2 Krunika 8 - Fanawbuid tagsibaliwas Fakayabian

Fun Sulumun at Nafawat Tiba

¹ Kaduge duak safuluk banwa, Sulumun nafawat at bale ay anggan Yawi at bale. Nu ntabu wan,

² kanya nafadog yay nafawat fun Kiram at nafon sa anya fag ngay furuan, ay nafabanwan sanya ngay taw Israel.

³ Ay ginanya yangay Sulumun nu namawayan ay gagbilug furuan Kamat-Suba.

⁴ Ay kanya nafadog yay nafawat furuan Tadmur sis talun at yud e taw, ay fagfungsuan ngay gutluan tagsis Amat.

⁵ Kanya nafaogat sit tungud ay sit daga baliwa fag afud furuan Bet-Kurun. Ay kanya nafae alad, ay nafae ngay famatawad sakbawan.

⁶ Katanya yangay at nafakamulun sis furuan Baalat, ay fagayu at furuan fagfungsuan gutluan, ay at fagfasarirungan ngay kabayu ay faguyudan fag sakayan gina namawayan. Sulumun nafawat yangay nusnga setaw at fakaylatun sis Erusalem ay sis Lebanun ay fagdaul at fagfunanan fag talun.

^7-8 Ay e sawad yay sanya fag talun at yud taw Israel fag ngay gaban, ngay taw Israel at yud nafabul gina gagbilug Kanaan fag talun. Kanya fag ngay taw sik ngay taw Amur, ngay taw Ket, ngay taw Peres, ngay taw Kib ay ngay taw Ebus. Sulumun nafagsuguan anya fagayu ay nafabulun gfafakamulun, ay kanya fagayu sik ngay fagsuguan dasug katsi.

⁹ Ay Sulumun wa nafagsuguan nusnga sinu fag taw Israel. Sarokta, kanya nafili kanya fagayu laman at ngay tagfawayan, tagfangguna at ngay tagfawayan, ay ngay tagfangguna at ngay tagsaful gsakay sis faguyudan, ay sis kabayu.

¹⁰ Ay fun Sulumun nafili duak sandan limak safuluk taw, laman tagfangguna at ngay tagfakamulun.

¹¹ Nu ntabu wan Sulumun at nafawat fag bale laman sat bubay, Igiptu at fun at baguina, kanya nafalin anya sanya fag bale siginans Dabid at furuan. Aroro kanya nalong te, “Ku mangena wa masine gbanwan sis fun Dabid at bale, aroro kanya fag bale we malong, ay ebi ataw sanya Fagsuadan Yawi at Nasadian.”

¹² Sanya ginan, Sulumun nafon at ngay fagirugun fag fanggalangun sis salubangan Yawi at bale.

¹³ Kanya nafafasludan kata Muisis at suguan: at fagfonun kayu menit, ay galay Famiangalay fag Menit, ay fagmafulun sabaliwa Magdanun nu Bagu Kasure, ay galay banwa fag tuluk fagmafulun: fagmafulun sabaliwa Tinapay at yud e Famabia, fagmafulun sabaliwas Fanggutluan, ay fagmafulun sabaliwa nu Kawat ngay Fayag.

¹⁴ Ay kata at mama Dabid at fakamulun kanya nafainkafudan ngay tagfon fanggalangun, ay taw Lebi laman gfakamulun at ngay mesa fakamulun. Kanya nafili ngay taw Lebi laman tagfangguna ngay taw gina gfauseganan Dius, ay kanya fagayu ggubuk yangay ngay tagfon fanggalangun nu gfakamulun kayu menit. Ay kanya nafainkafudan yangay ngay tagulit sis Yawi at bale at ngay sakbawan, aroro katanya Dabid, Dius at fagsuguan, at suguan.

¹⁵ Sulumun ay at ngay fagsuguan nafaning fun Dabid at suguan fagayu, sabaliwa ngay tagfon fanggalangun, ay sa sangay taw Lebi ay sa sangay fagfungsuan ramraman.

¹⁶ Ay antabu wan Sulumun nu gfawat Yawi at bale siginans fagfatungkudan turuk yakmay antabu.

¹⁷ Sanya ginan, Sulumun nalao sas Esyun-Geber ay Elat tagsis tigyangan Dagat Maraska, sis talun Edum.

¹⁸ Ay fun Kiram nafasanya ngay sakayan lino ay at ngay fagsuguan tagsaful gfalao kanya fag ngay sakayan, laman ggubuk Sulumun at ngay taw. Ay kanya fagayu gfalao kafag ngay sakayan lino sas talun Ufir ay nabuba sanya ginan labi ufatk libuk fabudbungguan gintu ay nafadasug sas fun Sulumun.