2 Krunika 27 - Fanawbuid tagsibaliwas Fakayabian

Utam nu Gfunan Talun Uda

¹ Utam duak safulu e limak banwa gina gfasigad gfunan, ay kanya nabanwan sis Erusalem, ay nu gfunan labi unumk banwa. At mina Erusa, Saduk at baguina.

² Ay Utam at nafakamulun matuyan tua sis Yawi at daga salubangan, kata at mama Usya at nafakamulun. Kanya amatuyan yap tua at mama aroro kanya di nke asalanan siginan nu girug famaebebanglu sis Yawi at bale kata at mama at nafakamulun. Ay Utam dewa gfakamulun at matuyan, ngay taw gfataglayun way nu gfakamulun at mauri.

³ Ay Utam wan at nafawat sakbawan tagsibaliwas alvngvdan Yawi at bale, ay at nafawat yangay Erusalem at alad gang tagsis buksul Ufel.

⁴ Ay kanya yangay at nafawat ngay furuan sis Uda at fagagbilugun fag ngay buksul, ay at nafawat ngay alad gang ay ngay bale ngabat fagulitan, sa sangay sad araw.

⁵ Ay Utam nafawayan ngay taw Amun ay kafag ngay taw at fun, ay kanya nababo anya fagayu. Ay ginanya yangay fag banwa ngay taw Amun nafon sa anya fagayu: tuluk libu limak sandank fabudbungguan salapi, ay tuluk safuluk libuk saku trigu, ay tuluk safuluk libuk saku barli. Kanya fagayu nafakamulun takatanya kaduge tuluk banwa.

⁶ Ankaksvn yay Utam nu mabalyanan, aroro kanya gfaning tua at Dius Yawi.

⁷ Ay tiba ya at kinfasludan kaduge Utam gfunan ay nu namawayan, ay tiba ya at nafakamulun anriruk sis fafil fagrirukan sabaliwas Israel ay Uda at ngay fun.

⁸ Ay Utam duak safulu e limak banwa gina gfasigad gfunan, ay kanya nabanwan sis Erusalem, ay nu gfunan labi unumk banwa.

⁹ Ay Utam nu nbul wan, nanamoli anya sis Dabid at furuan. Ay at baguama Akas at natubus anya laman sik fun.