2 Krunika 29 - Fanawbuid tagsibaliwas Fakayabian

Esekyas nu Gfunan Talun Uda

¹ Esekyas at banwa duak safulu e lima gina gfasigad gfunan. Ay kanya nabanwan sis Erusalem, ay nu gfunan duak safulu e siamk banwa. At mina Abya, Sakaryas at baguina.

² Esekyas nafakamulun at matuyan sis Yawi at daga salubangan, kata at mangaguyang Dabid.

³ Ay gina taguna fag magdanun nu gfunan, kanya naluang ay nafasine Yawi at bale at ngay sakbawan.

⁴ Ay kanya nafauro ngay tagfon fanggalangun ay ngay taw Lebi, ay nafaful sis Yawi at bale at basad alad, sabaliwas fakamenitan.

⁵ Ay kanya nalong sa anya fagayu te, “Lebi at ngay kasugfunanan, dungugani angku. Katsi fasinei ay ngay sadili, ay namasine yangay am Yawi, ay ngay mangaguyang at Dius, at bale.

⁶ Tam ngay mangaguyang wa namatuyan. Kanya fagayu mauri way at nafakamulun sat Dius Yawi at daga salubangan, siginan nu kamabo anya. Ay kanya fagayu wa nalaga Dius at bale, ay nafamabo ya anya.

⁷ Ay kanya fagayu nadingding ngay sakbawan tagsis Yawi at bale at tangbi, ay nafarabung ngay salung. Ay wa girug ya ngay famaebebanglu fag lune, ay ngay fagirugun fag ngay fanggalangun, sas fagirugan sis Yawi at bale, laman sa sangay taw Israel at Dius.

⁸ Nu katanya, Yawi andotama ngay taw Uda ay ngay taw Erusalem. Kanya nafaurianan antam, ay katsi tibak taw kadulo at kindasug sa antam, ay gfalingun, ay gsaruyan way antam.

⁹ Tam ngay mangaguyang anbul sas awayan, ay tam ngay fawayan nataban tam mangena ay tam ngay sisian.

¹⁰ Dewa katanya, katsi kaylat au nangawat sik nasadian sas Yawi, ngay taw Israel at Dius, laman kanya gfalyam wan nu kadotama antam.

¹¹ Nu katanya, ku fakesugun fag ngay taw, lag am gragangan. Am wan Yawi at nafili at nanmalindug sit daga salubangan, laman at tagfakamulun, ay at nangirug ngay fanggalangun.”

¹² Nu katanya, ngay taw Lebi nafasigad gfakamulun. Ay at nafili: tagsiginans Kuat fag talanan, Makat, Amasay at baguama, ay Uel, Asarya at baguama. Ay siginans Merari fag talanan, Kis, Abdi at baguama, ay Asarya, Ealelel at baguama. Ay siginans Gersun fag talanan, Ua, Sima at baguama ay Eden, Ua at baguama.

¹³ Ay siginan Elisafan fag talanan, Simri ay Eyel. Ay siginans Asaf fag talanan, Sakaryas ay Matanya.

¹⁴ Ay siginans Eman fag talanan, Eyel ay Simei. Ay siginans Edutun fag talanan, Semaya ay Usyel.

¹⁵ Ay kanya fag ngay taw Lebi nafaful at ngay kalongan, ay nafasine at ngay mesa sadili. Ay kanya fagayu nafasine yangay Yawi at bale, kata at fun at suguan. Kanya fagayu nafaning Yawi at suguan.

¹⁶ Ngay tagfon fanggalangun nasakbo sas Yawi at bale laman namasine. Ay kanya fagayu nafaduksun fagayu fagagbilugun at natuyan te, mauri. Ay ngay taw Lebi nabuba kanya fag ngay fagagbilugun sas Liskung Kidrun.

¹⁷ Kanya fagayu nafasigad nu gfasine Yawi at bale, gina taguna fag menit gina yangay taguna fag magdanun, ay nu siwas fawaluk menit kanya fagayu andasug sas Yawi at bale at tangbi. Ay kanya fagayu nafataglayun yay nu gfasine Yawi at bale, walu ya fiak menit, ay sis falabi unumk menit ginanya yangay fag magdanun, antabu wan nu gfakamulun.

¹⁸ Sanya ginan, kanya fagayu nalao sas fun Esekyas ay nalong te, “Mesug fag fun, antabu wan nu gfasine ami Yawi at bale, anggan fagirugan ngay fanggalangun ay fagayu at fagagbilugun sanya, ay anggan fagfatungkudan fanggalangun fag tinapay ay fagayu fagagbilugun sanya.

¹⁹ Ay nafafoli tuami fagayu fagagbilugun fun Akas at nabul, gina kanya nafamabo Dius. Nafasine wami kanya fag ngay fagagbilugun, ay katsi masine wan. Ay kanya fag ngay fagagbilugun siwas salubangan fagirugan fanggalangun sas Yawi.”

²⁰ Ay balabag di sbalabag, fun Esekyas nafaful at ngay tagfangguna at furuan, ay nalao sas Yawi at bale.

²¹ Ay kanya fagayu nataban fituk tama baka, fituk tama tupa, fituk riangan tupa, ay fituk tama kambing, laman at fanggalangun famalyam fagfagtainanan at asalanan, ay sas Dius at bale, ay sa sangay taw Uda. Ay fun Esekyas nasugu sas Arun at ngay baguama fag ngay tagfon fanggalangun laman nangirug kanya fag ngay fanggalangun sas Yawi.

²² Nu katanya, ngay tagfon fanggalangun nafabul kanya fag ngay fagbaugun ay nafaramsig sas fagirugan ngay fanggalangun. Ay katanya yangay at nafakamulun sa sangay tupa tama ay tupa riangan.

²³ Ay ngay tagfon fanggalangun nabuba sas fun ay sa sangay taw at daga salubangan at fanggalangun fag kambing laman famalyam asalanan, ay kanya fagayu nafasas tungud kambing at alfuyu at ngay daluap.

²⁴ Sanya ginan, ngay tagfon fanggalangun nafilas kanya fag ngay kambing ay nabusbus at ngay taguk sas fagirugan fanggalangun laman famalyam ngay taw Israel at ngay asalanan. Aroro at fun nasugu te, irugi fagirugun fag fanggalangun ay famasine fag fanggalangun laman sa sangay taw Israel.

²⁵ Ay fun Esekyas nafili ngay taw Lebi laman tagfawang fagfadkalinganun ay ngay fagfawangun ke ngay bakyang sis Yawi at bale. Kata Yawi at suguan sas fun Dabid, siginans Gad ay Natan fag ngay taglong.

²⁶ Ay ngay taw Lebi mafalganan laman namawang Dabid at ngay fagfawangun, ay anggan ngay tagfon fanggalangun mafalganan yangay laman namawang at ngay budyung.

²⁷ Ay Esekyas nasugu te, irugi sas fagirugan fagirugun fag ngay fanggalangun. Ay gina ngay tagfon fanggalangun girug, ngay taw galubad gfauseganan Yawi, ay gfasfuan gfawang ngay budyung ay tiba yak fagfawangun, Dabid, Israel at fun, at ngay fagagbilugun.

²⁸ Ay fagayu taw Israel natudan laman gseg Yawi, gina at nafili fag ngay taw galubad, ay gina tagfawang budyung gfawang ngay budyung, yakmay nairug fagayu fagirugun fag ngay fanggalangun.

²⁹ Ay nu nairug wan at ngay fanggalangun, fun Esekyas ay at ngay fadgaloan naseg Yawi.

³⁰ Ay fun Esekyas ay at ngay tagfangguna nasugu ngay taw Lebi laman gfauseganan Yawi, siginan nu galubad fun Dabid ay Asaf fag taglong at nawat fag ngay alubad. Nu katanya, kanya fagayu galubad famauseganan fag ngay alubad kaduge garungan gseg Dius.

³¹ Sanya ginan, Esekyas nalong sa sangay taw te, “Katsi nafatigwanan wam sas Yawi ay ngay sadili, nu katanya, namuba am sas Yawi at bale ay mesa fanggalangun, anggan ay ngay fanggalangun sa nu gfauseganan am Yawi.” Nu katanya, kafag ngay taw nabuba at ngay fanggalangun ay at ngay famonun laman gfauseganan Yawi, ay tibak taw nabuba at yud fabulunan fag ngay fagirugun fag fanggalangun.

³² Ay nu fagayu wan ngay taw at nabuba fag fagirugun fag fanggalangun: fituk safuluk baka tama, ay sadik sandank tupa tama, ay duak sandank tupa riangan.

³³ Ay kanya fagayu nabuba yangay tiba yak fanggalangun: unumk sandank baka tama, ay tuluk libuk tupa ay kambing.

³⁴ Dewa katanya, kurang yay ngay tagfon fanggalangun tagfilas kafag ngay fagirugun fag fanggalangun. Nu katanya, at ngay kalongan fag ngay taw Lebi nagubuk anya fagayu yakmay antabu at fakamulun, ay anfamut yay ngay taw Lebi at nafasine at ngay sadili. Aroro ngay taw Lebi amatuyan yap tua ngay tagfon fanggalangun nu gfasine at ngay sadili.

³⁵ Ngayu at fagirugun fag ngay fanggalangun, gasfuan taba siginan at ngay fanggalangun laman sas fagmanabayanun, ay ngay fanginum fag ngay fanggalangun at nafasfuan gfon gina namon at fagirugun fag fanggalangun. Nu katanya, anfoli yay ngay fakamulun sis Yawi at bale.

³⁶ Maksvn Esekyas ay ngay taw nu guseganan, aroro Dius nagubuk tua anya fagayu, nu katanya masakit tua at ngay fakamulun nu katabu.