2 Samwel 1 - Fanawbuid tagsibaliwas Fakayabian

Dabid Nasaful te, Saul Anbul wan

¹ Dabid ay at ngay tagfawayan nu nafawayan wan ngay taw Amalek, kanya fagayu anfoli sas Siklag. Ginanya, Saul anbul wan. Ay kanya fagayu nabanwan yay sis Siklag duak menit.

² Ay sis fatuluk menit, sik taw andasug sas Siklag siginans awayan, at lanbung marasrasan ay at alfuyu gadafugun laman gfalag te, kabalu. Ay kanya ankakbang sas Dabid ay narungan laman kamababaun.

³ Ay Dabid nainto sa anya te, “Daginan o?” Ay kanya nabalus te, “Nalagyu au siginans taw Israel at ngay tagfawayan at fagmafulan.”

⁴ Ay Dabid nalong te, “Longi sa angku at kinfasludan.” Ay kanya nabalus te, “Taw Israel at ngay tagfawayan nalagyu ay ngayu at kinbul. Anggan Saul ay at baguama Yunatan anbul yangay.”

⁵ Ay Dabid nainto sa kafag taw te, “Tain nu saful o te, Saul ay at baguama Yunatan anbul wan?”

⁶ Ay kanya glong sas Dabid te, “Gina au sis buksul Gilbua, nalag au Saul masarare sit bangko ay at ngay fawayan kakbang anya sit ngay kabayu ay faguyudan fangawayan.

⁷ Ay kanya naligbat ay nalag angku ay nauro te, ‘Sinu o?’

⁸ “Ay nabalus au te, ‘Sik taw au Amalek.’

⁹ “Ay kanya nafabulun sa angku te, ‘Gewan, fabuli angku aroro maksvn wan nu gidapan au.’

¹⁰ Ay ankakbang au ay nafabul au anya aroro nalag kwa te, gakabulun wan, aroro maksvn wan at natayukan. Ay nabul au at sangbo siginan at alfuyu ay at bauyung siginan at take. Ay nabuba au sa emu ku fun.”

¹¹ Nu katanya, Dabid ay at ngay tagfawayan nu nadungug at kinfasludan sas Saul, kanya fagayu nagirat at ngay lanbung laman gfalag te, kabalu.

¹² Kanya fagayu gwayway, ay gdarangin yud gfangon sitsigon sad yabi, laman sas Saul ay sat baguama Yunatan, ay sas Israel, Yawi at ngay taw, aroro ngayu at kinbul gina gawayan.

¹³ Ay Dabid gdog yay nainto kafag baguama te, “Daginan o fag furuan?” Kanya nabalus te, “Sik taw Amalek au, ay katsi gbanwan au ste si ay talun.”

¹⁴ Dabid ginto te, “Wain am fagyudun ya anlimu gfabul Yawi at nafili fag fun?”

¹⁵ Ay Dabid nauro at fagsuguan at sadi, ay nasugu te, “Fabuli wan tuy fag taw!” Ay kafag fagsuguan nafabul wan kanya fag baguama.

¹⁶ Ay Dabid nalong sanya fag taw at mabulan te, “O wan at ke malong am faginbulun, siginan nu glong o te, nafabul o Yawi at nafili fag fun.”

Dabid at Alubad gina Saul ay Yunatan Anbul

¹⁷ Dabid nawat sik alubad laman sas Saul ay sas Yunatan.

¹⁸ Ay nasugu te, “Foyungi tuy sa sangay taw tagbanwan sis talun Uda.” Ay nafangayan at alubad te, “Godun,” ay marirukan sis Asar at fafil. Katatuy at alubad:

¹⁹ “Israel, am fagmasineun nalyam wan, gina am ngay tagfawayan at maseganama anbul sim fagagbilugun fag ngay buksul!

²⁰ Lag gfasaful takatanya sa sangay taw Gat ay sa sangay taw Askelun tagsit fagaweanan; aroro kanya ro fagayu nu nasaful way, ngay taw Filistia ro at ngay baguina at yud gtoglag Yawi, guseganan.

²¹ Wa nangus kadasug ya arak ay damug sas buksul Gilbua. Wa ban nangus e tumugbung ya fananum tagsanya fag ngay gamasun laman fanggalangun sas Yawi. Aroro sanya wan nu gfauri fun Saul at famalabag, ay we nararus ya langis sanya fag famalabag, laman gdog yay kasine ay kafadalusan.

²² Saul ay Yunatan at ngay fiso ay at ngay godun nafabul ngayuk tagfawayan at maseganama.

²³ Ngay taw Israel maksvn nu kesug Saul ay Yunatan. Dewa sas fagmanabayanun ay sas fakabulun gadgaloan tua gugat. Ay kanya fagayu gina gfawayan, amasakit yap tua bio ay amabitsug yap tua sik liun.

²⁴ Ngay taw Israel at mangena abalui Saul, aroro siginan anya anke ngay lanbung am at mabyat nu kabayad, ay anke famasine am si ay ngay bilug at mawatan siginans gintu.

²⁵ Ngay taw Israel at ngay tagfawayan at maseganama anbul sis awayan. Ay anggan Yunatan anbul yangay ay kanya fagayu matangda si sangay buksul.

²⁶ Ku fagadgalangan Yunatan, kabalu au emu! Maksvn nu kesug au emu; ay nu kesug o angku gtungud tua sik ngay mangena nu kesug at mangama.

²⁷ Israel at ngay tagfawayan at maseganama anbul wan. Ay nalyam wan fagayu at ngay famawayan.”