2 Krunika 20 - Fanawbuid tagsibaliwas Fakayabian

Eusafat Nababo Talun Muab ay Amun

¹ Ay ngay taw Muab ay taw Amun gadgaloan ngay taw Meun, nanamawayan Eusafat.

² Ay e ngay taw at kinkakbang sas Eusafat ay nalong te, “Ngayuk tagfawayan kadasug laman namawayan emu. Kanya fagayu siginans talun Edum tagsis dife Dagat at Mabulan. Ay kanya fagayu sis Kasasun-Tamar” (at ngayan yangay te, En-Gedi).

³ Ay Eusafat anlimu ay ankakbang sas Yawi. Ay nasugu sas fagayu taw Uda te, “Lag tam gfangon laman gdarangin tam.”

⁴ Nu katanya, anful fagayu taw tagsiginans fagayu furuan tagsis Uda, laman get gubuk sas Yawi.

⁵ Ay Eusafat anlindug sis salubangan ngay taw Uda ay ngay taw Erusalem, sis Yawi at salubangan bale, sit mawatan fag bagu alad gang.

⁶ Ay kanya nalong te, “Yawi, em ngay mangaguyang at Dius, o wan tagsis banwa fag Dius. O way tagagbilug fagayu fagfagtainanan sas fagdaul daga. Mabalyanan o ay we makatu gfawayan emu.

⁷ Em Dius, o nunda wo naiyan wan ebi fag ngay taw tagbanwan ste fag talun siginan nu gagbilug o am ngay taw Israel, ay nafon o sa sangay taw Israel am fagadgalangan Abrayam at ngay kasugfunanan laman at talun ban kabavn?

⁸ Ay kanya fagayu nabanwan ste, ay nawat am bale laman at fagnansegan emu. Ay kanya fagayu nalong te,

⁹ ‘Nu e ndasug ban sa emi faurianan kata awayan, fagidapun, ay fanlunus, nanmalindug ban mi sa am bale at daga salubangan nu inda nu gfauseganan ami emu. Get ban mi sa emu gubuk aroro sa em fagidapun, ay dungugi tua ban ay falangfei emi.’

¹⁰ “Katsi ngay taw Amun, taw Muab, ay ngay taw tagsiginans Buksul Seir namawayan emi. Ebi gina ngay taw Israel glao siginans talun Igiptu, wo naylat ngay taw Israel nu gagbilug kafag ngay taw at talun. Nu katanya, ngay taw Israel nasaruyan way kanya fag ngay taw ay wa nafabul.

¹¹ Ay damai katsi kafag ngay taw at fakamulun sa emi. Kanya fagayu namawayan emi laman gaiyan emi siginan am nafon emi fag talun em fagagbilugun ban kabavn.

¹² Em Dius, o wo gfaurianan ya kanya fag ngay taw? Aroro wami makatu gfawayan kafag ngay tagfawayan ngayu. Wami saful em fakamulun, dewa katanya, gafanud ami sa emu.”

¹³ Ay kaduge ngay taw Uda at mangama fagayu malindug sanya gasfuan at ngay mangena ay at ngay sisian ay at ngay ngenge,

¹⁴ Akasyel sanya yangay ay Yawi at falad antayuk sa anya. Akasyel, Sakaryas at baguama, ay Sakaryas, Benaya at baguama, ay Benaya, Eyel at baguama, ay Eyel, Matanya at baguama. Matanya, sik taw Lebi ay siginans Asaf at kasugfunanan.

¹⁵ Ay Akasyel nalong te, “Fun Eusafat ay fagayu am tagbanwan sis Uda ay sis Erusalem, dungugani! Katatuy Yawi at longan ayu, ‘Lag am kalimu ay kamomuy kafag ngay tagfawayan ngayu, aroro bunwa ro am at namawayan anya fagayu nu bunway Dius tua.

¹⁶ Balabag ban tagbungi ay namablang ban am anya fagayu, ay glag ban am kanya fagayu nu gundaud sas Sis, sas tigyangan datag tagsis Eruel fag talun at yud e taw.

¹⁷ Wa ban am gfawayan ya. Falganani ay maksvni, ay lumag ban am Yawi nu gfalangfe ayu. Nu katanya, am fag ngay taw Uda ay taw Erusalem, lag am kalimu ay kamomuy. Balabag ban namablang am kanya fag ngay tagfawayan ay Yawi ban gufud ayu.’ ”

¹⁸ Sanya ginan, Eusafat ay fagayu taw Uda ay taw Erusalem, natudan laman gseg Yawi.

¹⁹ Ay tibak taw Lebi tagsiginans Kuat ay Kura fag ngay talanan guro gfauseganan Yawi ngay taw Israel at Dius.

²⁰ Ay balabag di sbalabag Eusafat ay at ngay ufud nalao sas Tekwa fag talun at yud e taw. Ay kaduge kanya fagayu glao Eusafat anragang ay nalong te, “Ngay taw Uda ay ngay taw Erusalem, dungugani angku! Afanudi sa ay Dius Yawi, ay faksvni tua ay amatanganan. Ay afanudi yangay sat taglong ay gbabo ban am.”

²¹ Ay Eusafat nu nafakamatoan wan ngay taw, kanya nafili sik ngay tagfangguna alubad laman gfangguna anya fagayu ay kanya fagayu galubad gfauseganan Yawi sit daga salubangan. Kanya fagayu galubad te, “Fauseganani Yawi, aroro nu kesug we fakatabuan.”

²² Ay kanya fagayu gina nafasigad nalubad guseganan, Yawi naylat ngay taw Muab ay ngay Amun ay ngay taw tagsiginans Buksul Seir nu gawayan.

²³ Ngay taw Amun ay ngay taw Muab nanamawayan ay nafamin ngay tagsiginans Buksul Seir fag ngay tagfawayan. Ay kanya fagayu nu ntabu wan nu gfawayan, kanya fagayu nawayan yangay.

²⁴ Ay ngay taw Uda at ngay tagfawayan nu ndasug sas tungud buksul tagsis talun at yud e taw, kanya fagayu nalag at ngay fawayan at ngay bilug nu mataygilid sis daga. Ay nusdi sadi we gleleg ya.

²⁵ Nu katanya, Eusafat ay at ngay tagfawayan nalao sanya ay nabul at ngay fawayan at ngay ramraman. Ay kanya fagayu ngayu at nabul fagagbilugun, ngay lanbung, ay tiba yak fagagbilugun ay wa bangan mad ya.

²⁶ Ay sis faufatk menit kanya fagayu anful sis datag Beraka, laman gseg Yawi. Kanya wan at fagnafangayanun kafag datag te, Beraka.

²⁷ Sanya ginan, Eusafat ay at ngay tagfawayan noli wan sas Erusalem. Kanya fagayu guseganan, aroro Yawi nafababo tua anya fagayu sat ngay fawayan.

²⁸ Ay kanya fagayu nu ndasug sas Erusalem, nataglayun wan sas Yawi at bale, ay nafawang ngay fagfawangun ke ngay bakyang, ay ngay budyung.

²⁹ Ay fagayu fagfunanun nu nadungug te, katanya Yawi nu gfawayan Israel at ngay fawayan, kanya fagayu anke fakalimuun sas Dius.

³⁰ Nu katanya, manabayan tua Eusafat nu gfunan, aroro at Dius nafon tua anya fagmanabayanun anggan sat ligung fag ngay talun.

Eusafat nu Gfunan Taguyan

³¹ Katanya Eusafat nu gfunan sis Uda. Kanya at banwa tuluk safulu e lima gina gfasigad gfunan. Kanya gbanwan sis Erusalem, ay nu gfunan duak safulu e limak banwa. At mina Asuba, Silki at baguina.

³² Eusafat nafaning tua at mama Asa at ugali ay matuyan at nafakamulun. Nafakamulun at masine sis Yawi at daga salubangan.

³³ Dewa katanya, kanya wa naiklas ngay bale fagnansegan si tangabat fag ngay buknga, ay at fagfunanun fag ngay taw wa nafaning at ngay mangaguyang at Dius.

³⁴ Ay tiba ya at kinfasludan kaduge Eusafat gfunan siginan nu gfasigad sitsigons fakatabuan, anriruk sis Yeu, Kanani at baguama at fagrirukan, sis fafil fagrirukan sabaliwas Israel at ngay fun.

³⁵ Ay sa taguyan fun Eusafat nu gfunan sis talun Uda, ansadi way sas fun Aasya fag taw mauri.

³⁶ Kanya fag dua ansadi gfawat ngay sakayan lino laman tagbuba at famaloun. Kanya nafawat sis Esyun-Geber.

³⁷ Dewa katanya, Elyeser, Dudabau at baguama fag taw Maresa, nalong sas Eusafat te, “Yawi nangiklas wan am nafawat fag ngay sakayan lino, aroro nasadi o sas Aasya.” Nu katanya, at nafawat fag ngay sakayan lino ankiklas wan ay wa manamuba ya ngay famaloun.