2 Samwel 12 - Fanawbuid tagsibaliwas Fakayabian

Natan Nafararang sas Dabid

¹ Nu katanya, Yawi nasugu at taglong Natan sas Dabid. Ay Natan nu ndasug sas Dabid, nalong sa anya te, “E duak taw gbanwan si sik furuan, at sadi maramraman ay at sadi sik yud way e kwa.

² At maramraman ngayu at fagbaugun.

³ Ay at yud e kwa sadi way at tupa, sarokta at nabayad way. Kanya nagwantan nalaga kafag tupa ay nafagurang gasfuan at ngay sisian. Kanya at fagfafangonan ay at fagfainuman sa wa at sadili taya, ay gsalilian tua gugat kata at fakesugun fia fag sisian.

⁴ Sayginan, at maramraman fag taw anke betaw, dewa katanya, kanya wa gfilas at sadili baka ay tupa. Abat ngate, kanya nabul yay at yud e kwa fag taw at tupa fag sadi laman namon sat betaw.”

⁵ Ay Dabid ankuri at maramraman ay nalong sas taglong Natan te, “Gfatuyanan au sas Yawi, tagleleg fag Dius te, fabuli wan nangus kafag taw at maramraman.

⁶ Kanya nangus at famangsi ufat tua ktupa sat nabul fag sadik tupa, aroro kanya we afanyu ya.”

⁷ Sanya ginan, Natan nalong sas Dabid te, “O wo wan kanya fag taw at maramraman! Yawi, Israel at Dius, nalong angku te, ‘Nafili au emu laman ngay taw Israel at fun ay nafalangfe ktua emu siginans Saul.

⁸ Ay nafon koma sa emu ngay fagfagtainanan ay ngay mangena. Ay nafili au emu laman tagfunan ngay taw Israel ay ngay taw Uda. Ay nu kurang yay, gfamut kyay ayu yap tua ku nafon sa emu.

⁹ Nu katanya, wain am fagyudun nafaning ku ngay suguan, ay am fagnafakamulunun takatanya fag mauri sa ku daga salubangan? Ay nafabul o Uryas fag taw Ket gina gfawayan, ay naylat o ngay taw Amun at ngay tagfawayan nu gfabul anya, ay sarokta nabul yay o at mangena.

¹⁰ Aroro sam nafakamulun takatanya, siginan ban katsi, am ngay kasugfunanan gawayan ay gfadfabulan, aroro nafamabo o angku ay nagbilug o Uryas at mangena laman am mangena.’

¹¹ “Yawi nalong yay fia te, ‘At sadi ban am kalongan kamabo emu. Ay namon kban am ngay mangena sa sik taw tagsiginan fia emu, ay kanya ban gfataladan anya fagayu ay fagayu ban taw glag.

¹² Nafakamulun o takatatuy at masuksuk, dewa katanya, ku fagnamakamulunun ban sa emu umdungug sas fagdaul talun Israel.’ ”

¹³ Nu katanya, Dabid nalong sas Natan te, “Anke asalanan au sas Yawi.” Ay Natan nabalus anya te, “Yawi nafalyam wan am ngay asalanan ay di ban o kabul.

¹⁴ Ay aroro sam nafakamulun, nafon o sam ngay fawayan sik buknga laman gfalingun Yawi. Nu katanya, ay ngenge ban umbul.”

¹⁵ Ay Natan nu noli wan, Yawi nafae fakasaitun Dabid ay Batseba at ngenge.

¹⁶ Nu katanya, Dabid wa gfangon laman gdarangin gfainfanyuan sas Dius, sit sadili fagtiugan, ay galay yabi kanya nu gtiug si way lang sad lutuk laman gfalag te, kabalu at ngenge.

¹⁷ Ay at ngay fagsuguan nananlag anya laman namangkad, dewa katanya, wa kaylat, ay wa yangay kaylat gfangon gfasfuan anya fagayu.

¹⁸ Ay sis fafituk menit, kafag ngenge anbul wan. Ay at ngay fagsuguan kalimu gfasaful sa anya te, at ngenge anbul wan. Kanya fagayu nalong te, “Setain ro nu gfasaful tam sa anya te, at ngenge anbul wan? Ebi oma gina at ngenge gleleg ay wa gdungugan antam, katsi ro kaugat wan nu yud gdungugan antam aroro at ngenge anbul wan. Kanya ro mafakamulun at mauri sat sadili.”

¹⁹ Dabid nadungug at ngay fagsuguan nu ginasan, ay kanya namatangan te, at ngenge anbul wan. Ay nainto sat ngay fagsuguan te, “O ku ngenge anbul wan?” Ay kanya fagayu nabalus te, “Sabv!”

²⁰ Dabid nu nadungug at famalus, anbangkad ay nanangigus, ay nararus langis sat alfuyu ay natubus at lanbung ay nalao sas Yawi at bale laman nanseg. Ay kanya nu ntabu wan nu gfauseganan, kanya noli wan ay naet fakonun sat fagsuguan ay nafangon.

²¹ Ay at ngay fagsuguan nalong sa anya te, “Wami nasaful emu te, nataw am fakatanyaun. Gina am ngenge gleleg, gwayway o ay wo gfangon laman gdarangin, ay gina ngap anbul, anlunggung o ay gfangon!”

²² Dabid nabalus te, “Sabv, kwa gfangon laman gdarangin au, ay gwayway au gina ku ngenge gleleg, aroro namatangan au te, Yawi ro manga kafanyu yay angku ay wa gfabayan ku ngenge.

²³ Dewa katanya, katsi ku ngenge anbul wan. Ay wain ro ku fagyudun gfangon laman gdarangin? O nunda ro mafaleleg kyay anya? Ay sa ban tibak buknga anggan au kadasug kyangay sat fakadasugan. Dewa katanya, kanya ban wa kafoli ya sa angku.”

²⁴ Dabid nafasun at mangena Batseba ay nafataladan. Ay Batseba nafafion ay nafasalug sik munama ay nafangayan te, Sulumun. Yawi maksvn nu kesug kafag sisian.

²⁵ Ay Dabid nafabuba sik rirukan sas Natan fag taglong te, “Fangayani ku sisian te, Edidya aroro Yawi kesug tua angku.”

Dabid Nagbilug Furuan Raba

²⁶ Kadugenya, Uab ay at ngay tagfawayan nafalganan laman namawayan sas furuan Raba, ngay taw Amun at furuan daul.

²⁷ Ay Uab nasugu sik tagfosuk longan laman nanlong sas Dabid te, “Nafawayan ami furuan Raba ay nagbilug wami at fagfungsuan mamam.

²⁸ Katsi, fafuli at sawad fag ngay tagfawayan ay namawayan am sas furuan Raba laman ban o tua ngay taw at fagfausegananun, ay bunwa angku.”

²⁹ Nu katanya, Dabid nafaful tagsit talun fag ngay tagfawayan ay nanamawayan sas Raba, ay kanya fagayu nababo ay dayun wan nagbilug kafag furuan.

³⁰ Ay Dabid nabul ngay taw Amun at fun at sangbo at mawatan siginans gintu ay nafasat alfuyu. Kafag sangbo at kabyatan tuluk safulu e limak fabudbungguan ay sanya e mafanud yangay fag ngay gang. Ay ngayu yayk fagagbilugun Dabid at nabul sanya ginan fag furuan.

³¹ Ay Dabid nafagsuguan kanya fag ngay taw, ay nafafakamulun siginan nu gfagbilug ngay familas kayu, ngay fangali ay wase, ay nafawat yangay ngay gang fangawat bale. Katanya Dabid at nafakamulun sa sangay taw Amun tagbanwan sit mesa furuan. Sanya ginan, Dabid ay at ngay tagfawayan noli wan sas Erusalem.