2 Krunika 2 - Fanawbuid tagsibaliwas Fakayabian

Nu Gfalganan laman Kawat Yawi at Bale

¹ Ay Sulumun nasugu te, “Awati sik bale laman famauseganan Yawi, ay awati yangay sik bale laman sa angku.”

² Ay Sulumun nafauro fituk safuluk libuk mangama laman tagaut, ay waluk safuluk libuk mangama tagdasdas gang sa sangay buksul, ay tuluk libu unumk sandank mangama tagfangguna gina kawat bale.

³ Ay Sulumun nafadasug sik longan sas Kiram, Tiru at fun, te, “Fadasugi sa angku ngay kayu sidru kata am nafakamulun sa ku mama Dabid gina gfawat at bale.

⁴ Namawat au Yawi ku Dius at bale laman famauseganan anya, ay kafag bale ban sik yud e malong laman fagnangirugan ngay famaebebanglu fag lune, ay fagfatungkudan fanggalangun fag tinapay. Ay sanya yangay ban nu nangirug ngay fagirugun fag ngay fanggalangun, galay balabag ay fafun, ay galay famiangalay fag menit, ay galay fagmafulun sabaliwa Magdanun nu Bagu Kasure, ay tiba yak fagmafulun laman famauseganan Yawi em Dius. Tuy fag faugali ngay taw Israel at fagaloan ban kabavn.

⁵ Gbia ku fagnamawatun fag bale laman sas Yawi, aroro em Dius amabalyanan tua tibak dius.

⁶ Dewa katanya, sinu at manangawat Yawi at bale? Dewa sis banwa ay si tiba tungud fag banwa ya kasakan sa anya. Ay sinu au nunda at manangawat Yawi at bale? Ku fagmakatuun kawat fagirugan way lang em ngay fanggalangun sit daga salubangan.

⁷ Nu katanya, katsi, sugui sa angku sik taw tagsaful kawat, siginan fangawat fag gintu, sanbung salapi ay tansu ay sanbung, ay tagsaful yangay kawat ngay ramit maubian, maraska, melo, ay tagsaful yangay ggaruy. Ay kanya ban namakamulun gasfuan ku ngay taw Uda ay taw Erusalem tagsaful gfakamulun, ku mama Dabid at nafili.

⁸ Ay fadasugi yangay sa angku ngay kayu sidru, sipres ay tibak kayu at masine tagsiginans Lebanun, aroro saful au te, am ngay taw saful gfuan ngay kayu. Ay ku ngay taw ban nanggubuk am ngay taw

⁹ laman namalganan ngayuk kayu, aroro gbia ay masine tua ban ku fagnamawatun fag bale laman sas Yawi.

¹⁰ Ay gfon kban sam ngay taw tagsaful gfuan ngay kayu: unumk safuluk libuk saku trigu, ay unumk safuluk libuk saku barli, ay sadik sandan sadik safuluk libuk baringan fanlangu, ay sadik sandan sadik safuluk libuk baringan langis ulibu.”

¹¹ Ay Kiram, Tiru at fun nafabuba sik rirukan laman gbalus Sulumun te, “Aroro Yawi kesug at ngay taw, kanya nafili emu laman at ngay taw at fun.

¹² Segi Yawi, ngay taw Israel at Dius, at nawat banwa ay daga! Kanya nafon sas fun Dabid sik baguama at ke fagsafulun ay at mamatanganan, ay at ke fagmayamagun, laman namawat Yawi at bale, ay at sadili bale.

¹³ Gsugu kban sanya Kiram tagsaful kawat nusnga setaw.

¹⁴ At mina sik taw Dan ay at mama sik taw Tiru. Kanya saful kawat nusnga setaw fag fagagbilugun at fangawat siginans gintu, sanbung salapi, tansu, sanbung, gang ay ngay kayu, ay kanya saful yangay kawat ramit maubian, maraska, melo ay mayangfis. Ay saful yangay kawat ngay aninu sis kayu, ay nusnga setaw am fakaylatun gfawat sa anya. Ay kanya ban gfakamulun gasfuan am nafili fag ngay takawat ay anggan am mama, ku fun Dabid at ngay nafili.

¹⁵ Mesug fag fun Sulumun, foni sa emi am nafatuyanan fag trigu, barli, fanlangu, ay langis ulibu,

¹⁶ ay namuan ami am fagetun fag ngay kayu sas Lebanun. Ay namataladan ami kafag ngay kayu, ay namalimusan sabaliwas Upa. Ay nu ndasug ban sas Upa namuba ban am sas Erusalem.”

¹⁷ Ay Sulumun nainsaful ay nariruk fagayu at betaw tagsis Israel, kata at mama Dabid at nafakamulun, ay at kayuan, sadik sandan limak safulu e tuluk libu unumk sandan.

¹⁸ Ay kanya nafili fituk safuluk libu laman at nangaut, ay waluk sandank libu laman tagdasdas gang sa sangay buksul, ay tuluk libu unumk sandan tagfangguna ngay tagfakamulun.