2 Samwel 18 - Fanawbuid tagsibaliwas Fakayabian

Absalum Anbul

¹ Dabid nafaful at ngay tagfawayan ay nafili ngay tagfangguna; tiba gfangguna sik libu, ay tiba sik sandan.

² Ay Uab tagfangguna taguna fag gaban, ay Abisay, Uab at faduksay, tagfangguna at faduak gaban, ay Itay fag taw Gat tagfangguna at fatuluk gaban. Ay fun Dabid nalong sa anya fagayu te, “Au ro tagfangguna ayu gina am namawayan.”

³ Ay at ngay tagfawayan nabalus anya te, “Wo masine galo emi. Em ngay fawayan ro ya guseganan dewa mi nalagyu ay dewa nafabul emi am ngay tagfawayan sik wabilug. Kanya fagayu nu gyafabulun emu aksvn yap tua nu gyafabulun sadik libuk tagfawayan. Nu katanya, ste way o sfuruan daul ay fabubai way lang am fanggubukun gina ami gayudan.”

⁴ Ay fun Dabid gbalus te, “Gfaning kwan kata ay algan.” Ay fun Dabid namalindug sis day sakbawan gina at ngay tagfawayan gduksun maafudan tibak gaban sik libu ay tiba sik sandan.

⁵ Ay fun Dabid nasugu sas Uab, sas Abisay ay sas Itay te, “Lag am gfabul ku baguama Absalum laman sa angku.” Dabid gina glong sa sangay fun tagfawayan, ngay tagfawayan gdungugan wan.

⁶ Nu katanya, Dabid at ngay tagfawayan nalo wan laman namawayan ngay taw Israel at ngay tagfawayan sas talun Efraim.

⁷ Ay Dabid at ngay tagfawayan nababo ngay taw Israel at ngay fawayan. Ay ginanya fag menit ngayu at kinbul, nu fagayu wan duak safuluk libu.

⁸ Fagdaul sanya fag talun maksvn at awayan, at kinbul sasad araw aroro sat maksvn fag limu, ayu yap tua at nafadfabulan sas fiso gina gawayan fia.

⁹ Gina gawayan, Absalum nafablang Dabid at ngay tagfawayan, ay kanya nalagyu gsakay sis mola. Ay kanya kaduge gsulunan glagyu si sik ngay daga sanga ensina, at alfuyu ansayang sanya swa sanga ay Absalum anfamato wan sanya. Ay at sakayan nalagyu wan.

¹⁰ Ay Dabid at fagsuguan at sadi nu nalag Absalum, kanya nalao sas Uab ay nalong te, “Nalag au Absalum masayangan si sik kayu daul at sanga.”

¹¹ Ay Uab nalong anya te, “Nataw? O nalag o Absalum? Wain am fagyudun nafabul anya? Nu nafabul di o, gfon kro emu sadik safuluk lifung salapi ay sik mafamilian fag famutus fagwan, at mafalganan fia laman sa sik tagfangguna.”

¹² Ay at fagsuguan nabalus te, “Dewa ro wo gfon sa angku sadik libuk lifung salapi kwa ro gfabul fun at baguama. Nadungug wami tam fun at suguan sa emu ay sas Abisay ay sas Itay te, lag am gfauri at baguama Absalum laman sa anya.

¹³ Dewa kngap ro nafamabo tam fun siginan nu gfabul au Absalum, kanya ban sumaful way, ay wa ban ngap o magubuk angku.”

¹⁴ Uab nalong anya te, “Nafangulan kway ku buknga si emu!” Sanya ginan, Uab nabul tuluk bangko ay nananlag Absalum ay ginanya gleleg yay ay masayangan si sik daga sanga. Ay Uab naurus Absalum at dubdub.

¹⁵ Ay safuluk taw tagbuba Uab at ngay famawayan naligung Absalum ay nafabul wan.

¹⁶ Sanya ginan, Uab nafawang at budyung laman gfaragang nu gawayan ay at ngay tagfawayan nu gfafalo taw Israel at ngay tagfawayan.

¹⁷ Ay Uab at ngay tagfawayan nabul Absalum at bilug ay nafatong sa sik lusung ngabasad sanya sad araw ay natabun sik ngay gang. Ay Israel at ngay tagfawayan noli way lang ngayu glagyu.

¹⁸ Gina Absalum gleleg yay, kanya nafalindug sik turuk daul sis Fun at Datag, laman tibak taw gamatang tua anya, aroro kanya we sisian mangama at namataglayun at ngayan nu kadungug. Kafag turuk nafangayan te, “Absalum at famamatang,” ay dasug katsi katanya yay gugat at ngayan.

Dabid Maksvn nu Kabalu Absalum

¹⁹ Sanya ginan, Akimaas, Saduk at baguama, nalong sas Uab te, “Aylati nu glao au sas Dabid laman nanlong au sa anya te, Yawi nafalangfe anya siginan at ngay fawayan.”

²⁰ Ay Uab nabalus anya te, “Katsi fag menit wo mananlong sas fun. Fanyai yap tibak menit, aroro katsi fun at baguama anbul.”

²¹ Ay Uab nalong sa sik taw Etiupya te, “Loi sas fun Dabid ay nanlong o kata am nalag.” Nu katanya, kanya fag taw nafamababaun sas Uab at daga salubangan ay nalao masakit.

²² Ay Akimaas gdog yay glong sas Uab te, “Nusnga setaw man ro, aylati nu nangguyan au kafag taw Etiupya.” Ay Uab nabalus te, “Munama, ay wain? Wa ngap ro e fanambagun dewa o nanamadasug barita.”

²³ Ay Akimaas nalong te, “Nusnga setaw wa ro at kumdasug, gtaglayun kwan.” Nu katanya, Uab glong anya te, “Kin, loi wan.” Akimaas natarung sa sangaba datag Urdan ay naguna yay kafag taw Etiupya.

²⁴ Gina Dabid malunggung sis wabilug taguna fag alad at sakbawan, ay sit famalanib fag alad at sakbawan, tagulit nakato sas alad sabaliwa stungud bale. Ay gina kanya gbanawan, e nalag sik taw gtarung.

²⁵ Ay kanya nauro sas Dabid te, “E kadasug sik taw.” Ay Dabid glong te, “Nu sadi way, kanya ro e buba barita.” Ay kaduge kafag taw kakbang,

²⁶ e nalag yay fia sik taw gtarung yangay ay glong te, “E kadasug yay fia sadi.” Ay Dabid glong te, “Kanya ro e buba yangay barita.”

²⁷ Ay kanya fag tagulit glong te, “Taguna fag taw kata tewa Akimaas, Saduk at baguama.” Ay fun Dabid glong te, “Kanya masine fag taw, ay masine tua ro siring at buba barita.”

²⁸ Akimaas nu ndasug, nanansalubang wa vtv at fun ay narungan laman kamababaun. Ay nalong te, “Segi Yawi am Dius, mesug fag fun! Kanya nafababo emu siginan am ngay fawayan tagfauri emu.”

²⁹ Ay fun Dabid nainto sa anya te, “O Absalum manabayan tua?” Ay Akimaas nabalus te, “Gina am fagsuguan Uab gfauro angku, nalag au at ngay tagfawayan nu galakayan ay kwa saful te, nataw.”

³⁰ Fun nalong te, “Sanya yap o.” Ay kanya namalindug yay sis tigyangan.

³¹ Ay arodi vtv, andasug kafag taw Etiupya ay glong te, “Mesug fag fun, e masine au fag barita. Katsi fag menit Yawi nafalangfe emu siginan sangay tagfauri emu.”

³² Ay fun nainto anya te, “Tain nunda Absalum? O nunda mabayan tua?” Kafag taw nabalus te, “Mesug fag fun, at kindasug nangus sa anya umdasug yangay ban sas fagayu am fawayan.”

³³ Dabid gtadtaruyan ay maksvn nu kabalu. Kanya nasat fagtiugan sis furuan at tungud sakbawan ay gwayway. Ay kaduge gwayway glong te, “Ku baguama Absalum, au yakman nangus at kinbul abat ngate o. Ku baguama Absalum, ku baguama!”