2 Krunika 7 - Fanawbuid tagsibaliwas Fakayabian

Nu Gfadante Yawi at Bale

¹ Sulumun nu ntabu gdarangin, e afuy andasug siginans banwa ay nairug at fagirugun fag fanggalangun ay tiba ya at fanggalangun, ay Yawi at kamasuloan ankapnu sat bale.

² Ngay tagfon fanggalangun wa masakbo sas Yawi at bale aroro at kamasuloan ankapnu sanya.

³ Ay ngay taw Israel nu nalag kafag afuy ay Yawi at kamasuloan sis tungud Bale, kanya fagayu natudan ay naseg Yawi ay gfauseganan anya, glong te, “Yawi matuyan, ay nu kesug di e fakatabuan.”

⁴ Sanya ginan, fun Sulumun ay fagayu taw nafon at ngay fanggalangun sas Yawi.

⁵ Ay fun Sulumun nafon duak safulu e duak libuk baka ay sadik sandan duak safuluk libuk tupa laman at fanggalangun. Katanya fun Sulumun ay fagayu taw Israel nu gfadante Yawi at Bale.

⁶ Ngay tagfon fanggalangun ay ngay taw Lebi nananmalindug sit mesa fagmalindugan, gbuba ngay fagfawangun ay glong te, “Yawi nu mafangesug di e fakatabuan.” Kafag ngay fagfawangun fun Dabid ebi at nafasaman sas Yawi laman gfawang gina gfauseganan anya. Sis salubangan ngay taw Lebi, ngay tagfon fanggalangun guyup at ngay budyung kaduge ngay taw Israel malindug.

⁷ Sulumun nafasaman laman sas Yawi tagsis salubangan bale fag fagawean, ay nafon fagirugun fag ngay fanggalangun, ay ngay famauseganan fag ngay fanggalangun, ay taba fag ngay fanggalangun laman sas fagmanabayanun. Kafag ngay fanggalangun wa sak ya sas fagirugan at mawatan siginans tansu.

⁸ Kaduge fituk menit Sulumun ay anggan fagayu taw Israel anful laman guseganan sabaliwa at fagmafulun gina Kawat ngay Fayag. Ay ngayuk taw at kinful tagsiginans dua alvngvdan, siginans Lebu-Kamat sitsigons fagfamiluganan mamam sis talun Igiptu.

⁹ Sis fawaluk menit, kanya fagayu anful laman gfagbilug sas Yawi fagirugan fanggalangun kaduge fituk menit, ay gfataglayun nu maful kaduge yangay fituk menit sabaliwa nu Kawat ngay Fayag.

¹⁰ Balabag di sis faduak safulu e tuluk menit sis fafituk magdanun, Sulumun nafauli wan kafag ngay taw. Ay kanya fagayu guseganan guli ay masine at ngay amatanganan aroro sas Yawi at nafakamulun fagayu at masine sas Dabid ay sas Sulumun ay sat ngay taw Israel.

Dius Ansure sas Sulumun

¹¹ Ay Sulumun nafatabu wan nu gfawat at bale ay anggan Yawi at bale, ay nafatabu wan kata at algan at fagnamawatun.

¹² Ay sik yabi Yawi ansure sa anya ay nalong sa anya te, “Nadungug au am darangin, ay nafili au am nafawat ku bale laman fagnangirugan ngay fanggalangun.

¹³ “Kata nangus nu yud au gfaarak, ay nu nafadasug au ngay liung sas daga at namamin ngay tanum, ay nafadasug au faurianan sa ku ngay taw;

¹⁴ ay ku nauro fag ngay taw nu kamababaun tua, ay gdarangin, ay kakbang tua sa angku, ay gubun tua at ngay fakamulun at mauri, gdungug au anya siginans banwa ay gfalyam au at ngay fagmauriun, ay gdog kyay ban gfayu at gutluan siginan at daga.

¹⁵ Ay dakdi ban gfalibangun anya fagayu, ay gbalus ktua ban at ngay darangin si ku bale,

¹⁶ aroro nafasaman au ku bale laman gfauseganan tuam gugat angku kabavn. Ay gdiri kban gugat ay galaga.

¹⁷ “Ay nu gfaning tua ban o angku kata am mama Dabid, ay nu gfakamulun tua ban o fagayu ku suguan emu, ay gfafasludan ku ngay foyungan ay ku fon emu fag ngay fagaloan,

¹⁸ siginan tua ban gugat am kasugfunanan tagfunan kabavn. Nafatuyanan au takatanya sa am mama Dabid, gina au glong sa anya te, ‘Di ban kamin am kasugfunanan laman at nanfunan sa sangay taw Israel.’

¹⁹ Dewa katanya, nu gtalyuyan way ban am ku ngay faugali ay way ban am gfaning ku ngay foyungan ay ku nafon ayu fag ngay suguan, ay nu nafaning way ban am ay naseg tibak fagsegan,

²⁰ gaiyan kban ayu siginan ku nafon ayu fag talun ay gfayud kban e masuad tuy fag bale ku nafasaman laman gfauseganan am angku. Ay fagayu ban taw kase gfalingun tuy fag bale.

²¹ Ay dewa ku bale masine ay kadungug, giklas kban. Ay fagayu ban at nadalan sanya kalipsik ay kadulo ay glong te, ‘Wain Yawi at fagnafakamulunun takatatuy ste fag talun ay sat bale?’

²² Tibak taw ban gbalus te, ‘Aroro ste fag ngay taw nafamabo at ngay mangaguyang at Dius, Yawi, at nafaduksun anya fagayu siginans talun Igiptu, ay kanya fagayu nafaning ay naseg tibak fagsegan. Kanya wan at fagnafadasugun takatanya fag ngay fagidapun.’ ”