ya te, sik maseganama fag taw sis Israel anbul katsi fag menit?

³⁹ Ay katsi dewa au wan at fun, gababawan kway Uab ay Abisay, Seruya at baguama fagdua. Kanya abitsug yap angku. Nu katanya, Yawi ban tagfasud duksay at nafakamulun mauri.”