2 Krunika 30 - Fanawbuid tagsibaliwas Fakayabian

Nu Gfalganan Fagmafulun sabaliwa Tagbarita nu Glangfe

¹ Esekyas nafabuba sik rirukan sas fagayu taw Israel ay taw Uda, ay anggan sa sangay taw Efraim ay Manase. Kanya nalong sa anya fagayu te, “Afuli sas Yawi at bale, laman sas fagmafulun baliwa Tagbarita nu Glangfe, laman gfauseganan Yawi, ngay taw Israel at Dius.”

² Fun Esekyas ay at ngay tagfangguna, ay anggan fagayu taw tagbanwan sis Erusalem ansadi te, nanmaful ban sabaliwa Tagbarita nu Glangfe galay sis faduak magdanun.

³ Kanya nangus fag fagmafulun gina way taguna fag magdanun, dewa katanya, ginanya fag buknga wa ngayu at ngay tagfon fanggalangun at nafasine at ngay sadili, ay ngay taw wa yangay anful sas Erusalem.

⁴ Kanya fag fun ay anggan ngay taw naylat nu nanmaful sabaliwa kanya fag fagmafulun.

⁵ Nu katanya, kanya fagayu nafadasug sik longan sas fagdaul talun Israel, siginans furuan Beerseba sitsigons talun Dan, ay glong te, “Afuli sas Erusalem, laman namauseganan Yawi, ngay taw Israel at Dius, siginan sik fagmafulun sabaliwa Tagbarita nu Glangfe.” Ebi ginan, wa ngayu at nanangaful, dewa marirukan sit Faugali te, fagayu taw, afuli.

⁶ Ay kata fun at suguan, ngay taw tagfosuk longan nalao sas fagdaul talun Israel ay Uda, gbuba fun ay at ngay tagfangguna at rirukan. Katatuy at rirukan: “Ngay taw Israel, anlangfe tuam siginan sangay taw Asirya at fun, nu katanya, katsi wan at buknga nu kafoli am sas Yawi, ay ngay mangaguyang, Abrayam, Isak, ay Akub at Dius, laman kanya kafoli yangay sa ayu.

⁷ Lag am gfaning ay ngay mangaguyang ay ay ngay kalongan at yud matuyan sat Dius Yawi, ay siginan takatanya Yawi nafaurianan anya fagayu kata ay nalag katsi.

⁸ Nu katanya, lag am kamaogatun ay ngay amatanganan, kata ay ngay mangaguyang, nu bunway faningi tua Yawi. Nangaful am sas Dius at nafili fag bale, ay namakamulun am sa ay Dius Yawi, laman kanya gfalyam wan nu kadotama ayu maksvn.

⁹ Nu nfoli tua ban am sas Yawi, ngay taw ban at nataban ay ngay sisian ay ay ngay kalongan, gfafoli yay anya stae sa ay talun. Aroro ay Dius Yawi, mafanggubuk tua ay mafangafanyu. Kanya ban wa gtalyuyan ayu nu nfoli tua ban am sa anya.”

¹⁰ Ngay tagfosuk longan nalao sa sangay furuan tagsis Efraim, Manase, ay sitsigons Sebulun, ay ngay taw naase way ay nafalingun anya fagayu.

¹¹ Dewa katanya, e ngay taw tagsiginans Aser, Manase ay Sebulun at nafamababaun ay nalao sas Erusalem.

¹² Dius nafamatangan yangay ngay taw Uda, laman namakamulun yangay fun ay at ngay tagfangguna at suguan kata Yawi at suguan.

¹³ Nu katanya, gina sis faduak magdanun ngayu at nanangaful sas Erusalem, laman nanguseganan sabaliwa Tinapay at yud e Famabia.

¹⁴ Kanya fagayu naiklas wan fagayu fagirugan fanggalangun ay famaebebanglu fag lune laman sa sangay fagsegan, ay naukas wan sas Liskung Kidrun.

¹⁵ Ay gina sis falabi ufatk menit sis faduak magdanun, ngay taw nafabul wan at ngay buba fag ngay tupa laman sas fagmafulun sabaliwa Tagbarita nu Glangfe. Ay ngay tagfon fanggalangun ay ngay taw Lebi at yud nafasine at ngay sadili ankapla, nu katanya, kanya fagayu nanamasine at ngay sadili, ay nabuba at fagirugun fag ngay fanggalangun sas Yawi at bale.

¹⁶ Sanya ginan, kanya fagayu nasat mesa fakamulun sis Yawi at bale, kata at marirukan fag Faugali Dius at nafon sat fagsuguan Muisis. Ngay tagfon fanggalangun nafaramsig sas fagirugan fanggalangun ngay taw Lebi at nafon sa anya fagayu fag taguk.

¹⁷ Ngayuk taw at yud nafasine at ngay sadili, ay ngay taw Lebi way at nafabul ngay tupa laman sa anya fagayu, laman kanya fag ngay taw mafon at ngay fanggalangun sas Yawi.

¹⁸ Ngayuk taw tagsiginans Efraim, Manase, Isakar, ay Sebulun yud nafasine at ngay sadili, ay kanya fagayu naon yangay at ngay fanggalangun laman sa Tagbarita nu Glangfe, dewa gsalan kata at suguan. Dewa katanya, Esekyas nadarangin sas Yawi laman sa kanya fag ngay taw te, “Yawi falyami ngay taw at fagmauriun,

¹⁹ takaylat kakbang sa emu, Yawi, at ngay mangaguyang at Dius, kanya fagayu dewa yud nafasine at ngay sadili kata ngay faugali sis Yawi at bale.”

²⁰ Ay Yawi nadungugan tua Esekyas at darangin, ay kanya nafalyam tua ngay taw at fagmauriun.

²¹ Ay kaduge fituk menit ngay taw Israel tagsis Erusalem guseganan maful sabaliwa Tinapay at yud e Famabia. Ay galay menit ngay taw Lebi ay ngay tagfon fanggalangun galubad laman gfauseganan Yawi, ay kanya fagayu gfawang ngay budyung tagbia nu gawang, at fagfawangun gina gfauseganan Yawi.

²² Esekyas nafauseganan ngay taw Lebi, aroro kanya fagayu matuyan tua nu gfakamulun laman sas Yawi. Ay kanya fagayu nafataglayun nu maful kaduge fituk menit. Ay naon at afud tagsiginans fanggalangun, ay nafon at fanggalangun laman sas fagmanabayanun, ay kanya fagayu naseg Yawi, at ngay mangaguyang at Dius.

²³ Ay ngay taw nu gfataglayun yay nu maful kaduge fituk menit. Ay kanya fagayu nauseganan nafakamulun.

²⁴ Fun Esekyas nafon sa sangay taw sadik libuk baka tama, fituk libuk tupa ay kambing. Ay anggan at ngay tagfangguna nafon yangay sadik libuk baka tama, ay safuluk libuk tupa ay kambing. Ngayu tagfon fanggalangun at nafasine at ngay sadili.

²⁵ Ngay taw Uda maful guseganan, gasfuan ngay tagfon fanggalangun, ngay taw Lebi, ay fagayu at maful tagsiginans Israel, anggan ngay taw tagsiginans tibak talun tagbanwan sis Israel ay sis Uda.

²⁶ Maksvn nu guseganan sis Erusalem, ya batang kaksvn nya, dewa ebi gina fun Sulumun, Dabid at baguama, gfunan sis Israel.

²⁷ Sanya ginan, ngay tagfon fanggalangun ay ngay taw Lebi anlindug, ay nafadante ngay taw. Ay Dius nadungug kanya fag ngay taw at darangin.