2 Krunika 14 - Fanawbuid tagsibaliwas Fakayabian

¹ Ay Abya anbul ay nanamoli anya sas Dabid at furuan, ay at baguama Asa natubus anya laman sik fun. Ay gina kanya gfunan anke fagmanabayanun sas talun Uda, kaduge safuluk banwa.

Asa nu Gfunan Talun Uda

² Asa nafakamulun at masine sit Dius Yawi at daga salubangan.

³ Kanya naiklas ngay fagirugan fanggalangun, at fagnamonan sat yud matuyan fag ngay fagsegan, ay ngay bale fagnansegan sa tangabat fag ngay buknga. Ay kanya narufa yangay famamatang fag ngay gang, ay nagatvng ngay turuk fagtoglagan Asera fag fagsegan.

⁴ Ay kanya nasugu sa sangay taw Uda te, darangini sas Yawi, sat ngay mangaguyang at Dius, ay nasugu yangay te, faningi at ngay suguan.

⁵ Ay kanya nafaiklas ngay fagnansegan si tangabat fag ngay buknga, ay nafaiklas yangay fagnangirugan famaebebanglu fag lune sas fagayu furuan sis Uda. Nu katanya, talun Uda manabayan kaduge Asa gfunan.

⁶ Ay kaduge manabayan, kanya nafae ngay dingding alad ngay furuan tagsis Uda. Ay ginanya we nanamawayan anya, aroro Yawi nafon sa anya fagmanabayanun.

⁷ Ay Asa nalong sa sangay taw Uda te, “Namaksvn tam tuy fag ngay furuan siginan nu namae dingding alad, at ke ngay bale ngabat fagulitan, ay namae ngay sakbawan tam at ke ngay famatawad. Itam yay tagagbilug ste fag talun, aroro kakbang tua tam sas Yawi tam Dius. Kanya nafae fagmanabayanun antam sa tam ngay fawayan si tam ngay ligung.” Nu katanya, kanya fagayu nafaksvn at furuan, ay anramraman.

⁸ Ay Asa e tuluk sandank libuk tagfawayan siginans Uda, kanya fagayu e ngay famalabag ayu daul ay e ngay bangko. Ay kanya e duak sandan waluk safuluk libu yangayk tagfawayan tagsiginans Benamin, ay kanya fagayu e ngay famalabag ayu sirut ay e ngay godun. Kanya fag ngay tagfawayan maseganama.

⁹ Ay Sera fag taw Etiupya nalao gadgaloan at ngay tagfawayan ngayu, kanya e tuluk sandank faguyudan, laman nanamawayan talun Uda. Ay kanya fagayu andasug sas furuan Maresa.

¹⁰ Ay anggan Asa nalao yangay laman namawayan Sera, ay kanya mafalganan sis datag Sefata, munakbang sis Maresa.

¹¹ Sanya ginan, Asa nadarangin sat Dius Yawi te, “Yawi, we makatu ggubuk ngay taw at yud e fagmakatuun, laman namawayan sa sangay taw at ke fagmabalyananun, nu bunway o way lang. Yawi, em Dius, gubuki emi, aroro o way lang em fagsegun, ay sam ngayan, nalao ami stae laman namawayan in fag ngay tagfawayan ngayu. Yawi, em Dius, lag o kaylat ngay taw nu gbabo emu.”

¹² Nu katanya, Yawi nababo ngay taw Etiupya, sis Asa ay si sangay taw Uda at daga salubangan. Ay ngay taw Etiupya nalagyu.

¹³ Sanya ginan, Asa ay at ngay tagfawayan nanamafalo sitsigons Gerar. Ngayu wan ngay taw Etiupya at ngay tagfawayan at kinbul, nu katanya, kanya fagayu wa makatu ya gfawayan. Yawi ay at ngay tagfawayan nababo anya fagayu. Ay ngay taw Uda at ngay tagfawayan ngayu at nabul ngay ramraman.

¹⁴ Ay kanya fagayu naiklas wan ngay furuan at munakbang sis Gerar, aroro andasug sa anya fagayu Yawi at maksvn fag faurianan. Ay kanya fagayu nabul wan kafag ngay furuan at ngay ramraman, aroro ngayu kafag ngay furuan at ramraman.

¹⁵ Sanya ginan, kanya fagayu nanamawayan yangay tagulit ngay fagbaugun sat fagulitan fag bale, ay nataban wan ngay tupa, ngay kambing ay ngay kamelyu. Sanya ginan kanya fagayu noli wan sas Erusalem.