2 Krunika 25 - Fanawbuid tagsibaliwas Fakayabian

Amasya nu Gfunan Talun Uda

¹ Amasya duak safulu e limak banwa gina gfasigad gfunan. Ay kanya gbanwan sis Erusalem, ay nu gfunan duak safulu e siamk banwa. At mina Yuadin, sik taw Erusalem.

² Masine Amasya at nafakamulun sis Yawi at daga salubangan, dewa katanya, kanya wa fia nafaning Yawi.

³ Ay nu maksvn wan Amasya nu gfunan kanya nafabul ngay tagfangguna at nafabul at mama.

⁴ Dewa katanya, kanya wa nafabul kafag ngay tagfangguna at ngay sisian, kata Yawi at nasugu sit faugali at marirukan sis Muisis at fafil te, “Lag gfabul sik fagtainan aroro sat ngay sisian at asalanan, ay lag yangay gfabul sik sisian aroro sat fagtainan at asalanan. Fabuli sik taw aroro sat sadili asalanan.”

⁵ Amasya nafaful at ngay tagfawayan fag ngay taw Uda ay fag ngay taw Benamin. Ay kanya nafasadsamanan galay sik mesa talananan, ay nafili at ngay mesa tagfangguna sas galay sadik libu ay sadik sandan. Ay kanya natap at ngay tagfawayan tagduak safuluk banwa sat tungud baliwa ay nu fagayu wan tuluk sandank libu. Kanya fag ngay tagfawayan mafananadan gagbilug bangko ay famalabag.

⁶ Ay kanya nataban yangay sadik sandank libuk tagfawayan siginans Israel, ay nafon sa kafag ngay tagfawayan tuluk libu limak sandank fabudbungguan salapi.

⁷ Ay Dius at fagsuguan at sadi nalao sas Amasya ay nalong te, “Mesug fag fun, lag o gtaban ngay taw Israel at ngay tagfawayan, aroro Yawi wa gufud ya kanya fag talun. Yawi wa ggubuk ya ngay taw Efraim.

⁸ Nu nataban way ban o anya fagayu sas fagawayanan, gababawan way ban am, dewa ban maseganama nu gfawayan am. Dius way lang at nafababo ay at mafababawan ayu.”

⁹ Ay Amasya nalong sas Dius at fagsuguan te, “Ay setain way ban ku nafon sa anya fagayu fag tuluk libu limak sandank fabudbungguan salapi?” Ay Dius at fagsuguan nabalus anya te, “Ayu yap tua ban kanya Yawi at fon emu.”

¹⁰ Nu katanya, Amasya nafauli wan ngay taw Efraim fag ngay tagfawayan. Ay kanya fagayu guli wan kadotama maksvn talun Uda.

¹¹ Ay Amasya maseganama gfangguna at ngay tagfawayan ay nansas datag Barara, ay kanya fagayu nafabul sanya safuluk libuk tagfawayan Amun.

¹² Ay kanya fagayu nagamat yay sadik safuluk libuk tagfawayan, ay nataban sa sik tangrawan ay nafatong sanya, ay kanya fag ngay tagfawayan at ngay bini an-gatvng.

¹³ Ay Amasya at nafauli fag ngay tagfawayan at yud nataban nanamawayan talun Uda siginans furuan Samarya, sitsigons furuan Bet-Kurun. Ay kanya fag ngay tagfawayan nafabul tuluk libuk taw ay ngayu at nabul ngay fagagbilugun.

¹⁴ Ay Amasya nu guli wan siginan nu namawayan ngay taw Amun, kanya fagayu nabuba wan ngay taw Amun at ngay fagsegan. Ay kanya natuyan te, kanya wan at dius, ay naseg ay nafon at ngay fanggalangun sa anya.

¹⁵ Siginan takatanya, Yawi maksvn nu kadotama Amasya. Ay nasugu at taglong sas Amasya ay nalong te, “Wain am fagnasegun sa kafag ngay fagsegan at yud mafalangfe at ngay taw siginan emu?”

¹⁶ Ay gina kanya fag taglong garingang, fun nalong te, “Wain am fagfoyungun angku? O nunda nafili au emu laman ku takamoyung? Lag garingang ya, mafabul au emu!” Nu katanya, kanya fag taglong nafaragang wan nu garingang nu nalong wan sas fun te, “Matuyan wan Dius ban gfaurianan emu aroro naseg o kafag ngay fagsegan ay wo nadungugan anya.”

¹⁷ Ay fun Amasya nu nafakamatoan wan at ngay tagfalu anya longan, kanya nafadasug sik rirukan sas Israel at fun Yuas, Yuakas at baguama ay Yeu at fufu te, “Fawayani angku.”

¹⁸ Ay fun Yuas nabalus anya te, “Sis Lebanun e sik tanum at madugi, ay kanya namosuk longan sa sik kayu daul te, ‘Fadadwai am baguina sa ku baguama.’ Ay sik mangilafang nadalan sanya fag araw ay nasiad kanya fag tanum at madugi.

¹⁹ Anud wan Amasya, nababo o Edum ay nafamatungudun wo. Useganani way, ay lag yap o glelegan siginan am talun. Nu gfawayan wayo emi, namaurianan way o am sadili ay fagayu taw Uda.”

²⁰ Dewa katanya, Amasya wa nafandungug, aroro Dius naylat Yuas nu gfaurianan anya, aroro kanya naseg ngay taw Edum at ngay fagsegan.

²¹ Nu katanya, fun Yuas ay at ngay tagfawayan nanamawayan anya. Ay kanya fag duak gaban nablangan sis furuan Bet-Semes sis talun Uda.

²² Ay ngay taw Israel nababo, ay ngay taw Uda nalagyu sat mesa bale.

²³ Ay fun Yuas nagamat fun Amasya sis furuan Bet-Semes ay nataban anya sas Erusalem. Ay Yuas naiklas yangay Erusalem at alad gang siginans Efraim fag sakbawan sitsigons sakbawan tagsis fugungan at kabaan ufatk sandank siu.

²⁴ Ay kanya nabul wan fagayu ramraman tagsis Dius at bale, fagayu gintu ay salapi, ay fagayu at nalag fag ngay fagagbilugun, Ubed-Edum at fagulitun. Ay kanya nabul yangay fagayu ramraman tagsi sangay fagfungsuan sis fun at bale, ay nabuba kafag ngay ramraman gasfuan nu gtaban at ngay nagamat fag ngay taw sas Samarya.

²⁵ Ay siginan Yuas, talun Israel at fun, nu kabul, labi lima yak banwa talun Uda at fun Amasya nu gleleg.

²⁶ Ay tiba ya at kinfasludan kaduge Amasya nu gfunan, siginans fagsigadan sitsigons fakatabuan, marirukan sis fafil fagrirukan sabaliwas Uda ay Israel at ngay fun.

²⁷ Ay gina Amasya nafamabo Yawi, tibak taw Erusalem kaylat gfabul anya. Nu katanya, kanya nalagyu sas furuan Lakis, dewa katanya, kanya fagayu nasugu ngay taw laman nangguyan anya ay nafabul.

²⁸ Ay kanya fagayu nafasakay Amasya sas kabayu ay nabuba sas Erusalem, ay nanamoli sit ngay mangaguyang at fagfolian sis Dabid at furuan.