2 Krunika 32 - Fanawbuid tagsibaliwas Fakayabian

Talun Asirya Nanamawayan Talun Uda

¹ Ay Esekyas nu nafakamulun wan takatanya siginan at fagmatuyanun sas Dius, fun Senakerib, Asirya at fun, nanamawayan talun Uda. Kanya ay at ngay tagfawayan naligung sat ke ngay alad fag ngay furuan, aroro kanya gamatangan te, magbilug ban kanya fag ngay furuan.

² Ay fun Esekyas nu nalag te, Senakerib namawayan wan furuan Erusalem,

³ kanya nafakamatoan at ngay tagfangguna ay at ngay fun tagfawayan. Ay kanya fagayu ansadi laman namaragang tagsis day furuan daul fag bulbug nu gfamilugan.

⁴ Nu katanya, kanya fagayu nafaful ngayuk taw, ay natabun ngay bulbug ay ngay datag fagfamiluganan mamam sanya fag daga. Aroro kanya fagayu glong te, “Asirya ban at fun nu ndasug stae kamin ban at fanginum.”

⁵ Sanya ginan, Esekyas nafaogat yay at furuan alad, ay nafawat at fagulitan fag ngay bale ngabat. Ay kanya nafalanib yay kafag furuan at alad, ay nafabungsud lutuk sas galay datag tagsis Dabid at furuan daul. Ay kanya nafawat yangay ngayuk famawayan ay ngay famalabag.

⁶ Ay kanya nafili laman tagfangguna ngay taw, ay nafaful kanya fag ngay taw sis fagaweanan munakbang sis furuan daul at sakbawan. Ay kanya nafaksvn kafag ngay taw at amatanganan, ay nalong te,

⁷ “Faksvni ay amatanganan ay maseganamai. Lag am kalimu ay kamomuy aroro sas Asirya at fun ay sat ngay tagfawayan ngayu. Aroro tagulit antam amabalyanan yap tua tagulit anya fagayu.

⁸ Tagufud anya ngay taw way, dewa katanya tagufud antam Yawi tua at mabalyanan fag Dius. Kanya taggubuk antam ay at namawayan laman sa antam.” Nu katanya anbitsug kafag ngay taw at amatanganan siginan Esekyas, Uda at fun, at nalong.

⁹ Ay gina fun Senakerib ay at ngay tagfawayan maligung furuan Lakis, kanya nasugu at ngay tagfangguna sas Erusalem laman nanlong at kinfasludan sas fun Esekyas ay sa sangay taw sanya.

¹⁰ Katatuy Senakerib, Asirya at fun at longan, “Nataw ya nunda ay fagsegun, ay fagsanyaun yay gugat si ay furuan Erusalem dewa mi naligung wan ayu?

¹¹ Esekyas nalong ayu te, ay Dius Yawi gfalangfe ayu sas Asirya at fun, kanya gfalyam way ayu laman kabul am sas lunus ay sas danum.

¹² O nunda bunwa Esekyas at naiklas ngay fagnansegan Yawi sas tangabat fag ngay buknga, ay anggan ngay fagnangirugan? Ay kanya nasugu sa ayu fag ngay taw tagbanwan sis talun Uda ay sis Erusalem te, ‘Nu gseg am, sa yakman Erusalem fag fagirugan ay nangirug am sanya ay ngay fanggalangun.’

¹³ Nasaful wam ku nafakamulun ay ku ngay mangaguyang at ngay nafakamulun sa tibak talun at taw. O nunda kanya fag ngay taw at ngay dius nafalangfe anya fagayu siginan nu gfaurianan au anya fagayu?

¹⁴ Fagayu ku nababo fag ngay fagsegan sas fagayu talun we nafalangfe at ngay taw. O nunda ro ay fagsegan mafalangfe ayu sa nu namaurianan au ayu?

¹⁵ Lag am galukan Esekyas. Lag am gafanud anya, aroro sas fagayu talun ay sas fagayu fagfunanan at ngay dius we mafalangfe at ngay taw siginan ku daluap ay ku ngay mangaguyang at daluap. Ay kaugat wa ro ay dius!”

¹⁶ Ay Senakerib at ngay tagfangguna nalong at mauri sas Yawi Dius ay sat fagsuguan Esekyas.

¹⁷ Ay Senakerib nariruk laman gfalingun Yawi, ngay taw Israel at Dius. Kata tuy at rirukan: “Tibak talun at ngay fagsegan wa mafalangfe at ngay taw siginan ku fagmabalyananun. Nu katanya, anggan ro Esekyas at Dius wa mafalangfe at ngay taw siginan ku fagmabalyananun.”

¹⁸ Ay Senakerib at ngay tagfangguna nafabia nu glong kanya fag longan sas Ebreu fag fangaringang laman gfalimu ngay tagbanwan sis Erusalem at maful sis day alad. Ay laman ngay taw nu nlimu, kanya fagayu magbilug wan kafag furuan daul.

¹⁹ Ay at ngay tagfangguna nafalingun Erusalem at Dius, kata nu gfalingun tibak talun at ngay fagsegan ngay taw at nawat.

²⁰ Ay fun Esekyas ay taglong Isayas, Amus at baguama, nadarangin sas Dius tagsis banwa.

²¹ Nu katanya, Yawi nafadasug at tagbarita laman namabul Asirya at ngay tagfawayan at maseganama ay at ngay fun tagfawayan ay at ngay tagfangguna. Ay fun Senakerib kapla maksvn ay noli wan. Ay kanya nu nasakbo sat fagsegan at bale, at ngay baguama nafabul anya siginan sik fiso tagsumbalian at uyup.

²² Nu katanya, Yawi nafalangfe Esekyas ay ngay taw tagbanwan sis Erusalem sas fun Senakerib at fagmabalyananun ay sas fagayu at fawayan.

²³ Ay ngayuk taw at nabuba at ngay fanggalangun sas Erusalem laman sas Yawi. Ay kanya fagayu nafadasug yangay sas fun Esekyas at mafilian fag ngay famonun. Ay siginan ginanya fagayu talun gfauseganan fun Esekyas.

Esekyas anke Fakasaitun

²⁴ Ginanya, Esekyas anke fakasaitun ay arvs anbul wan. Ay kanya nadarangin sas Yawi, ay Yawi nafasure sa anya sik fagtoglagan te, kafia yay ban.

²⁵ Dewa katanya, Esekyas nafamatungudun, ay wa namatang Yawi at nafakamulun sa anya at masine. Nu katanya, Yawi andotama anya ay ngay taw Uda ay fagayu taw tagbanwan sis Erusalem.

²⁶ Ay Esekyas naubun at fakamatungudunun, ay katanya yangay anggan ngay taw Erusalem. Nu katanya, Yawi wa nafadasug at dotama kaduge Esekyas gleleg.

²⁷ Esekyas maramraman ay sik takadungug. Kanya nafawat at fagfungsuan laman sat ngay salapi, gintu, at mafanud fag ngay gang, ngay famaenamnam, ngay famalabag, ay tiba yak fagagbilugun at mafanud.

²⁸ Ay kanya nafawat yangay at fagsuadan at ngay trigu, ay at fagsuadan wat ubas at mamam ay langis. Ay nafawat yangay at fagfasakboan at ngay fagbaugun,

²⁹ aroro ngayu at fagbaugun. Ay kanya nafawat yangay ngayuk furuan, aroro Dius nafon anya ngayuk ramraman.

³⁰ Esekyas wan at nasugu laman gfae famalabag ngay fagfamiluganan mamam tagsiginans Gikun fag bulbug tagfamilugan sas fun Dabid at furuan daul. Ay kanya nakatu tua gfakamulun fagayu at fakamulun.

³¹ Dewa katanya, Dius nafaskud anya, gina ngay tagfangguna andasug siginans Babilunya, laman at nanginsaful sabaliwa at kinfasludan sas talun Uda at maksvn nu madulo. Dius nafakamulun takatanya laman ginsaful Esekyas at namatangan.

At Fakatabuan Esekyas nu Gfunan

³² Ay tiba ya at kinfasludan kaduge Esekyas gfunan, ay nu kesug Yawi, anriruk sis taglong Isayas, Amus at baguama at fagrirukan takafasludan ban, sis fafil fagrirukan sabaliwas Israel ay Uda at ngay fun.

³³ Ay Esekyas nu nbul wan, nanamoli anya si tiba tungud fag fagfolian Dabid at ngay kasugfunanan. Ay fagayu taw Uda ay taw Erusalem nafauseganan anya. Ay at baguama Manase at natubus anya laman sik fun.