2 Krunika 23 - Fanawbuid tagsibaliwas Fakayabian

¹ Ay sis fafituk banwa Euyada anke algan. Kanya nawat at nasadian sas limak tagfangguna ngayuk sandank tagfawayan. Kanya fag ngay fun tagfawayan: Asarya, Erukam at baguama, ay Ismael, Eukanan at baguama, ay Asarya, Ubed at baguama, ay Maaseya, Adaya at baguama, ay Elisafat, Sikri at baguama.

² Ay kanya fagayu anfagdaul sas fagdaul talun Uda, laman namaful ngay taw Lebi ay fagayu tagfangguna ngay talanan. Ay kanya fagayu nu ndasug sas Erusalem,

³ nasas Yawi at bale ay nawat at nasadian sas Uas, fun at baguama. Ay Euyada nalong sa sangay taw te, “Katsi wan at buknga fun at baguama nu gfunan, kata Yawi at fatuyanan te, siginan tua ban gugat Dabid at kasugfunanan tagfunan.

⁴ Am fag tuluk gaban tagulit gina Famiangalay fag Menit, katatuy ay fakamulun: at sadik gaban fag ngay tagfon fanggalangun ay fag ngay taw Lebi, am ban tagulit Yawi at bale at sakbawan.

⁵ Ay at faduak gaban tagulit fun at bale, ay at fatuluk gaban tagulit at mogat fag sakbawan. Ay tiba tagulit Yawi at bale at basad alad.

⁶ We manansakbo sas Yawi at bale, nu bunway ngay tagfon fanggalangun ay ngay taw Lebi tagfakamulun ginanya. Kanya fagayu masakbo aroro sia wan fagayu at nafili laman tagfakamulun. Dewa katanya, tiba si ways lod bale nu gulit kata Yawi at suguan.

⁷ Ngay taw Lebi masine nu gbitbitan at ngay famawayan laman gulit fun, ay kanya fagayu masine nu galo tua gugat anya nusnga nday nu glao. Ay fabuli nusnga sinu at nasakbo sas Yawi at bale bunway tagfon fanggalangun ay ngay taw Lebi.”

⁸ Ngay taw Lebi ay ngay taw Uda nafakamulun kata Euyada fag tagfon fanggalangun at suguan. Ay ngay fun tagfawayan nafaful at ngay tagfawayan tagulit gina Famiangalay fag Menit, ay anggan at yud gulit ginanya fag menit. Ay Euyada ya gfauli ngay taw Lebi dewa antabu wan nu gfakamulun.

⁹ Ay Euyada nafon sa kafag ngay fun tagfawayan ngay bangko ay ngay famalabag ebi fun Dabid at fagagbilugun tagsis Yawi at bale.

¹⁰ Ay kanya nafalindug ngay mangama tagbitbitan at mesa famawayan, maligung Yawi at bale ay sis fagirugan laman gulit at fun.

¹¹ Sanya ginan, Euyada ay at ngay baguama nafaduksun Uas, fun at baguama, ay nafoli sat alfuyu at sangbo, ay nafon sa anya sik fagaloan fag rirukan sabaliwa nu gfunan, ay nafili anya laman sik fun. Ay kanya nararus sa anya langis laman famasaful te, sia wan at fun. Ay kanya fagayu nauro te, “Fagmanabayanun sa tam fun!”

¹² Ay Atalya nu nadungug ngay tagulit ay ngay taw nu guro guseganan sat fun, kanya nalao yangay sas Yawi at bale.

¹³ Ay kanya nalag at bagu fag fun malindug munakbang sis turuk sis Yawi at bale at sakbawan. Ay sis fun at day tigyangan, ngay fun tagfawayan ay ngay tagfawang budyung, ay fagayu taw tagsanya guseganan. Ay tagsaful galubad gfangguna laman gfauseganan Dius, ay gfawang ngay fagfawangun. Ay Atalya nu nalag takatanya fagayu, kanya nagirat at lanbung at kaksvnan nu kauri, ay nauro te, “Ngay takamabo am! Ngay takamabo am!”

¹⁴ Ay Euyada nasugu sa sangay fun tagfawayan te, “Faduksuni Atalya, ay fabuli wan fagayu takaylat ggubuk anya. Lag am gfabul anya iste sis Yawi at bale.”

¹⁵ Ay kanya fagayu nagamat Atalya, ay nataban sas day sakbawan sa sangay kabayu at fagsakboan sas fun at bale, ay sanya wan nu gfabul.

Euyada at Nafabagu fag ngay Fakamulun

¹⁶ Sanya ginan, Euyada nawat sik nasadian sas Yawi ay sa sangay taw ay sat fun te, kanya ban fagayu Yawi at ngay taw.

¹⁷ Ay fagayu taw nalao sas Baal at bale ay naiklas. Kanya fagayu narufa ngay fagirugan fanggalangun ay anggan tagsanya fag ngay fagsegan, ay kanya fagayu nafabul Matan, Baal at tagfon fanggalangun, sis salubangan fagirugan.

¹⁸ Ay Euyada nafatigwanan sa sangay taw Lebi fag ngay tagfon fanggalangun Yawi at bale, kata Dabid at nafakamulun. Kanya fagayu nafon at ngay fagirugun fag ngay fanggalangun kata Muisis at Faugali, ay laman guseganan galubad kata Dabid at suguan.

¹⁹ Ay Euyada nafae tagulit yangay sas Yawi at ngay sakbawan bale laman we masakbo fagayu at natuyan te, e malong.

²⁰ Sanya ginan, kanya nataban ngay fun tagfawayan, ay takadungug fag ngay taw, ngay tagfangguna, ay fagayu taw, ay kanya fagayu nataban at fun sat bale siginans Yawi at bale. Kanya fagayu nadalan sabaliwas tagsit tungud fag sakbawan ay nafalunggung at fun sat faglunggungan,

²¹ ay fagayu taw guseganan. Ay nu nafabul wan Atalya, anke fagmanabayanun sit talun.