2 Kurintu. 2 - Fanawbuid tagsibaliwas Fakayabian

¹ Nu katanya, namatangan au te, toyap ku nadog nansibo ayu laman kdi namae fakabaluun ayu.

² Aroro nu nafae fakabaluun kway ban ayu, sinu ya ban tagfasun angku? O nu nafae fakabaluun kro ayu, o nunda mafasun am angku?

³ Katanya ku longan si ku rirukan, laman ban nu ndasug au sanya, kdi e fakabaluun siginan sangay taw tagfauseganan nangus angku. Aroro natuyan au te, ay fagusegananun tagfae fagusegananun ban angku.

⁴ Ay gina au griruk sa ayu, gafanawa au maksvn, ay kabalu, ay galiasun maksvn. Ku fagnarirukun sa ayu bunwa te, gfae fakabaluun au ayu, nu bunway laman gfasaful au sa ayu te, maksvn nu kesug au ayu.

Falyami Sik Taw at Asalanan

⁵ Sik taw nu nafae fakabaluun sas nusnga sinu, bundi lang sa angku nu gfae fakabaluun, nu bunway anggan tua sa ayu fagayu. Dewa au nalong takatanya, kwa kaylat gfaksvn ku longan.

⁶ Tangayu si ayu nafaurianan kanya fag taw. Ay katsi, kasakan wan ay faurianan anya.

⁷ Katsi falyami wan at asalanan ay fasuni anya laman wa kaksvn nu kabalu.

⁸ Ay maksvn nu glong au sa ayu te, falagi sa anya te, kesug wam anya.

⁹ Aroro katanya yangay at masuad at sadi ku rirukan sa ayu ebi, laman sumaful au te, o galo tuam fia fagayu ku foyungan ayu.

¹⁰ Nu nafalyam am nusnga sinu fag taw at asalanan, nafalyam kyangay. Ay tam Fun Isus wan tagfatuyan te, nafalyam au kafag taw at asalanan aroro sa ayu,

¹¹ laman di tam gadayan Satanas. Aroro saful way tam at ngay algan.

Pablu Gina sis Truas

¹² Gina au andasug sas furuan Truas laman namoyung at Masine fag Barita sabaliwa tam Fun Isus, tam Fun nafon angku sik buknga laman gfakamulun au takatanya.

¹³ Ay dewa katanya, kwa mabayan aroro wa sanya ku faduksay Titu. Nu katanya, nalao kwan sanya ginan fag furuan ay nataglayun au sas Masidunya.

Nababo Aroro siginans Isus

¹⁴ Guseganan tam sas Dius aroro kanya gfosuk tua gugat emi sa tam Fun Isus at fagmababoun aroro masadi tua ami sa anya. Ay nusnga nday ami, Dius gagbilug emi laman gfatoglag ami tam Fun Isus sas fagayu taw. Takatanya em fakamulun kata nu gfarapyag ami sik famaebebanglu.

¹⁵ Kata ami at mabebanglu fag fanggalangun tam Fun Isus at nafon sas Dius. Kanya fag fanggalangun at ayuk karapyag sa sangay taw takalangfe, ay anggan sa sangay taw takafaurianan.

¹⁶ Sa takafaurianan fag ngay taw, kata way mi sik ayuk takamabul. Ay dewa katanya, sa takalangfe fag ngay taw, kata tuami tagfon leleg fag ayuk. Sinu at mafafakamulun takatanya?

¹⁷ Wami kata tibak taw taget famayad gina kamoyung Dius at longan. Aroro Dius tuami at nasugu, matuyan tua nu kamoyung ami at longan sit daga salubangan, siginan em fagmasadiun sa tam Fun Isus.