2 Krunika 11 - Fanawbuid tagsibaliwas Fakayabian

Semaya at Longan sas Reubuam

¹ Reubuam nu ndasug sas Erusalem, kanya nafaful sadik sandan waluk safuluk libuk tagsaful fia fag tagfawayan siginans fagdaul Uda ay Benamin at kasugfunanan laman namawayan ngay taw Israel ay laman kanya gdog nanfunan kafag ngay taw.

² Ay Yawi nalong sat fagsuguan Semaya te,

³ “Nanlong o sas fun Reubuam, Sulumun at baguama, ay sas fagayu taw Israel tagbanwan sis Uda, ay sis Benamin te,

⁴ ‘Yawi glong te, Lag am gfawayan ay ngay faduksay fag ngay taw Israel. Fagayu am, ulii wan, aroro au wan at nafafasludan fagayu.’ ” Ay kanya fagayu nafaning Yawi at longan ay wa nanamawayan Erubuam.

⁵ Ay Reubuam anfamato yay sis Erusalem, ay nafaogat fia tagsis Uda fag ngay furuan:

⁶ Betleem, Etam, Tekwa,

⁷ Bet-Sur, Suku, Adulam,

⁸ Gat, Maresa, Sif,

⁹ Aduraim, Lakis, Aseka,

¹⁰ Sura, Ayalun, ay Kebrun. Kafag ngay furuan at ke ngay dingding alad tagsis Uda ay sis Benamin.

¹¹ Kanya nafaogat at fagnansarigan ay nafae ngay fun tagfawayan. Ay kanya nafon sa kafag ngay fun tagfawayan ngay fakonun, langis ulibu, ay fanlangu.

¹² Ay kanya nafae famalabag ay nafae ngay bangko kanya fag ngay furuan, famamut at famalabag. Nu katanya, kanya gagbilug way tagfunan sis Uda ay sis Benamin fag ngay furuan.

¹³ Ay ngay tagfon fanggalangun ay taw Lebi tagbanwan sa sangay afud talun Israel nanangasadi wan sas Reubuam.

¹⁴ Kanya fagayu naubun wan at ngay bale ay at ngay daga, ay nasas Uda ay sas Erusalem, aroro Erubuam talamean naiyan kanya fagayu laman Yawi at ngay taglong.

¹⁵ Ay Erubuam nafili at tagfon fanggalangun laman gfakamulun sa sangay bale fagnansegan sa tangabat fag ngay buknga, ay laman sat nafawat fag ngay fagsegan kambing ay baka.

¹⁶ Ay ngay taw Israel tagbanwan sa sangay afud talun Israel, takaylat nangakbang sas Yawi ngay taw Israel at Dius, nanangalo ngay taw Lebi sas Erusalem, laman namon at ngay fanggalangun sas Yawi, sat ngay mangaguyang at Dius.

¹⁷ Ay kanya fagayu nafaogat at fagmafunanun sis talun Uda, ay kaduge tuluk banwa kanya fagayu nagubuk Reubuam, Sulumun at baguama. Ay nafaning Yawi, kata gina Dabid ay Sulumun gfunan.

Reubuam fag Talanan

¹⁸ Ay Reubuam andadwa sas Makalat, Erimut at baguina ay Dabid at fufu, ay sas Abyail, Elyab at baguina ay Ese at fufu.

¹⁹ Reubuam ay Makalat, e tuluk baguama: Eus, Semarya, ay Saam.

²⁰ Ay Reubuam andadwa yangay sas Maaka, Absalum at baguina. Ay at ngay baguama: Abya, Atay, Sisa, ay Selumit.

²¹ Reubuam nu kesug Maaka gtungud yap tua tiba at mangena. Ay nu fagayu wan at mangena, labi walu, ay at mangena fag ngay fagsuguan unumk safulu. Ay at ngay sisian, duak safulu e waluk mangama ay unumk safuluk mangena.

²² Ay kanya nafili at baguama Abya sit mangena Maaka, laman tagfangguna at ngay sisian, aroro kanya kaylat nu kanya ban at nangungbus anya laman sik fun.

²³ Ay Reubuam nafae fanambagun fia masine tiba at ngay baguama, ay nafatigwanan sa anya fagayu at maaladan fag ngay furuan ayu daul, tagsis Uda ay sis Benamin. Ay kanya nafon sat ngay baguama at ngay fagayudanun ay ngayuk mangena laman at ngay mangena.