2 Kurintu. 7 - Fanawbuid tagsibaliwas Fakayabian

¹ Ku fakesugun ku ngay faduksay, aroro Dius nafatuyanan tua sa antam takatanya fagayu, ubuni wan nusnge wain tagfasuya tam bilug ay tam falad. Ay kabavn ugatani tua ugalii yud e malong ay suyui Dius.

Pablu at Fagusegananun

² Falagi tua sa emi te, kesug tuam emi. Kabavn wami e nafauri, ay wami nagewan ayu laman nantaban ami ayu sat mauri, ay wami e nadaya nusnga sinu si ayu.

³ Nalong au sa ayu takatanya, ku algan kwa namapla ayu, nu bunway kata ku rirukan te, maksvn nu kesug ami ayu, ay mafalganan ami gleleg ay kabul magamut ayu.

⁴ Maksvn nu gafanud au ayu, ay kabavn guseganan au aroro sa ayu. Dewa ngayu em fagidapun, maksvn tua ku fagmasunun, ay ngayu ku fagusegananun.

⁵ Gina ami sis talun Masidunya, wami yangay e fagmanabayanun ya. Nadalan ami ngayuk fagidapun dewa ndaginan. E fawayan ami, ay e fakalimuun.

⁶ Ay dewa katanya, Dius gfasun ngay tagidapan, ay kanya nafasun tua emi siginan tam faduksay Titu at nadasugan.

⁷ At nafasun emi bundi lang siginan Titu at nadasugan nu bunway siginan yangay ay nafasun anya. Kanya nabarita emi te, maksvn mandi nu gfanya am nu kadasug au. Ay nabarita yangay te, maksvn nu kabalu am ay nu kesug am angku, nu katanya, kaugat yay nu guseganan au.

⁸ Aroro dewa au nafae fakabaluun ayu si ku rirukan, kwa gamatangan te, kwa nangus nariruk katanya. Dewa katanya, kabalu au aroro nasaful au te, ku rirukan takatanya nafae fakabaluun ayu sik buknga sirut.

⁹ Ay katsi guseganan au, bunwa siginan ay nabaluan nu bunway aroro kafag fakabaluun nataban tua ayu sat masine laman gubun am ay asalanan. Takatanya fag fakabaluun siginan tuas Dius, nu katanya, ku longan di nafauri ayu.

¹⁰ Aroro siginans Dius fag fakabaluun kanya gtaban tua ayu laman gubun am ay asalanan, ay gfosuk ayu sas fakalangfean, ay di e kafayud takatanya fag fakabaluun. Dewa katanya, siginans fagdaul daga fag fakabaluun gtaban way antam sas fakabulun.

¹¹ Amatangani Dius at fakamulun siginan nu nafabaluanan ayu. Aroro katanya gugatan tuam ay maksvn tua nu grvbvy am at masine laman gsaful am te, diam e asalanan. Kauri tuam asalanan ay kalimu tuam asalanan at fungfung ban, ay maksvn tua nu gfanya am nu kadasug au, ay e fakafanyun tuam, ay kaylat am gfaurianan at ke asalanan. Ay balyawvtan gfalag tuam te, diam kataip ya sabaliwa kafag ngay asalanan.

¹² Dewa au nariruk sa ayu katanya, ku fagnarirukun bunwa sat ke asalanan fag taw ay bunwa sat nafauri, nu bunway laman gfasure am fia ay fagmatuyanun sa emi sis Dius at daga salubangan.

¹³ Ay aroro nafakamulun tuam takatanya, nafasun tuam emi. Ay gtungud yay kanya, nauseganan ami Titu at fagusegananun, aroro nafae fagmanabayanun tuam at amatanganan.

¹⁴ Ay nafamatungudun au sas Titu te, masine am, aroro nu setain em longan sa ayu nu matuyan, matuyan yangay ku nafamatungudunun sas Titu sabaliwa ayu, ay kdi nkapla.

¹⁵ Titu maksvn nu kesug ayu, kaugat wan nu namatang way sabaliwa nu mafamaning am, ay nu namatang yangay ay nafasakboan anya, ay nu kesug am anya.

¹⁶ Katsi maksvn nu guseganan au aroro gafanud au te, matuyan tuam.