2 Kurintu. 3 - Fanawbuid tagsibaliwas Fakayabian

Ngay Tagfakamulun sat Bagu fag Nasadian

¹ O gamatangan am te, kamatungudun ami sa em sadili? O em fakaylatun gbuba ami tibak taw at rirukan laman tagfatuyan te, at matuyan ami fag takamoyung, kata tibak taw at fakamulun? Duan.

² Am wan em tagfatuyan fag rirukan at marirukan si em amatanganan. Aroro siginan ay ugali, fagayu taw sumaful te, Dius tuami at nasugu.

³ Mayamag te, sik rirukan am tagsiginan tam Fun Isus at nafabuba sa emi. Ay at fanriruk kafag rirukan bunwa fanriruk, nu bunway tagleleg tua fag Dius at Falad. Ay nu griruk wa sas dalifi, sa tuas taw at amatanganan.

⁴ Mafafalong ami katanya aroro gafanud tuami sas Dius siginan tam Fun Isus.

⁵ Nu em sadili way, wami malong te, e fagmakatuun ami. Em fagmakatuun siginan tuas Dius.

⁶ Kanya wan at nafon emi fagmakatuun laman tagfakamulun sat bagu fag nasadian, bundi takata at kinriruk sis Muisis at Faugali, nu bunway siginan tua at Masine fag Falad. Aroro kafag faugali at fungfung fakabulun way, ay at Masine fag Falad at fon leleg tua.

⁷ Muisis at Faugali at kinriruk sas dalifi, dewa guli way sas fakabulun, e fagmabalyananun yangay. Ay gina Dius gfon sas Muisis kafag Faugali, ngay taw Israel wa madama Muisis at mata at kaksvnan nu masulo, ay kafag masulo nalyam way.

⁸ Nu katanya, gtungud yay at Masine fag Falad at foyungan nu e fagmasineun.

⁹ Taguna fag nasadian tagfosuk way sas fakabulun, nu e fagmasineun tua, kaugat wan at bagu fag nasadian nu e fagmasineun, at natap antam te, kata nu yud tam e asalanan.

¹⁰ Nu katanya, malong tam te, at dan fag fagmasineun nalyam wan, aroro tam Fun Isus gtungud yay kafag fagmasineun.

¹¹ Kafag nasadian at kinkalyam wan nu e fagmasineun tua, kaugat wan at yud kalyam fag nasadian nu e fagmasineun.

¹² Ay aroro e fagsegun tuami takatanya, mabitsug tua em amatanganan nu gfakamulun ami.

¹³ Ay dimi kata Muisis, at natabun at mata laman ngay taw Israel wa nalag kafag masulo at nalyam way vtv.

¹⁴ Nu katanya, ngay taw Israel kamaogatun yay gugat, aroro dasug katsi kata yay gugat nu e fantabun sit ngay amatanganan kaduge gtap Muisis at Faugali. Ay dewa katanya sik taw nu nsadi tua sa tam Fun Isus, umkalyam wan tagtabun at amatanganan.

¹⁵ Ay dasug katsi e gtabun yay at amatanganan kaduge gtap Muisis at rirukan.

¹⁶ Ay dewa katanya, kanya ban fag ngay taw nu nfoli tua sa tam Fun, umkalyam wan kafag fantabun.

¹⁷ Ay tam Fun, kanya wan at Masine fag Falad. Ay nusnga nday tam Fun at Masine fag Falad, sanya yangay fagmalangfeun.

¹⁸ Ay tam Fun, kanya wan at Masine fag Falad, kanya gfasine antam laman kaksvn tua nu gfaning tam anya.