2 Krunika 15 - Fanawbuid tagsibaliwas Fakayabian

Asa at Nafabagu fag ngay Fakamulun

¹ Dius at Falad antayuk sas Asarya, Uded at baguama.

² Ay kanya nanangablang fun Asa, ay nalong anya te, “Fun Asa, dungugani, ay anggan am fag ngay taw Uda, ay ngay taw Benamin. Yawi si tua ayu nu gbanwan tuam si anya. Nu grvbvy tuam anya, lumag am anya. Ay nu natalyuyan wayam anya, kanya gaiyan yangay ayu.

³ Ngaduge wan ngay taw Israel nu gbanwan nu yud si anya at matuyan fag Dius, ay nu yud e ngay tagfon fanggalangun tagfoyung anya fagayu, ay nu yud e fagaloan suguan.

⁴ Ay gina kanya fagayu gidapan, nadarangin sas Yawi, Israel at Dius, ay kanya nagubuk tua anya fagayu.

⁵ Ginanya malimu taglao aroro nusnga nday we fagmanabayanun ya at ngay taw.

⁶ Ay ngay talun anggan ngay furuan gawayan, aroro Dius nafasagsagan kanya fag ngay taw siginan ngay fagidapun.

⁷ Dewa katanya, am maksvni tua ay lag kamomuy, aroro e fon ban fia ayu sa ay ngay nafakamulun.”

⁸ Asa nu nadungug Asarya, Uded at baguama, at longan, kanya anseganama. Ay kanya naukas wan ngay fagsegan at maksvn nu mauri sis fagdaul talun Uda ay sis Benamin, ay tagsit nagbilug fag ngay furuan tagsis Efraim fag ngay buksul. Ay kanya nafasine fagirugan fanggalangun sas Yawi, tagsis Yawi at bale at tangbi.

⁹ Sanya ginan, kanya nafaful fagayu taw Uda ay taw Benamin, ay anggan taw Efraim, taw Manase, ay taw Simyun tagbanwan si anya. Ngayu at nalin sas Uda siginans talun Israel, kanya fagayu nu nasaful te, Yawi Asa at Dius, gufud tua anya.

¹⁰ Kanya fagayu anful sas talun Erusalem, gina sis fatuluk magdanun, sis falabi limak banwa Asa nu gfunan.

¹¹ Ay ginanya fag buknga kanya fagayu nafon at ngay fanggalangun sas Yawi, at nabul fag ngay fagbaugun siginan at ngay fawayan, fituk sandank baka ay fituk libuk tupa ay kambing.

¹² Ay kanya fagayu nawat at nasadian, laman nandarangin sas Yawi, sat ngay mangaguyang at Dius, sas fagdaul at amatanganan ay sas fagdaul at basad taw.

¹³ Ay nusnga sinu at yud gseg Yawi, ngay taw Israel at Dius, gfabul wan, dewa sisian ay mafagtainan, mangama ay mangena.

¹⁴ Ay kanya fagayu nafatuyanan sas Yawi, siginan sik awang daul, gasfuan sik uro daul, ay siginan nu gfawang at ngay budyung.

¹⁵ Ngay taw Uda guseganan aroro kanya fagayu nafatuyanan sas fagdaul at amatanganan. Ay kanya fagayu nadarangin sas Yawi sas fagdaul at amatanganan, ay kanya fagayu nalag at fagmatuyanun. Ay Yawi nafae fagmanabayanun anya fagayu nusnga nday.

¹⁶ Ay fun Asa naiyan yangay at fufuina Maaka fag fun mangena, aroro kanya nafawat at maksvn nu mauri fag turuk fagtoglagan Asera fag fagsegan. Ay Asa nafafuan ay nafabalse kafag turuk, ay nafairug sis Liskung Kidrun.

¹⁷ Ay Asa deyud naiklas ngay fagnansegan sa tangabat fag ngay buknga, kaduge kanya gleleg matuyan tua gugat sas Dius.

¹⁸ Ay kanya nabuba sas Dius at bale at nafasaman fag ngay fagagbilugun anggan at mama at nafasaman fag ngay fagagbilugun, ay anggan gintu ay sanbung salapi.

¹⁹ Wa batang e awayan sitsigons fatuluk safulu e limak banwa Asa nu gfunan.