2 Krunika 12 - Fanawbuid tagsibaliwas Fakayabian

Fun Sisak Nanamawayan sas Erusalem

¹ Nu manabayan wan fun Reubuam nu gfunan, ay nu e fagmabalyananun wan, kanya ay ngay taw Israel nafamabo Yawi at suguan.

² Ay sis falabi limak banwa Reubuam nu gfunan, Sisak Igiptu at fun, nanamawayan Erusalem, aroro ngay taw Erusalem wa matuyan sas Yawi.

³ Ay fun Sisak gadgaloan sadik libu duak sandank faguyudan fangawayan, ay unumk safuluk libuk tagsaful gsakay sis kabayu, ay ngayuk tagfawayan, ay nataban yangay tagfawayan tagsiginan ngay talun Libya, ay Sukut, ay Etiupya.

⁴ Ay fun Sisak nagbilug ngay furuan at ke alad tagsis Uda, ay nanamawayan yangay sas Erusalem.

⁵ Sanya ginan, Semaya fag taglong nalao sas Reubuam ay sas Uda at ngay tagfangguna, at nalagyu sas Erusalem aroro anlimu fun Sisak. Ay kanya nalong sa anya fagayu te, “Katatuy Yawi at longan, ‘Namababawan au ayu sas Sisak aroro nafamabo am angku.’ ”

⁶ Nu katanya, fun Reubuam ay Israel at ngay tagfangguna nafamababaun ay nalong te, “Yawi matuyan.”

⁷ Yawi nu nalag te, kanya fagayu nafamababaun, kanya nalong sas Semaya te, “Aroro kanya fagayu nafamababaun tua, kwa ban namamin anya fagayu, ay wa ban glugo ya gfalfas kyangay ban anya fagayu. Ay kwa ban gfadasug ya ku dotama sas Erusalem siginans Sisak.

⁸ Dewa katanya, namagbilug kban anya fagayu sas Sisak, laman kanya fagayu sumaful te, amasine yap tagfakamulun sa angku abat ngate sa sangay fun sas fagdaul daga.”

⁹ Ay fun Sisak gina nanamawayan sas Erusalem, nabul tagsis Yawi at bale fag ngay ramraman, ay anggan tagsis fun at bale. Ay kanya nabuba yangay Sulumun at nafawat fag ngay famalabag fagayu, at masifigan gintu.

¹⁰ Dewa katanya, fun Reubuam nafawat yay ngay famalabag at mawatan siginans tansu, laman fantubus at nabulan fag ngay famalabag, ay nafaalaga sa sangay fun ayu sirut tagulit fun at sakbawan bale.

¹¹ Ay galay fun Reubuam sas Yawi at bale, ngay tagulit gbuba sanya kafag ngay famalabag, ay nu ntabu wan, gfafoli wan sa sangay tagulit at fagfungsuan.

¹² Ay aroro fun Reubuam nafamababaun tua, Yawi nafalyam tua nu kadotama anya, ay wa nafaksvn nu gfaurianan anya. Kanya e fagmasineun yay sas talun Uda.

¹³ Ay ankaksvn yay fun Reubuam nu gfunan, ay kanya nafataglayun nu gfunan sis Erusalem. Kanya ufatk safulu e sadik banwa gina gfasigad gfunan. Kanya nafunan sis Erusalem kaduge labi fituk banwa, sis Yawi at nafili fag furuan siginan fagayu Israel at ngay gaban laman gfauseganan at ngayan. Reubuam at mina Naama, sik taw Amun.

¹⁴ Reubuam anke fagmauriun, aroro kanya wa kaylat ya nangakbang sas Yawi.

¹⁵ Ay tiba ya at kinfasludan kaduge Reubuam gfunan siginan nu gfasigad sitsigons fakatabuan, anriruk sis Semaya ay Iddu fag ngay taglong at fagrirukan ngay gaban kasugfunanan. Reubuam ay Erubuam gawayan gugat.

¹⁶ Reubuam anbul ay nanamoli anya sis Dabid at furuan. Ay at baguama Abya natubus anya laman sik fun.