2 Krunika 24 - Fanawbuid tagsibaliwas Fakayabian

Uas nu Gfasine Yawi at Bale

¹ Uas fituk banwa gina gfasigad gfunan. Ay kanya gbanwan sis Erusalem, ay gfunan kaduge ufatk safuluk banwa. At mina Sibya sik taw Beerseba.

² Kaduge Euyada fag taglong gleleg, matuyan tua Uas at nafakamulun sis Yawi at daga salubangan.

³ Ay Euyada nafili duak mangena laman Uas at mangena, ay kanya anke ngay baguama ay anke ngay baguina.

⁴ Nu glugo wan Uas nu gfunan, kanya anke algan namasine Yawi at bale.

⁵ Nu katanya, kanya nafaful ngay tagfon fanggalangun ay ngay taw Lebi ay nalong sa anya fagayu te, “Nangafagdaul am sas fagdaul talun Uda ay namaful am ngay taw Israel at ngay famayad sas fun galay sik banwa, laman namasine tam Dius at bale. Namakamulun am takatanya.” Dewa katanya, ngay taw Lebi ya vtv nafaning.

⁶ Nu katanya, fun Uas nafauro Euyada fag fun tagfon fanggalangun ay nainto anya te, “Wain way o nasugu ngay taw Lebi laman namaful ngay taw Uda ay ngay taw Erusalem at famayad sas fun? O nunda Muisis wa nasugu sa sangay taw Israel te, foni at ngay famayad laman sas bale ramit fagfasakboan Fagsuadan Nasadian?”

⁷ (Atalya fag mangena at mauri at ngay baguina nasakbo sas Dius at bale ay nabul at yud e malong fag ngay fagagbilugun, laman at fagagbilugun gina nanseg Baal fag fagsegan.)

⁸ Nu katanya, fun Uas nafawat sik fagsuadan salapi, ay nafatungkud sis Yawi at bale at sakbawan.

⁹ Sanya ginan, nafadasug sik longan sas talun Uda ay sas Erusalem te, ngay taw masine nu gbuba at ngay famayad sas fun laman sas Yawi kata Muisis at suguan sa sangay taw Israel gina kanya fagayu sis talun at yud e taw.

¹⁰ Ay fagayu tagfangguna ay ngay taw guseganan gfon. Ay kanya fagayu gsuad at ngay salapi sas fagsuadan yakmay ankapnu.

¹¹ Ay galay fagsuadan salapi ankapnu, ngay taw Lebi gbuba sas fun at tagfakamulun. Ay fun at tagriruk ay fun tagfon fanggalangun at tagfakamulun gtap kanya fag ngay salapi, ay sanya ginan kanya fagayu gfafoli fagsuadan salapi sas Yawi at sakbawan bale.

¹² Sanya ginan, fun Uas ay Euyada nafon kafag ngay salapi sa sangay taw tagfasine Yawi at bale. Ay duama nafauro tagsaful kawat bale, ay tagsaful kawat siginan nu gagbilug sanbung ay tansu.

¹³ At nafili fag ngay takawat maseganama, nu katanya, kanya fagayu masakit nu kawat. Ay kanya fagayu nafasine Dius at bale kata ebi nu mawatan ay nafaksvn yay nu mogat.

¹⁴ Ay nu ntabu wan nu gfakamulun, kanya fagayu nafafoli at sawad fag salapi sas fun ay sas Euyada, ay nagbilug kanya fag salapi laman fangawat ngay fagagbilugun sis Yawi at bale: gina nanseg, gina namon at fagirugun fag fanggalangun, ay at famul at mabyat fag fagsuadan at mawatan siginans gintu ay salapi. Ay kaduge Euyada gleleg girug tua gugat ngay fanggalangun sas Yawi at bale.

¹⁵ Ngaduge tua Euyada nu gleleg, ay kanya anbul gina at banwa sadik sandan tuluk safulu.

¹⁶ Ay nanamoli at bilug sas fagfolian ngay fun sis Dabid at furuan daul, aroro nafakamulun tua at matuyan sas talun Israel ay sas Dius, ay anggan sat bale.

¹⁷ Dewa katanya, Euyada nu nbul wan, talun Uda at ngay tagfangguna nalao sas fun Uas. Ay kanya fagayu narungan sit daga salubangan ay naet sa anya te, “Dungugani emi.”

¹⁸ Kanya fagayu nafabayan at ngay mangaguyang at Dius Yawi at bale, ay kanya fagayu nananseg way sa sik turuk fagtoglagan Asera fag fagsegan, ay sa tiba yak fagsegan. Nu katanya, Dius andotama ngay taw Uda ay ngay taw Erusalem.

¹⁹ Ay Yawi nasugu sa anya fagayu sik ngay taglong laman gfafoli sa anya. Ay kanya fag ngay taglong dewa nafoyung, wa kaylat gdungugan.

²⁰ Ay Dius at falad antayuk sas Sakaryas, Euyada fag taglong at baguama. Ay Sakaryas anlindug si sangay taw at daga salubangan ay nalong te, “Katatuy Dius at longan, ‘Wain ay fagyudun nafaning Yawi at suguan? Wa ban am umramraman. Naiyan am Yawi, ay kanya ban gaiyan yangay ayu.’ ”

²¹ Ay ngay tagfakamulun anke algan namabul Sakaryas. Ay fun nasugu te, fanai wan Sakaryas, ay kanya fagayu nafana anya sis Yawi at basad bale, ay kanya anbul wan.

²² Fun Uas wa namatang ya Euyada, Sakaryas at mama, at nafakamulun sa anya. Nu bunway kanya nafabul way Sakaryas. Ay Sakaryas gina gakabulun nalong te, “Yawi nangus lumag ay nafakamulun, ay gfasud yay ban nangus ayu.”

²³ Gina kafus ginanya fag banwa, ngay taw Aram at ngay tagfawayan nanamawayan talun Uda. Ay kanya fagayu nababo talun Uda ay talun Erusalem, ay nafabul ngay taw Uda at ngay tagfangguna. Ay nabuba at ngay nabul fag ngay fagagbilugun sat fun sas furuan Damasku.

²⁴ Ngay taw Aram at ngay tagfawayan at nanamawayan wa kayu ngay taw Uda at ngay tagfawayan. Dewa katanya, Yawi naylat kanya fag tagfawayan nu gbabo ngay taw Uda. Aroro ngay taw Uda nafamabo Yawi, kafag ngay taw at ngay mangaguyang at Dius, andasug sas Uas takatanya fag faurianan.

²⁵ Ay ngay taw Aram at ngay tagfawayan nu nalo wan, Uas anfamato way ay e ngay natayukan. Ay at ngay tagfangguna ansadi laman namabul anya, aroro Uas nafabul Euyada fag tagfon fanggalangun at baguama. Ay kanya fagayu nafabul anya sit fagtiugan. Ay nanamoli anya sas Dabid at furuan daul, dewa katanya, wa nanamoli sas fagfolian ngay fun.

²⁶ At nafabul anya: Sabad, Semyat at baguama sik mangena tagsiginans Amun, ay Eusabad, Simrit at baguama sik mangena tagsiginans Muab.

²⁷ Ay at fansulitan sabaliwa Uas at ngay sisian, kata ngay taglong at nalong sabaliwa anya, ay nu gfasine Dius at bale, marirukan sis fagrirukan sabaliwa ngay fun. Ay at baguama Amasya at natubus anya laman sik fun.