2 Krunika 18 - Fanawbuid tagsibaliwas Fakayabian

Mikaya Nafararang sas Akab

¹ Nu ngayu wan Eusafat at ngay ramraman, kanya ansik takadungug ay nafagadgalangan. Ay kanya nafadadwa at ngay kalongan sas fun Akab at ngay kalongan.

² Ay nu nlangfe wan nu seyuk banwa, Eusafat nalao sas Samarya laman nansibo fun Akab. Ay fun Akab nafilas ngayuk tupa ay ngayuk baka laman at falganan sas Eusafat ay sat ngay fagsuguan. Ay kanya nafaylatan laman nangalo anya namawayan furuan Ramut-Gilyad.

³ Ay Akab nainto sas Eusafat te, “O nangalo o angku laman namawayan Ramut-Gilyad?” Ay kanya nabalus te, “Sabv, mafalganan au nangalo emu, ay mafalganan kyangay gfaalo sa emu ku ngay tagfawayan laman namawayan.”

⁴ Ay Eusafat nalong yangay fia sa anya te, “Taguna nanginsafuli yap Yawi at longan.”

⁵ Ay Israel at fun nafaful ufatk sandank taglong ay nainto te, “O namawayan au Ramut-Gilyad ay mannga duan?” Ay kanya fagayu nabalus te, “Kin, loi wan, aroro Dius ro gfababo emu.”

⁶ Ay Eusafat nainto te, “O we ste ya Yawi at taglong tam fagnangintoan?”

⁷ Ay Israel at fun nabalus Eusafat te, “Sabv, e sik taw yay tam fagnangintoan Yawi at fakaylatun. Dewa katanya, kauri au anya, aroro we longan ya sa angku at masine nu bunway at mauri way lang. At ngayan Mikaya, Imla at baguama.” Ay Eusafat nalong te, “Lag glong takatanya.”

⁸ Ay Israel at fun nalong te, “Fastiei wa vtv Mikaya, Imla at baguama.”

⁹ Sanya ginan, Akab talun Israel at fun ay Eusafat talun Uda at fun nasulun at mesa lanbung laman sik fun ay anlunggung sit mesa faglunggungan sis salubangan fagruyusan tagsibaliwas furuan Samarya at sakbawan, ay gdungugan ngay taglong at ngay longan.

¹⁰ Ay Sedekya fag taglong, Kenaana at baguama nawat duak sunge at fangawat sanbung. Ay kanya nalong te, “Yawi glong te, ‘Fun Akab namawayan o ngay taw Aram siginan tuy fag duak sunge, ay gfamin ban o anya fagayu.’ ”

¹¹ Katanya yay fagayu taglong at longan. Kanya fagayu nalong te, “Namawayan o Ramut-Gilyad ay gbabo ro wo anya fagayu, aroro Yawi ro ggubuk emu.”

¹² Ay fun Akab at nasugu nalong sas Mikaya te, “Fagayu taglong ansadi glong te, fun ro gbabo, ay anggan o fakatanyai yangay am longan.”

¹³ Ay Mikaya nalong te, “Gfatuyanan au sas Yawi, tagleleg fag Dius te, at ngay longan tua ban ku fagnanlongun.”

¹⁴ Ay Mikaya nu ndasug sas fun Akab, fun nainto anya te, “O namawayan ami Ramut-Gilyad, ay o mannga duan?” Ay Mikaya nabalus te, “Namawayan wam ay gbabo ro am aroro Dius gfababo ro ayu sanya fag ngay taw.”

¹⁵ Ay fun Akab nalong sas Mikaya te, “Seyu ginan wan nu glong au emu te, fatuyanani sas Yawi at ngayan laman glong o sa angku at matuyan?”

¹⁶ Ay Mikaya nalong te, “Nataginfan au ay nalag ngay taw Israel nu gfanaruayan sa sangay buksul kata ngay tupa yud e gulit ya. Ay Yawi nalong te, ‘We gfangguna ya kanya fag ngay taw. Faulii wan manabayan kanya fagayu.’ ”

¹⁷ Ay fun Akab nalong sas Eusafat te, “O nunda kya nalong emu te, kanya wa batang e nalong at matuyan sabaliwa angku, nu bunway fagmauriun way lang?”

¹⁸ Ay Mikaya nalong yangay te, “Dungugani Yawi at longan! Nalag au Yawi nu malunggung sit faglunggungan, ay at ngay tagbarita nu malindug gsumbalian sit dua tigyangan.

¹⁹ Ay Yawi glong sa sangay awatan tagsis banwa te, ‘Sinu at nandaya Akab, talun Israel at fun, laman namaylatan anya namawayan Ramut-Gilyad laman kanya nangabul?’ Saman wa saman at ngay famalus.

²⁰ “Ay sanya ginan sik falad ankakbang sas Yawi ay nalong te, ‘Au wa ro at nandaya anya.’ “Ay Yawi nainto te, ‘Setain ro?’

²¹ “Ay kafag falad nabalus te, ‘Nanlao au ay namasik takamuagan au kanya fag ngay taglong.’ “Nu katanya, Yawi nalong anya te, ‘Loi wan ay namakamulun o takatanya.’

²² “Nu katanya, Yawi nanamasa am ngay taglong at ngay bibig sik takamuag fag falad, aroro Yawi kaylat nu gababawan o.”

²³ Ay Sedekya, Kenaana at baguama, ankakbang sas Mikaya ay nafalang sit fingi ay nalong te, “Setain nu malong o te, Yawi at falad nalao siginan angku, ay nanamakamatoan emu?”

²⁴ Ay Mikaya nabalus te, “Sumaful ban o, gina ban o nababawan, ay nananuksuan sam bale at masuksuk fag suluk.”

²⁵ Ay Akab, Israel at fun masakit nu gsugu te, “Gamati Mikaya ay tabanani fafolii sas Amun tagfangguna sis furuan daul, ay sa ku baguama Uas.

²⁶ Longi te, ‘Katatuy fun Akab at suguan: Ubungi tuy fag taw. Tinapay yakman lang ay mamam ay fagfonun, yakmay kban anfoli manabayan siginans fagawayanan.’ ”

²⁷ Ay Mikaya nalong te, “Nu nfoli tua ban o manabayan, Yawi wa naringang siginan angku.” Ay nalong yangay sa sangay taw tagsanya te, “Amatangi ku nalong.”

Akab nu Kabul

²⁸ Akab, Israel at fun ay Eusafat, Uda at fun, nanamawayan Ramut-Gilyad.

²⁹ Ay Akab, Israel at fun, nalong sas Eusafat te, “Gsulun au sik lanbung laman we gtoglag angku, dewa katanya, suluni am lanbung tagfatoglag te, sik fun o.” Nu katanya, Israel at fun nasulun sik lanbung laman wa katoglag, ay nalao sas fagawayanan.

³⁰ Ay Aram at fun nasugu sat ngay fun tagfawayan tagsakay sit faguyudan te, “Lag am namafalo nusnga sinu fag tagfawayan, sangay Israel at fun.”

³¹ Ay kafag ngay fun tagfawayan tagsakay sit faguyudan nu nalag Eusafat, gamatangan te, “Anud, kanya wan Israel at fun.” Ay kanya fagayu anbiling laman gfawayan anya. Ay Eusafat nauro sas Yawi, ay Yawi nagubuk tua anya ay nafayayu at ngay fawayan.

³² Ay kafag ngay fun tagfawayan nu nasaful te, kanya bunwa Israel at fun, kanya fagayu anragang nu gfafalo anya.

³³ Ay sik taw Aram fag tagfawayan kaduge gfana ngay taw Israel at ngay tagfawayan, kanya nafana Israel at fun sit buknga famalabag ay natayuk sit dubdub. Ay fun Akab nalong sat tagfalao at kabayu te, “Fayayui angku siginans fagawayanan, aroro nafanan au.”

³⁴ Maksvn tua at awayan ginanya fagngabak menit, Israel at fun masararean sit faguyudan gsalubang Aram at ngay tagfawayan sitsigons fafun. Ay menit nu nfalyu wan kanya anbul wan.