2 Krunika 21 - Fanawbuid tagsibaliwas Fakayabian

¹ Eusafat nu nbul wan, nanamoli anya sat ngay mangaguyang at fagfolian, sis Dabid at furuan. Ay at baguama Euram at natubus anya laman sik fun.

² Euram at ngay faduksay: Asarya, Eyel, Sakaryas, Asarya, Mikael, ay Sefatya. Kanya fagayu talun Uda at fun Eusafat at ngay baguama.

³ Eusafat nafon sat ngay sisian ngayuk salapi ay gintu ay at mafanud fag ngay fagagbilugun, ay tagsis talun Uda fag ngay furuan at ke ngay dingding alad. Dewa katanya, Euram wan at nafili at fantubus Eusafat laman sik fun, aroro kanya wan at ngay baguama at kaka.

Euram nu Gfunan Talun Uda

⁴ Ay nu maksvn wan Euram nu gfunan sit mama at fagfunanan, kanya nafabul at ngay faduksay, gasfuan tibak tagfangguna sis Uda.

⁵ Euram tuluk safulu e duak banwa gina gfasigad gfunan. Ay kanya gbanwan sis Erusalem, ay nu gfunan waluk banwa.

⁶ Kanya nafaning Israel at ngay fun at ugali, kata Akab fag talanan at nafakamulun, aroro kanya nabubay Akab at baguina. Euram nafakamulun at mauri sis Yawi at daga salubangan.

⁷ Yawi wa kaylat gfamin Dabid at kalongan aroro kanya nawat sik nasadian sas Dabid te, at ngay kasugfunanan ban gfunan tua gugat.

⁸ Gina Euram gfunan, ngay taw Edum nafamabo Uda, ay kanya fagayu nafili sik taw laman at fun.

⁹ Nu katanya, Euram ay at ngay fun tagfawayan ay at ngay tagsaful gsakay sis faguyudan nasas Edum. Ay ngay taw Edum naligung anya fagayu. Dewa katanya, nu nyabi wan kanya fagayu nafawayan ngay taw Edum ay nalagyu.

¹⁰ Ay dasug katsi ngay taw Edum kamabo yay gugat ngay taw Uda. Ay ginanya anggan ngay taw Libna nafamabo yangay, aroro Euram nafamabo at ngay mangaguyang at Dius Yawi.

¹¹ Kanya nafawat ya ngay bale fagnansegan sa tangabat fag ngay buknga sis Uda, kanya wan ngay taw Uda ay ngay taw Erusalem at fagnansegun at yud matuyan fag ngay fagsegan.

¹² Ay taglong Elyas nariruk sas Euram te, “Katatuy Yawi at longan, am mangaguyang Dabid at Dius. Glong te, ‘Wo nafaning am mama Eusafat ay am fufuama Asa at ugali. Kanya fag dua at nafunan yangay sis Uda.

¹³ Abat ngate, nafaning way o Israel at ngay fun at fakamulun. Nataban o ngay taw Uda ay ngay taw Erusalem laman nanseg at yud matuyan fag ngay fagsegan, Akab at nafawat. Ay nafabul o am ngay faduksay tagtungud tua emu nu mamatanganan.

¹⁴ Nu katanya, Yawi namaurianan emu, gasfuan am ngay fagfunanun fag ngay taw, ay am ngay sisian, ay am ngay mangena, ay fagayu am fagagbilugun. Kanya namadasug sa emu at maksvn fag faurianan.

¹⁵ Nangidapan ban siginan sik maksvn fag fansait ungdan yakmay ban am funa naduksun.’ ”

¹⁶ Sanya ginan, Yawi naylat ngay taw Filistia ay ngay taw Arabya tagbanwan munakbang sis Etiupya laman kauri maksvn Euram.

¹⁷ Ay kanya fag ngay taw nanamawayan ngay taw Uda, ay nabul wan ngay ramraman sis fun at bale, ay nataban yangay fun at ngay mangena ay at ngay sisian. Ay at yud nataban at ngenge way lang Aasya.

¹⁸ Sanya ginan, Yawi nafaidapan Euram siginan sik maksvn fag fansait ungdan at yud ya kafia.

¹⁹ Ay nu nlangfe duak banwa, at funa naduksun aroro sat fakasaitun, ay kanya maksvn nu ganini ay anbul. Ngay taw wa nafae afuy laman at famalag te, nauseganan anya, kata at fakamulun sat ngay mangaguyang.

²⁰ Euram at banwa gina nanfunan tuluk safulu e dua, ay kanya gbanwan sis Erusalem, ay nafunan kaduge waluk banwa. Ay gina nbul we nbalu ya anya. Ay nanamoli anya sas Dabid at furuan, dewa katanya, wa nafasa sangay fun at fagfolian.