2 Samwel 2 - Fanawbuid tagsibaliwas Fakayabian

Dabid ansik Fun sis Talun Uda

¹ Sanya ginan, Dabid nafakamatoan Yawi, ay nainto te, “O am fakaylatun wan nu glao au sa sik furuan tagsis talun Uda?” Ay Yawi nabalus te, “Agvd.” Ay Dabid gdog yay nainto te, “Dada kro fag furuan?” Ay Yawi gbalus te, “Sa o sfuruan Kebrun.”

² Nu katanya, Dabid nalao gadgaloan at mangena fagdua, Akinuam fag taw Esreel ay Abigail tagsiginans Karmel, Nabal at fagbubayun.

³ Ay kanya nataban yangay at ngay tagfawayan ay anggan at mesa talnayan, ay kanya fagayu nabanwan sis Kebrun.

⁴ Ay gina kanya fagayu gbanwan sanya, ngay taw Uda at ngay tagfangguna andasug sas Kebrun laman nangugwag langis sas Dabid at alfuyu laman famasaful te, kanya wan at fun sas talun Uda. Ay Dabid nu nasaful te, taw Abes-Gilyad at nanamoli Saul,

⁵ kanya nasugu sik ngay tagfosuk longan laman nanlong te, “Yawi ban nangus gfon sa ayu nusnge wain aroro nafakamulun tuam at matuyan say fun Saul siginan nu namoli am anya.

⁶ Yawi ban nangus gfalag sa ayu at fagmafangesugun ay at fagmatuyanun, ay gfalag kyangay ban sa ayu ku fagmatuyanun aroro say nafakamulun.

⁷ Nu katanya, maseganamai ay faksvni ay ngay amatanganan dewa fun Saul anbul wan, aroro katsi ngay taw Uda nafili angku laman ay fun.”

Dabid ay Saul at ngay Kalongan Gawayan

⁸ Ay Abner, Ner at baguama, Saul at fun tagfawayan, nalao sas furuan Makanaim gadgaloan Isbuset, Saul at baguama.

⁹ Ay duama nu ndasug sas furuan Makanaim, Abner nafili Isbuset laman gfunan talun Israel ay sas furuan Gilyad, Asuri, Esreel, Efraim ay Benamin.

¹⁰ Isbuset at banwa ufatk safulu gina gfasigad gfunan ngay taw Israel, ay kanya nafunan kaduge duak banwa. Dewa katanya, ngay taw Uda at fagtoglagun at fun Dabid way.

¹¹ Ay Dabid nu gfunan ngay taw Uda fituk banwa ay unumk magdanun. Ay kadugenya kanya gbanwan sis furuan Kebrun.

¹² Sik menit, Abner nalao sas Gibyun siginans Makanaim gadgaloan Isbuset at ngay tagfawayan.

¹³ Ay Uab, Seruya at baguama, nalao yangay siginans Kebrun gadgaloan Dabid at ngay tagfawayan laman nangablangan sa sik bunaw sis Gibyun. Abner fag gaban maful si baliwas fawalan fag tigyangan bunaw ay Uab fag gaban maful si baliwas fasiunan.

¹⁴ Ay Abner nalong sas Uab te, “Namawayan ta si ta daga salubangan ta mesa tagfawayan at mabaguama tagsaful fia.” Ay Uab nabalus te, “Agvd.”

¹⁵ Ay Isbuset at tagfawayan fag labi dua tagsiginans Benamin at kasugfunanan anlindug laman namawayan Dabid at tagfawayan fag labi dua.

¹⁶ Kanya fag duak gaban tagfawayan natedtedan at ngay alfuyu ay naudgurusan ay fagayu anbul wan. Nu katanya, kafag bunaw nafangayan te, Elkat-Asurim sis Gibyun.

¹⁷ Ay kanya fag duak gaban tagfawayan gfataglayun nu gawayan. Ay ginanya fag menit Dabid at ngay tagfawayan nababo Abner ay anggan at gaban.

^18-19 Ay ginanya sanya yangay Seruya at baguama fag tulu: Uab, Abisay, ay Asael. Ay Asael masakit nu gtarung kata arasyo ay nanamafalo Abner.

²⁰ Ay Abner nu naligbat, nainto anya te, “O Asael o?” Asael nabalus te, “Sabv.”

²¹ Ay Abner nalong anya te, “Lag o gfafalo angku; ku usama yakman am fagnamafaloun ay nangago o at ngay famawayan.” Dewa katanya, Asael wa karagang nu gfafalo anya.

²² Abner gdog yay glong sas Asael te, “Faragangi wan nu gfafalo o angku! Lag o gfanya nu gfabul au emu. Aroro nu nafabul kway ro emu kwa ban manansalubang ya am kaka Uab.”

²³ Dewa katanya, Asael wa karagang nu gfafalo anya. Ay Abner naurus Asael at ungdan ay antalfus way lang, ay Asael antangda ay anbul. Fagayu taw tagdalan sanya, gragangan yay ay gdama Asael nu mabulan.

²⁴ Uab ay Abisay nu nasaful te, Asael anbul wan, duksay nanamafalo Abner. Ay gina gakayabiun duksay andasug sas buksul Ama munakbang sis Gia sis day dalan tagsas Gibyun fag talun at yud e taw.

²⁵ Ay Abner nafaful at ngay tagfawayan fag ngay taw Benamin sas tungud buksul laman namalganan nu namawayan.

²⁶ Ay Abner nauro Uab te, “Gfaragang watam nu gfadfabulan tam! O nunda wo nasaful te, mauri way takatanya fag fakamulun? Ginain ya ban nu gfaragang o am ngay tagfawayan nu gfafalo em ngay kaiban?”

²⁷ Ay Uab nabalus te, “Gfatuyanan au sas tagleleg fag Dius te, nu dway ro wo nalong katanya, ku ngay tagfawayan ro wa gfaragang nu gfafalo ay ngay kaiban anggan ban sas balabag.”

²⁸ Nu katanya, Uab nauyup at budyung, ay at ngay tagfawayan nafaragang wan nu gfafalo ngay taw Israel. Nu katanya, anragang wan nu gawayan.

²⁹ Ay ginanya fag yabi, Abner ay at ngay tagfawayan nalao sas datag Urdan. Ay nadife Liskung Urdan ay nafataglayun nalao, yakmay andasug sas talun Makanaim.

³⁰ Uab ay at ngay tagfawayan nu nragang wan nu gfafalo Abner, kanya fagayu noli wan. Ay Abner nafaful at ngay tagfawayan, ay nasaful te, saman Asael, labi siam ya at kinbul.

³¹ Ay Abner at ngay tagfawayan at kinbul tuluk sandan unumk safulu, kanya fagayu siginans Benamin at kasugfunanan.

³² Uab ay at ngay tagfawayan nanamul Asael at bilug ay nanamoli sat mama at fagfolian sas Betleem. Ay ginanya fag yabi kanya fagayu nalao, ay balabag di, andasug sas Kebrun.