2 Krunika 36 - Fanawbuid tagsibaliwas Fakayabian

Yuakas nu Gfunan Talun Uda

¹ Ay ngay taw Uda nafili Yuakas, Usyas at baguama laman fantubus anya sik fun sis Erusalem.

² Yuakas duak safulu e tuluk banwa gina gfasigad gfunan. Ay kanya gbanwan sis Erusalem, ay nu gfunan tuluk magdanun.

³ Ay Neku, Igiptu at fun, naiyan anya siginan at fagmafunanun ay nafae bayad ngay taw Uda tuluk libu, limak sandank fabudbungguan salapi, ay tuluk safulu e limak fabudbungguan gintu.

⁴ Ay fun Neku nafili Elyakim, Yuakas at arian, laman talun Uda ay furuan Erusalem at fun, ay natubus at ngayan te, Yuyakim. Ay kanya nataban Yuakas sas talun Igiptu.

Yuyakim nu Gfunan Talun Uda

⁵ Yuyakim duak safulu e limak banwa gina gfasigad gfunan. Ay kanya gbanwan sis Erusalem, ay nu gfunan labi sadik banwa. Ay kanya nafakamulun at mauri sit Dius Yawi at daga salubangan.

⁶ Ay Nabukudunusur, Babilunya at fun, nanamawayan anya, ay nasiuk salambitan ay nataban sas Babilunya.

⁷ Ay Nabukudunusur nabuba yangay sas talun Babilunya tibak fagagbilugun sis Yawi at bale, ay nafasakbo sat bale.

⁸ Ay tiba ya at kinfasludan kaduge Yuyakim gfunan ay at ngay nafakamulun at maksvn nu mauri, anriruk sis fafil fagrirukan sabaliwas Uda ay Israel at ngay fun. Ay at baguama Yuyakin at natubus anya laman sik fun.

Yuyakin nu Gfunan Talun Uda

⁹ Yuyakin labi waluk banwa gina gfasigad gfunan. Ay kanya gbanwan sis Erusalem, ay nu gfunan tuluk magdanun ay safuluk menit. Ay mauri at nafakamulun sis Yawi at daga salubangan.

¹⁰ Ay gina gfasigad ginanya fag banwa, fun Nabukudunusur nataban Yuyakin sas talun Babilunya. Ay kanya nasugu sat ngay fagsuguan laman namul ngay fagagbilugun sis Yawi at bale, ay kanya nafili Sedekya Yuyakin at sai laman sik fun sas talun Uda ay furuan Erusalem.

Sedekya nu Gfunan Talun Uda

¹¹ Sedekya at banwa duak safulu e sadi gina gfasigad gfunan. Kanya gbanwan sis Erusalem ay nu gfunan labi sadik banwa.

¹² Sedekya at fakamulun mauri way sit Dius Yawi at daga salubangan, ay kanya wa nafamababaun sas Eremyas, Yawi at taglong.

¹³ Ay kanya dewa nafatuyanan sis Dius at daga salubangan te, wa ban kamabo fun Nabukudunusur, kanya nafamabo way. Sedekya nafamaogatun at amatanganan ay kanya wa kaylat kafoli ya sas Yawi ngay taw Israel at Dius.

¹⁴ Ay anggan fagayu tagfon fanggalangun ay fagayu taw Israel wa nafaning Dius. Kanya fagayu nafaning way tibak talun at ngay taw at ngay fakamulun at maksvn nu mauri, ay kanya fagayu nafasuya Yawi at bale, at nafili fag buknga at yud e malong sis Erusalem.

Erusalem nu Kaiklas

¹⁵ Yawi, kafag ngay taw at mangaguyang at Dius, gfakamatoan gugat anya fagayu, siginan at ngay taglong, aroro kanya kafanyu at bale ay kafag ngay taw.

¹⁶ Dewa katanya, kafag ngay taw nafalingun way Dius at ngay taglong, ay naase ay nafaeyud e masuad at ngay foyungan. Nu katanya, Yawi andotama anya fagayu, ay we mafaragang ya at dotama,

¹⁷ ay naylat ngay taw Babilunya nu namawayan anya fagayu. Ngay taw Babilunya gfabul kafag ngay taw at ngay baguama dewa sis Yawi at bale. Kanya fagayu we afanyu ya sas nusnga sinu fag taw, mangama ay mangena, ay at mafagtainan ay at mamomuy. Dius nafagbilug at ngay taw sas fun Nabukudunusur.

¹⁸ Ay Nabukudunusur nabuba wan sas talun Babilunya, fagayu fagagbilugun ay fagayu ramraman sis Dius at bale, ay nabuba yangay fun ay at ngay tagfakamulun at ngay ramraman.

¹⁹ Ay kanya fagayu nairug wan Dius at bale, ay narufa wan Erusalem at ngay alad. Ay nairug yangay anggan at mogat fag ngay afud furuan Erusalem, ay naiklas wan at mafanud fag ngay fagagbilugun.

²⁰ Ay Nabukudunusur nataban sas Babilunya at yud anbul fag ngay taw Israel, ay kanya talamean nafagsuguan kanya fagayu, ay talun Persya ansik mabalyanan.

²¹ Nu katanya, anfasludan Yawi at longan siginan at taglong Eremyas te, umsik mabaluanan ban at talun, ay kanya ban fag talun gfiangalay way kaduge fituk safuluk banwa.

Fun Sirus Nafafoli ngay Taw Israel sat Talun

²² Gina taguna fag banwa fun Sirus nu gfunan sis Persya, Yawi nafafasludan at longan at nalong sat taglong Eremyas. Ay kanya nafamatanganan Sirus laman kawat sik foyungan. Ay fun Sirus nariruk kafag foyungan, ay nafabuba sas fagdaul at fagfagtainanan.

²³ “Katatuy fun Sirus, talun Persya at fun, at longan: “Yawi, banwa at Dius, nafatigwanan wan sa angku fagayu fagfagtainanan sas fagdaul daga, ay nafatigwanan yangay sa angku laman nangawat at bale sis Erusalem tagsis talun Uda. Fagayu am Dius at ngay taw, afolii wan sa ay talun. Yawi ban nangus gufud ayu.”