2 Pedru 3 - Fanawbuid tagsibaliwas Fakayabian

Tam Fun nu Kadasug

¹ Ku ngay fakesugun, tuy wan at fadua ginan au griruk sa ayu. Nariruk au sa ayu takatatuy laman gugatan au gfulo ay amatanganan sat matuyan siginan ku ngay famamatang.

² Amatangani Dius at ngay taglong at ngay foyungan ebi, ay tam Fun tam Tagfalangfe at longan at nafon sa ayu siginan at ngay nasugu.

³ Taguna safuli te, sa ban taguyan fag ngay menit kadasug takamalingun fag ngay taw, tagfaning at mauri fag algan.

⁴ Kafag ngay taw ban glong te, “Inday katsi Isus at fatuyanan te, ‘Kadasug kban.’ Newa tam ngay mangaguyang anbul wan, dewa katanya fagayu nusnge wain gtaglayun yay gugat kata ebi siginan nu kawat tam fagdaul daga.”

⁵ Kafag ngay taw at algan wan kalyam te, Dius at nawat tam kiwang siginan at longan. Ay kanya nawat daga siginan sad mamam.

⁶ Ay siginan yangay kafag mamam kanya nafalubgub fagdaul daga ay nafamin fagayu tagsanya.

⁷ Ay siginan yangay at longan, Dius namamin ban katsi fag banwa ay fag daga sasad afuy, gina ban andasug fanginsafulan asalanan fag menit ay nu gfaurianan tagfakamulun at mauri.

⁸ Ku ngay fakesugun, lag am kalyam te, sa tam Fun sik menit kata nu sik libuk banwa, ay sik libuk banwa kata way sik menit.

⁹ Tam Fun di gfaduge nu gfafasludan at fatuyanan, kata tibak taw at namatangan. Nu bunway kanya kamanyan ay gfon yay buknga sas fagayu taw laman gubun at ngay asalanan, aroro wa kaylat nusnga sinu nu gafaurianan.

¹⁰ Tam Fun munakbang wan nu kadasug kata sik tagfangkamul. Ay ginanya ban fag menit tam banwa umkalyam gasfuan sik awang daul, ay nusnge wain umkamin sasad afuy, ay nu katanya tam daga ay tam ngay nafakamulun umsaful.

¹¹ Nu katanya way ban at fakatabuan nusnge wain, masine nu gugali tuam at yud e malong, ay nu gfaning tuam Dius.

¹² Ay kaduge am gfanya tam Dius at menit, ugatani fia kaksvn ay fagmakatuun laman masakit kafag menit nu kadasug. Ay ginanya ban fag menit, afuy gfamin banwa, ay at kaksvnan ban nu masugba, fagayu nusnge wain umlanang.

¹³ Ay dewa katanya kata Dius at fatuyanan, gfanya tam sik bagu fag banwa ay fag daga, at matuyan fag ngay taw at fagbanwanan ban.

¹⁴ Nu katanya, ku ngay fakesugun, kaduge am gfanya, ugatani laman ban kanya nu ndasug ay ugali masine tua ay diam e malong ay manabayan tuam sit daga salubangan.

¹⁵ Amatangani tam Fun fagnafae bukngaun yay laman umlangfe tuam. Kata tam fakesugun tam faduksay Pablu at rirukan sa ayu siginan Dius at nafon sa anya fag fagsafulun.

¹⁶ Katanya yangay fagayu at foyungan sit ngay rirukan. Ay tibak afud at rirukan maidap katogdungug, ay at yud e fagsafulun ay at yud mamatanganan nasalan nu gfae masuad kafag foyungan. Ay katanya yangay at fakamulun sa tibak rirukan. Ay nu katanya kanya yay fagayu tagfaurianan at ngay sadili.

¹⁷ Nu katanya, ku ngay fakesugun, dakngani nasaful wam takatanya, madiriani tua laman ban diam gatabanan at mauri fag ngay taw at foyungan, ay manmomuy ay maksvn fag fagafanudun.

¹⁸ Fataglayuni nu kaksvn am si tam Fun Isus tam tagfalangfe at fagmagalangun ay at fagsafulun. Si wa anya fagmasineun katsi ay kabavn ban. Anud.