2 Krunika 35 - Fanawbuid tagsibaliwas FakayabianUsyas Nafangguna ngay Taw sis Fagmafulun sabaliwa Tagbarita nu Glangfe 2Fn 23:21-23 1 Gina sis falabi ufatk menit gina taguna fag magdanun, fun Usyas nafangguna sik fagmafulun sis Erusalem sabaliwa Tagbarita nu Glangfe, laman gfauseganan Yawi. Kanya fagayu nafabul ngay fagbaugun laman sa kafag fagmafulun. 2 Ay Usyas nafon sa sangay tagfon fanggalangun at ngay fakamulun sis Yawi at bale, ay nafaksvn anya fagayu laman gfakamulun. 3 Ay kanya nafon yangay fakamulun sa sangay taw Lebi fag ngay takamoyung sis Erusalem, at nafili laman tagfakamulun sis Yawi at bale. Ay kanya nalong sa anya fagayu te, “Nafasakbo wan Fagsuadan Nasadian sas Yawi at bale, sis Sulumun, Dabid at baguama at nafawat, ay wa ban am namuba ya gugat. Nu katanya, fagayu buknga fakamuluni sa ay Dius Yawi, ay sat ngay taw Israel. 4 Fakamuluni ay ngay fakamulun sis Yawi at bale, sas galay ay mesa gaban talanan. Faningi Dabid, Israel at fun ay at baguama Sulumun at nariruk fag faugali. 5 Ay galay ay gaban talanan namakamulun am ay fakamulun sas Yawi at bale, nanggubuk am at nafatigwanan sa ayu fag ngay talanan nu gfon at ngay fanggalangun. 6 Fasinei ay ngay sadili ay falganani nu namakamulun am laman sa ay ngay kaiban. Ay namilas am ngay tupa ay ngay kambing laman sas fagmafulun sabaliwa Tagbarita nu Glangfe. Faningi Yawi at suguan, Muisis at nalong sa ayu.” 7 Ay Usyas nafon tuluk safuluk libuk tupa ay kambing, ay tuluk libuk baka, laman ngay taw at fanggalangun gina maful sabaliwa Tagbarita nu Glangfe. 8 Ay anggan at ngay tagfakamulun nafon yangay at ngay fagbaugun sa sangay taw, sa sangay tagfon fanggalangun, ay sa sangay taw Lebi. Ay Kilkya, Sakaryas, ay Eyel fag ngay tagfangguna sis Yawi at bale, nafon yangay sa tiba yak tagfon fanggalangun, duak safuluk libu, unumk sandank tupa ay kambing, ay tuluk sandank baka, laman at fanggalangun ginanya fag fagmafulun. 9 Ay Kunanya, ngay taw Lebi at tagfangguna, ay at ngay faduksay Semaya, Netanel, Kasabya, Eyel, ay Usabad, nafon sat kaiban fag ngay taw Lebi, limak libuk tupa ay kambing, ay limak sandank baka, laman at fanggalangun ginanya fag fagmafulun. 10 Ay nu mafalganan wan fagayu laman sas fagmafulun, ngay tagfon fanggalangun ay ngay taw Lebi nalao sas Yawi at bale laman namakamulun at ngay mesa fakamulun sas galay at gaban, kata at fun at suguan. 11 Ay ngay taw Lebi nafabul ngay tupa ay ngay kambing, ay nafon sa sangay tagfon fanggalangun kafag ngay fagbaugun at taguk. Ay ngay tagfon fanggalangun nafaramsig kafag taguk sas fagirugan fanggalangun, gina ngay taw Lebi gbul ngay fagbaugun at balat. 12 Sanya ginan, kanya fagayu nafon sa sangay taw sas galay sik gaban talanan, ngay fagirugun fag fanggalangun laman namon sas Yawi, kata at marirukan sis Muisis at fafil. Ay katanya yangay at nafakamulun sa sangay baka. 13 Ay kanya fagayu nasugba ngay fagbaugun laman sa kafag fagmafulun, kata at marirukan sis suguan, ay nafatama sa sangay bisu ay sa sangay awali at mafalganan fag afud fanggalangun, ay nu ntama wan kanya fagayu nafon wa vtv sa sangay taw. 14 Ay ngay taw Lebi nafalganan yangay ngay fakonun laman at fakonun ay ngay tagfon fanggalangun at fakonun, aroro Arun at kasugfunanan fag ngay tagfon fanggalangun we buknga ya gfalganan at fakonun, kanya fagayu girug gugat ngay fagirugun fag ngay fanggalangun ay ngay fagbaugun at taba, dewa gakadulumun wan. 15 Ay Asaf at kasugfunanan fag ngay tagsaful galubad si tua gugat Yawi at bale, kata Dabid ay Asaf, Eman, ay Edutun fun at taglong at ngay faugali. Ay fagayu tagulit sakbawan si way gugats sakbawan, aroro at kalongan fag ngay taw Lebi gfalganan tua at ngay fakonun. 16 Ay ginanya fag menit antabu wan at fagmafulun sabaliwa Tagbarita nu Glangfe, laman gfauseganan Yawi, ay antabu yangay nu gfon sas Yawi ngay fagirugun fag ngay fanggalangun, kata Usyas at suguan. 17 Ay ngay taw Israel at kinful maful sabaliwa Tinapay at yud e Famabia, kaduge fituk menit. 18 Ya batang e fagmafulun takatanya siginan ebi Samwel fag taglong at buknga. At naguna fag ngay fun wa batang ya kaful laman gamatangan Tagbarita nu Glangfe, kata Usyas, ay ngay tagfon fanggalangun, ngay taw Lebi, ngay taw Erusalem ay tagsanya fag ngay taw Uda ay ngay taw Israel. 19 Ngay taw anful sabaliwa Tagbarita nu Glangfe gina sis falabi waluk banwa fun Usyas nu gfunan. Usyas nu Kabul 2Fn 23:28-30 20 Ay Usyas nu nafatabu wan at ngay fakamulun sis Yawi at bale, fun Neku, Igiptu at fun, nafangguna at ngay tagfawayan laman namawayan sas Karkemis, sas Liskung Eufrates. Ay Usyas nalao yangay sanya laman namawayan fun Neku. 21 Ay fun Neku nasugu sas Usyas sik ngay tagfosuk longan laman nanlong te, “Fun Usyas, nataw am fakasalagun? Bunwa o ku fagnamawayanun, ku fagnamawayanun at nafawayan way angku fag talun. Ay Dius nalong angku te, ‘Fasakiti nu gfawayan o.’ Nu katanya, lag o gfawayan angku aroro Dius gufud angku, ay mafaurianan emu.” 22 Dewa katanya, Usyas wa nafabali ya at amatanganan, kanya nafataglayun at algan nu namawayan. Kanya wa nafaning Dius at longan siginans Neku. Nu bunway, kanya nalao sas datag Megidu laman namawayan Neku. 23 Ay tagsaful gfatos banyas nafana Usyas ay kanya anke fakarukan. Ay kanya nalong sat ngay fun tagfawayan te, “Fayayui angku ste ginan, aroro maksvn wan ku natayukan.” 24 Nu katanya, kanya fagayu nabul anya siginan at faguyudan fangawayan ay nafauli sas Erusalem. Ay kanya anbul sis Erusalem ay nanamoli anya sit ngay mangaguyang at fagfolian. 25 Ay Eremyas nawat sik ngay alubad sabaliwa nu kabalu Usyas, ay dasug katsi ngay tagsaful galubad, galubad laman gamatang anya. Ngay taw Israel galubad gugat takatanya fag alubad. Ay kafag ngay alubad marirukan sis fafil sabaliwa nu kabalu. 26-27 Ay tiba ya at kinfasludan kaduge Usyas gfunan, siginan nu gfasigad sitsigons fakatabuan, anriruk sis fafil sangay fansulitan sabaliwa Israel ay Uda at ngay fun. Ay marirukan yangay sanya sabaliwa Usyas nu kesug Yawi, siginan nu gfaning at ngay suguan. |
Copyright © 2021 by OMF International, Philippines
OMF International