2 Kurintu. 8 - Fanawbuid tagsibaliwas Fakayabian

Nu Ggubuk Tagayudan fag ngay Tagafanud

¹ Ku ngay faduksay, katsi kaylat ami gfasaful sa ayu sabaliwa Dius at fagmagalangun sa sangay tagafanud sa sangay furuan tagsis talun Masidunya.

² Kanya fagayu guseganan tua dewa nadalan at maksvn fag ngay fagidapun. Ay guseganan tua kamon, dewa yud ngayu ya at ramraman.

³ Aroro kanya fagayu nu kamon bundi fabulunan, ay at fon bundi kayu at fagmakatuun gfon.

⁴ Kanya fagayu gfakamulun takatanya aroro nafabulun sa emi te, “Aylati nu namon ami em fanggubukun sa tam ngay faduksay sas furuan Erusalem.”

⁵ Gtungud yay em fagsegun; taguna kanya fagayu nafatigwanan at ngay sadili sa tam Fun, ay anggan sa emi, kata Dius at fakaylatun.

⁶ Dakngani Titu wan at nafasigad kafag fakamulun, nafafoli ami anya sa ayu laman ggubuk ayu yakmay ban antabu nu gfon am.

⁷ Gtungud tuam tibak taw nu gfakamulun am nusnge wain: nu gafanud am, ay nu gfoyung am, ay nu e fagsafulun am, ay nu maseganama am gfaning tam Fun, ay nu kesug am emi. Nu katanya, ku fakaylatun te, masine yangay nu gfangguna am sabaliwa nu gfon am.

⁸ Dewa au nalong takatanya, kwa gsugu ayu. Nalong kway sa ayu tibak taw nu ggubuk, laman gfalag am sa emi te, nu kesug am matuyan tua.

⁹ Aroro nasaful wam te, kaksvn nya tam Fun Isus at fagmagalangun. Dewa kanya maramraman, kanya naubun at fagmaramramanun aroro sa ayu, laman umramraman am siginan at fagyudun e kwa.

¹⁰ Katatuy ku fangatulun sa ayu sanya baliwa: fataglayuni tua nu kamon am kata ebi fag banwa ay nafasigad wan. Am wan taguna at namatangan, ay at nafakamulun takatanya.

¹¹ Nu katanya, fataglayuni nu gfon am kafanud ay fagmakatuun, namalag am te, nu setain nu maseganama am gina am gfasigad, katanya yangay ban anggan sas fakatabuan.

¹² Aroro nu gfon am nu ay algan tua fia, Dius kaylat nusnga seyu ay fagmakatuun. Dius wa gfanya nusnga seyu ay fagyudun makatu gfon.

¹³ Kwa kaylat tibak taw nu e kwa, ay am ngap gidapan way am. Ku fakaylatun fagayu furuan nu gsudsudan tua e kwa.

¹⁴ Katsi am e kwa tuam, nu katanya, masine nu ggubuk am tagayudan. Ay nu am man ban tagayudan, ay nu sia man ban at ke kwa, kanya fagayu ggubuk yangay ban ayu. Nu katanya tua, ggudgubukan tuam.

¹⁵ Anfasludan wan si ayu Dius at Longan at marirukan te, “Sik taw at nafaful dewa ngayu, we sawe, ay sik taw at nafaful dewa alay way, wa kurang.”

Titu Nalao sas Furuan Kurintu

¹⁶ Segi Dius aroro Titu maksvn tua nu kesug ayu, kata nu kesug ami ayu.

¹⁷ Aroro fakatanyaun at fagfaningun bundi lang em longan, nu bunway at algan tua fia glo sanya laman nanggubuk ayu.

¹⁸ Ay naylat ami at sadi tam faduksay nu nangalo Titu laman taggubuk anya. Fagayu furuan toglag anya aroro kanya maseganama nu kamoyung at Masine fag Barita.

¹⁹ Kanya at fanambagun bundi lang takamoyung. Ngay tagafanud nafili anya laman ggubuk emi gina ami namosuk ay famonun. Takatanya fag fanambagun gfauseganan tua tam Fun, ay gfalag te, maksvn nu kaylat ami ggubuk.

²⁰ Maksvn nu gdiri ami laman nusnga sinu fag taw di e gfayud emi sabaliwa nu galaga ami em buba fag fanggubukun daul.

²¹ Gugatan ami gfakamulun at masine, bundi lang sa tam Fun at daga salubangan nu bunway anggan tua sas fagayu taw at daga salubangan.

²² Ay gina kanya fagayu glao sanya, nasugu ami at sadi tam faduksay laman nangalo yangay. Nafaskud ami anya ngayu ginan, ay nalag wami te, kanya maseganama tua nu ggubuk. Kaugat wan katsi nu maseganama aroro maksvn nu gafanud sa ayu.

²³ Ay tam faduksay Titu ku faudgufudan ay ku taggubuk sa ku ngay fakamulun. Ay at nanangalo anya fag duak faduksay, ngay tagafanud sa sangay furuan at nafili, ay duama at fakamulun gfauseganan tam Fun Isus.

²⁴ Nu katanya, falagi sa tam faduksay fag tulu te, matuyan tua nu kesug am anya, laman ngay furuan sumaful te, matuyan em fagusegananun sabaliwa ayu.