2 Kurintu. 9 - Fanawbuid tagsibaliwas Fakayabian

Fanggubukun sa sangay Tagafanud

¹ Kwa bangan gyarirukun ya sa ayu sabaliwa nu ggubuk am Dius at ngay taw.

² Aroro nasaful kwa te, mafalganan tuam ggubuk. Ay takatanya ay fakamulun nafamatungudun au sa sangay tagafanud sis talun Masidunya. Nalong au sa anya fagayu te, ngay tagafanud sis Akaya mafalganan tua ggubuk siginan yay egbanwa. Nu katanya, ngayu tua at nafaning ayu kamon. Ay aroro katanya ngayu tua at nafoyungan gfon.

³ Nu katanya, nafaguna kwa nasugu sanya kanya fag ngay faduksay laman ban wami kapla em nafauseganan sabaliwa ayu, ay laman mafalganan wan ay fanggubukun kata ku longan.

⁴ Aroro tiba ro ktaw Masidunya nu nanangalo angku sanya, ay nu nalag ro te, yam nafalganan ay famonun, kapla ban tam aroro maksvn wan nu gafanud ami sa ayu.

⁵ Nu katanya, nafaguna kwan sanya tiba tam faduksay, laman namalganan ay famonun kata ay fatuyanan. Nu katanya, gafanud au te, mafalganan wan ay famonun, ay siginan takatanya ay famonun ay nafalganan tua, ay diam nafabulunan.

⁶ Amatangani at longan te, sik taw at natanum nu dway ngayu, wa ban ngayu at gutluan. Ay sik taw at natanum nu ngayu tua ngayu yangay ban at gutluan.

⁷ Ay glong au ayu te, galay am at sadi foni ay dangay fabulunan, aroro Dius kesug ngay taw taguseganan tua nu gfon.

⁸ Aroro Dius makatu gfon sa ayu fagayu nusnge wain, laman kabavn diam e fagayudanun, ay magubuk tuam ay ngay iba.

⁹ Kata at longan sit Rirukan te, “Kanya kamon tua sat ngay yud e kwa. At fagmatuyanun di ban e fakatabuan kabavn.”

¹⁰ Dius gfon bvtang sa sangay tagtanum ay gfon fakonun sas fagayu taw. Ay kanya gfamut ay ramraman laman kaksvn tua nu kamon am sa sangay yud e kwa.

¹¹ Dius wan tagfaramraman ayu sas nusnge wain laman kaugat yay nu ggubuk am ay iba. Nu katanya, ngayu tua ban taguseganan sas Dius gina ami gfon ay fanggubukun.

¹² Ay fanggubukun sa sangay tagafanud bundi lang sat ngay fagayudanun, nu bunway laman ngayu yangay taguseganan sas Dius.

¹³ Aroro mafanggubuk tuam, takatanya gfatoglag am te, gfaning tuam at Masine fag Barita sabaliwa tam Fun Isus. Ay aroro nagubuk tuam anya fagayu, kanya ban fagayu guseganan yangay sas Dius.

¹⁴ Nu katanya, kanya fagayu maksvn nu kesug ay nu gdarangin ayu, aroro Dius nafasure tua sa ayu at fagmagalangun at maksvn.

¹⁵ Guseganan tam sas Dius aroro sat famonun at yud e gfasud.