2 Kurintu. 13 - Fanawbuid tagsibaliwas Fakayabian

Pablu at Suguan Taguyan

¹ Katsi at fatulu ginan nu nansibo au ayu. Dius at Rirukan glong te, “At masine nu dua mannga tuluk taw tagfatuyan sa sik taw at asalanan.”

² Ebi gina at fadua ginan nu nasibo au ayu, nafararang au sanya fag ngay taw at ke asalanan, ay anggan sa ayu fagayu. Ay katsi dewa au ngayayu si ayu, gdog kyay gfararang te, nu ndasug kban sa ayu, gfaurianan kban kanya fag ngay taw.

³ Gfakamulun kban takatanya laman tagfatuyan sa ayu te, tam Fun Isus garingang sa ayu siginan angku. Tam Fun Isus di mamomuy nu bunway mabalyanan tua nu gfae fagmatuyanun ayu.

⁴ Ay kanya dewa mamomuy gina e gtuktuk anya sas fasulungan kayu, katsi kanya gleleg tua siginans Dius at fagmabalyananun. Aroro siginan em fagmasadiun sa anya mamomuy yangay ami, dewa katanya, katsi lumag am te, gleleg tuami siginans Dius at fagmabalyananun.

⁵ Ay atuyani fia sa ay ngay sadili ay faskudi te, o anud galo tuam fia kata tam fagafanudun. O yam nasaful te, tam Fun Isus si wa ayu? Sabv, nu ddi am sik ngay takamaningan.

⁶ Ku fagsegun lumag yangay am te, bundi ami takamaningan fag ngay nasugu.

⁷ Gdarangin ami sas Dius te, dangay am nangus gfakamulun at mauri. Gfakamulun ami takatanya bunwa laman ngay taw lumag te, ami at matuyan, nu bunway laman gfakamulun tuam at masine, dewa tibak taw gamatangan te, bunwa ami at matuyan fag ngay nasugu.

⁸ Aroro wa tam masine gbabo at matuyan, nu bunway gfaning tua tam.

⁹ Maksvn nu guseganan ami dewa ami mamomuy, am nu mabitsug tuam. Gdarangin ami ayu laman kaugat tua nu gfakamulun am at masine.

¹⁰ Ay kaduge au yud sanya, nariruk au sa ayu takatanya, laman ban nu ndasug au sa ayu, kwa gfakaksvn nya ku longan nu gfakamulun au tam Fun at nafon angku fag fagmabalyananun. Aroro tam Fun at nafon angku fag fagmabalyananun, tagfaksvn tua ayu bundi tagfamomuy.

¹¹ Ku ngay faduksay, ste way tsigon ku rirukan. Ugatani tua fia sat matuyan. Ay aloi kata em suguan ayu. Masadii tua ay amatanganan, ay banwani manabayan. Nu katanya tua, Dius at fakesugun ay fagmanabayanun si tua gugat ayu.

¹² Kamatoani tua fia sas galay am at sadi at mafafanyuanan fag ngay kamatoanan. Tam ngay faduksay ste glong sa ayu te, O manabayan tuam?

¹³ Nangus tam Fun Isus at fagmagalangun, ay Dius at fakesugun ay at fagmasadiun sat Masine fag Falad sumawa nangus fia ayu fagayu.