2 Krunika 6 - Fanawbuid tagsibaliwas Fakayabian

¹ Ay Sulumun nadarangin te, “Yawi, nalong o te, gbanwan ban o sat madamvl fag linyabu.

² Katsi nafawat kwan at masine fag bale laman sa emu, am fagnamanwanan kabavn.”

Sulumun at Longan sa sangay Taw Israel

³ Sanya ginan, fun Sulumun nasalubang sa sangay taw Israel tagmalindug sanya, ay nafadante anya fagayu,

⁴ ay nalong te, “Segi Yawi ngay taw Israel at Dius. Kanya nafafasludan at ngay fatuyanan sa ku mama Dabid. Aroro kanya nalong te,

⁵ ‘Siginan nu gfaduksun au ku ngay taw siginans talun Igiptu, kye nafili sik kasugfunanan taw Israel at furuan laman ku fagnangawatan ku bale, laman fagnamauseganan angku, ay kyangay e nafili sik fun laman sa ku ngay taw Israel.

⁶ Ay katsi, nafili au Erusalem laman fagnangawatan ku bale, ay nafili au Dabid laman namagtainan ku ngay taw Israel.’

⁷ “Ku mama Dabid maksvn nu kaylat namawat sik bale laman gfauseganan Yawi, Israel at Dius.

⁸ Dewa katanya, Yawi nalong sa anya te, ‘Masine am algan nu namawat o ku bale laman fagnamauseganan ku ngayan.

⁹ Dewa katanya, bunwa ban o at namawat, am baguama way ban at namakamulun takatanya laman sa takafauseganan ku ngayan.’

¹⁰ “Ay katsi, Yawi nafafasludan at fatuyanan. Natubus au ku mama Dabid, ay katsi gfunan au ngay taw Israel kata Yawi at nafatuyanan. Ay nafawat kwan tuy fag bale laman fagnamauseganan Yawi, Israel at Dius.

¹¹ Ay nafasakbo au sanya Fagsuadan Yawi at Nasadian sa sangay taw Israel.”

Sulumun at Darangin laman sa sangay Taw Israel

¹² Fun Sulumun nananmalindug sis salubangan fagirugan fanggalangun laman sas Yawi sis fagunan ngay taw Israel at fagmafulun, ay nafabat at ngay take.

¹³ Kanya nananmalindug sat nafawat fag faglindugan at mawatan siginan tansu. Kanya fag faglindugan at kabaan ay at kadaulan limak siu, ay at kabatan tuluk siu. Sanya ginan, Sulumun natudan sis salubangan ngay taw Israel ay nafabat at ngay take sabaliwas banwa,

¹⁴ ay nadarangin te, “Yawi, ngay taw Israel at Dius, we Dius tagfasud emu sis banwa ay sas fagdaul daga. Gfafasludan o am nasadian, ay gfalag o am fakesugun sam ngay fagsuguan tagfaning emu sas fagdaul at amatanganan.

¹⁵ “Nafafasludan o am ngay fatuyanan sa ku mama Dabid am fagsuguan. Nafatuyanan o sa anya, ay nafafasludan yangay o katsi fag menit.

¹⁶ Yawi, Israel at Dius, fafasludani yangay at sadi am fatuyanan sam fagsuguan Dabid ku mama. Nalong o anya te, ‘Siginan tua ban gugat am kasugfunanan at nanfunan sa sangay taw Israel nu gfaning tua ban fia ku ngay suguan kata am nafakamulun.’

¹⁷ Nu katanya, Yawi, taw Israel at Dius, fafasludani am fatuyanan sa am fagsuguan Dabid.

¹⁸ “Dius, o manamanwan o ste swa daga magamut ngay taw? Dewa si tiba tungud fag banwa ya kasakan sa emu, ay kaugat wan ste ku nafawat fag bale!

¹⁹ Dewa katanya, Yawi, ku Dius, dungugani angku, am fagsuguan, nu get au gfainfanyuan sa emu.

²⁰ Uliti tua ban nangus gugat am bale kayu menit ay yabi, am fatuyanan te, sanya nu gfauseganan emu. Balusi tua nangus am fagsuguan at darangin laman stie fag bale.

²¹ Dungugani ku fagetun, ay am ngay taw at fagetun, gina ami gdarangin gsalubang stae. Ay dungugani emi sanya sis banwa am fagbanwanan, ay nu gdungug tuo emi falyami em ngay fagmauriun.

²² “Sik taw nu nke fagmauriun sat faduksay, ay nu nanamatuyan sis salubangan fagirugan fanggalangun ste fag bale,

²³ dungugani anya sanya sis banwa ay insafuli am ngay fagsuguan. Faurianani at ke ngay asalanan ay tuyani at yud e asalanan te, di e malong, laman fagayu taw sumaful te, di e asalanan.

²⁴ “Am ngay taw Israel nu nababawan way sat ngay fawayan aroro anke asalanan sa emu, ay kanya fagayu nu kafoli tua sa emu ay nu gseg tua am ngayan, ay nu gdarangin tua ay get am fanggubukun ste sim bale,

²⁵ dungugani tua ban anya fagayu sanya sis banwa ay falyami tua ban at ngay asalanan, ay fafolii anya fagayu sam nafon sa anya fagayu ay sat ngay mangaguyang fag talun.

²⁶ “Ay nu dway ban o gfadasug ya arak aroro am ngay taw anke asalanan sa emu, ay kanya ban fagayu nu gdarangin tua gsalubang sam bale, ay nu gfauseganan tua ban emu, ay gubun at ngay asalanan aroro nafaurianan o anya fagayu,

²⁷ dungugani tua ban anya fagayu sanya sis banwa. Ay falyami ban am ngay fagsuguan fag ngay taw Israel at ngay asalanan. Foyungi anya fagayu laman matuyan tua nu gbanwan, ay fadasugi arak sa am nafon sa anya fagayu fag talun laman at fagagbilugun.

²⁸ “Ay nu nke fanlunus ban ste fag daga, ay mannga at ngay tanum kalangke ay liung ay tengad gfamin, ay at ngay fawayan gligung at ngay furuan, ay nu ndasug nusnge wain fag fakasaitun,

²⁹ ay am ngay taw Israel nu gdarangin tua ay nu get tua gubuk aroro sat fagidapun ay nu gfalugde tua at daluap ste fag bale,

³⁰ dungugani anya fagayu sanya sim fagbanwanan sis banwa, ay falyami at ngay asalanan, ay fakamuluni sas galay sik taw kata at nafakamulun, aroro saful way o at mesa amatanganan. O way lang tagsaful fagayu taw at amatanganan.

³¹ Fakamuluni sa anya fagayu takatanya laman kanya fagayu gsuyu tua emu ay gbanwan tua kata am balyawvtan kaduge gbanwan sim nafon sa em ngay mangaguyang fag talun.

³² “Ay tibak talun ban at ngay taw nu nadungug te, mabalyanan o ay madulo, ay kanya ban fagayu nu nalao stae laman nanseg emu ay gdarangin gsalubang ste fag bale,

³³ dungugani tua ban anya fagayu sanya sis banwa am fagbanwanan. Ay foni at ngay fagetun, laman fagayu gaban taw sas fagdaul daga tumoglag ay gsuyu emu kata am ngay taw Israel ay sumaful te, gfauseganan ami emu ste ku nafawat fag bale.

³⁴ “Nu nasugu ban o am ngay taw laman namawayan at ngay fawayan, ay kanya ban fagayu nu gdarangin tua sa emu gsalubang ste fag furuan ay ste fag bale ku nafawat laman gfauseganan emu,

³⁵ dungugani tua ban at ngay darangin nu get sa emu sanya sis banwa, ay fababoi anya fagayu.

³⁶ “Am ngay taw nu nke asalanan sa emu (aroro we taw at yud e asalanan!) ay nu ndotama o ay namon anya fagayu sat ngay fawayan, at nantaban anya fagayu ay nangubung sit sadili talun, dewa ngayayu ay munakbang,

³⁷ ay kanya ban fagayu nu nafabali tua at amatanganan, ay nu naubun tua at asalanan ay nafainfanyuan glong sa emu te, ‘Anke asalanan ami ay nafakamulun ami at mauri,’

³⁸ dungugi tua ban at darangin. Ay kanya fagayu nu kafoli sa emu nu fagdaul tua at amatanganan, dewa yay sit fagatabananan fag talun, ay nu gdarangin tua sa emu gsalubang ste fag talun am nafon sat ngay mangaguyang, ay ste fag furuan ay ste fag bale ku nafawat laman gfauseganan emu,

³⁹ dungugani anya fagayu sis banwa am fagbanwanan, ay balusi at ngay fagetun ay fababoi, ay falyami ban at ngay asalanan sa emu.

⁴⁰ Ku Dius, dungugani fagayu at nanandarangin stae.

⁴¹ Yawi em Dius, alindugi, adasugi stie sam fagbanwanan, gasfuan fagsuadan am nasadian tagfatoglag te, mabalyanan o. Am nafili nangus fag ngay tagfon fanggalangun, lumag nu gfalangfe o anya fagayu, ay am ngay taw nangus at matuyan, guseganan sa am fagmasineun.

⁴² Yawi em Dius, lag gaiyan angku, am nafili. Amatangi tua ban gugat am fatuyanan te, kesug tua ban o gugat am fagsuguan Dabid.”