2 Krunika 4 - Fanawbuid tagsibaliwas Fakayabian

Ngay Fagagbilugun sis Dius at Bale

¹ Ay Sulumun nafawat yangay sik fagirugan fanggalangun mawatan siginans tansu, at kabaan duak safuluk siu, ay at kadaulan dua yangayk safuluk siu, ay at kabatan safuluk siu.

² Ay nafawat yangay tagbia fag fagfegusan at nafangayan te, Dagat. At kabasadan limak siu, ay at kadaulan safuluk siu, ay at kadaulan sat ligung tuluk safuluk siu.

³ Ay kafag fagfegusan masafungan duak talad takata ngay baka tama sit daga biul. Galay sik siu masafungan safuluk baka tama. Nu kawat kafag ngay famasine gasfuan wan nu kawat fagfegusan.

⁴ Kanya fag fagfegusan mafatungkudan sis labi duak baka tama, mawatan siginans tansu. At tuluk baka gsalubang sas fawalan fag alvngvdan, ay at tulu sas fakayabian, ay at tulu sas fasiunan fag alvngvdan, ay at tulu sas fakamenitan.

⁵ Kanya fag fagfegusan at kadamvlan ufatk sumyu, ay at biul kata sik taya at matangwa takata sik barugwak. Ay nu gbilug labi fituk libuk baringan mamam.

⁶ Kanya nafawat yangay safuluk fagsuadan laman fagfegusan ngay fagagbilugun laman sas fagirugun fag ngay fanggalangun. At lima nafatungkud sibaliwas fasiunan ay at lima sibaliwas fawalan. Dewa katanya, fagfegusan at nafangayan te, Dagat, kanya ngay tagfon fanggalangun at fagfegusan.

⁷ Kata at algan, kanya nafawat yangay safuluk fagfatungkudan salung siginans gintu, ay nafasas Yawi at bale, lima sas mesa alvngvdan.

⁸ Kanya nafawat yangay safuluk fagfatungkudan ay nafasas Yawi at bale, at lima nafasas fawalan fag alvngvdan ay at lima nafasas fasiunan fag alvngvdan. Ay nafawat yangay sadik sandank taya fagsuadan famaramsig fag taguk, mawatan siginans gintu.

⁹ Kanya nafawat yangay sik basad alad laman sa sangay tagfon fanggalangun, ay sik tagbia fag basad alad at maligung si sangay tagfon fanggalangun at basad alad. Kanya nafawat yangay ngay sakbawan si sangay dalan tagsas Yawi at bale at basad alad ay nasifig kafag ngay sakbawan ngay tansu.

¹⁰ Ay nafatungkud fagfegusan at nafangayan te, Dagat, sabaliwas fasiunan fag alvngvdan ay fakamenitan at wabilug sis Yawi at bale.

¹¹ Ay Kiram nawat yangay sik ngay fantaga nagdafugan, ay tagbia fag ngay saruk, ay ngay taya fagsuadan famaramsig fag taguk. Ay kanya nafatabu nu kawat fagayu fagagbilugun sis Yawi at bale kata fun Sulumun at suguan anya. Kanya nawat:

¹² duak turuk; duak takata tagbia fag taya kafag duak turuk at alfuyu; duak salambitan gsugfunan at famasine ngay turuk at alfuyu;

¹³ ufatk sandank takata tangbul at rawvg, (kafag duak talad takata tangbul at rawvg masugfun sas galay sik famasine fag salambitan at mafasafungan si sangay turuk at mesa alfuyu);

¹⁴ ngay fagfatungkudan ay tagsanya fag ngay fagfegusan;

¹⁵ fagfegusan at nafangayan te, Dagat, ay sit daga fag labi duak tama baka;

¹⁶ ngay fantaga nagdafugan, ngay saruk tagbia, tagbia fag ngay fansaruk at ke sarangan fanguyut yamas, ay tiba yak fagagbilugun. Fagayu fagagbilugun Sulumun at nafawat sas Kiram laman sas Yawi at bale mawatan siginans tansu at nafadalusan.

¹⁷ Fun Sulumun nafawat kanya fag ngay fagagbilugun sis fakawatan tagsis datag Urdan sis wabilug Sukut ay Saretan.

¹⁸ Sulumun wa nafabudbungguan ya kafag ngay fagagbilugun aroro ngayu mandi, ay wa kasaful ya te, seyuk fabudbungguan kafag ngay tansu.

¹⁹ Fun Sulumun nafawat yangay ngay fagagbilugun laman sas Dius at bale: sik fagirugan fanggalangun mawatan siginans gintu; ay fagfatungkudan at mawatan siginans gintu laman fagfatungkudan tinapay fanggalangun sas Dius;

²⁰ ay tagsis salubangan at Mafasamanan Fia fag Suluk fag ngay fagfatungkudan salung, at mawatan siginan at yud e suglat fag gintu;

²¹ ay famasine fag ngay barugwak at mawatan siginans gintu, ay ngay salung ay fanikfit: kanya fagayu at fangawat fag gintu, we suglat;

²² ay ngay famagud fagigangan, ngay taya fagsuadan famaramsig fag taguk, ngay fantaga nagdafugan, ngay famanus famaebebanglu fag lune, ay fansayang at mawatan siginans gintu at yud e suglat, laman sas faningding sakbawan tagsat Mafasamanan Fia fag Suluk, ay sas falangganan daul.