2 Krunika 13 - Fanawbuid tagsibaliwas Fakayabian

Abya nu Gfunan Talun Uda

¹ Gina sis falabi waluk banwa Erubuam nu gfunan sis Israel, Abya gfasigad gfunan sis Uda.

² Kanya gbanwan sis Erusalem, ay nu gfunan tuluk banwa. At mina Maaka, Uryel fag taw Gibya at baguina. Ay Abya ay Erubuam gawayan way gugat.

³ Ay Abya nanamawayan gadgaloan at tagfawayan fag ufatk sandank libuk maseganama, ay Erubuam nafafalganan yangay waluk sandank libuk tagfawayan at maseganama nu gfawayan.

⁴ Ay Abya ay at ngay tagfawayan nu ndasug sas Efraim at fagagbilugun fag ngay buksul, kanya fagayu namalindug sis tungud buksul Semaraim ay nauro Erubuam ay ngay taw Israel ay nalong te, “Dungugani.

⁵ O nunda wam nasaful te, Yawi ngay taw Israel at Dius, wa nawat at nasadian sas Dabid te, siginan tua ban gugat at kasugfunanan at nanfunan talun Israel kabavn?

⁶ Dewa katanya, o Erubuam, Nebat at baguama, nafamabo o am tagfayafun Sulumun, Dabid at baguama.

⁷ Nanangalo emu at mauri fag ngay taw, ay nafawayan am Reubuam, Sulumun at baguama, gina kanya masisian ay gina yud e nagdalanan ay gina yud makatu gfawayan ayu.

⁸ Ay katsi kaylat am namawayan Yawi at fagfunanun, at nafatigwanan sas Dabid at ngay kasugfunanan. Ay kamatungudun am te, ngayu ay tagfawayan, ay gbuba am Erubuam at nafawat fag fagsegan fag riangan baka at mawatan siginans gintu.

⁹ Naiyan am Yawi at ngay tagfon fanggalangun Arun at ngay kasugfunanan, ay ngay taw Lebi, ay nafili am ay sadili tagfon fanggalangun kata tibak talun at fakamulun. Nusnga sinu si ayu at ke baka tama ay at ke fituk tama tupa, nafili wam anya laman ay tagfon fanggalangun sa ay fagsegan at yud mafanud.

¹⁰ “Dewa katanya, emi em Dius Yawi tua, ay wami kamabo anya. Em ngay tagfon fanggalangun tagfakamulun sas Yawi, Arun tua at kasugfunanan, ay ngay taw Lebi ggubuk anya fagayu.

¹¹ Galay balabag ay yabi kanya fagayu gfon sas Yawi at fagirugun fag ngay fanggalangun ay famaebebanglu fag lune. Ay kanya fagayu gfatungkud tinapay sis fagfatungkudan at natuyan te, masine. Ay galay yabi kanya fagayu gfasalung ngay salung at mafatungkudan sis fagfatungkudan mawatan siginans gintu. Gfafasludan ami Yawi em Dius at ngay suguan. Ay am, kamabo wayam anya.

¹² Dius si tua gugat emi, sia wan em tagfangguna. Ay at ngay tagfon fanggalangun gfawang at ngay budyung gina gfangguna emi gina ami namawayan ayu. Ngay taw Israel, lag am gfawayan Yawi, ay ngay mangaguyang at Dius, aroro wa ngap ban am gbabo.”

¹³ Kaduge Abya garingang, Erubuam mangaro e nasugu wan at ngay tagfawayan sa sangay taw Uda at day guyuy laman namawayan.

¹⁴ Dewa katanya, ngay taw Uda nu nalag kanya fagayu nu namawayan, si baliwa at day guyuy ay sit salubangan, kanya naet gubuk sas Yawi. Ay ngay tagfon fanggalangun masakit nafawang at ngay budyung,

¹⁵ ay ngay taw Uda nauro daul gina namawayan. Ay gina kanya fagayu nauro, Dius nababo Erubuam ay at ngay tagfawayan fag ngay taw Israel. Ay Abya ay Uda at ngay tagfawayan nanamafalo anya fagayu.

¹⁶ Ay kanya fagayu nalagyu ay Dius nafababawan anya fagayu sa sangay taw Uda.

¹⁷ Ngayu Abya ay at ngay tagfawayan at nafabul, nu fagayu wan limak sandank libuk tagfawayan Israel at maseganama.

¹⁸ Nu katanya, ngay taw Uda nababo ngay taw Israel, aroro gafanud tua sas Yawi, sat ngay mangaguyang at Dius.

¹⁹ Ay Abya nafafalo Erubuam, ay naago ngay furuan Betel, Esana ay Efrun, ay anggan tagsit ligung fag ngay furuan ayu sirut.

²⁰ Ay kaduge fun Abya gfunan, Erubuam wa nafunan ya. Ay Yawi nafaurianan anya ay anbul.

²¹ Ay ankaksvn yay Abya at fagmafunanun. At mangena labi ufat, ay at baguama duak safulu e dua, ay at baguina labi unum.

²² Ay tiba ya at kinfasludan kaduge Abya gfunan ay at ngay nalong, ay at ngay nafakamulun marirukan sis Iddu fag taglong at fagrirukan.