2 Krunika 1 - Fanawbuid tagsibaliwas Fakayabian

Sulumun Naet sas Dius Fagsafulun

¹ Sulumun, Dabid at baguama nu gfunan sit fagfagtainanan ankaksvn, aroro at Dius Yawi gufud tua anya, ay nafasik mabalyanan.

² Ay Sulumun nafakamatoan fagayu taw Israel, ay ngay tagfangguna ngay tagfawayan, ay ngay tagwabilug, ay fagayu tagfangguna sis Israel, ay fagayu tagfangguna ngay talanan.

³ Sanya ginan, Sulumun ay fagayu taw nalao sas fagnansegan si tangabat fag buknga sis furuan Gibyun, aroro sanya way Dius at bale. Kanya fag Bale, Yawi at taglong Muisis at nafawat sis talun at yud e taw.

⁴ Ay ginanya fag buknga Dabid nafalin wan Dius at Fagsuadan Nasadian, siginans Kiryat-Earim, ay nafasakbo sat nafawat fag bale ramit sis Erusalem.

⁵ Besalel, Uri at baguama ay Kur at fufu, nawat sik fagirugan siginans tansu. Kafag fagirugan si yays Yawi at bale at daga salubangan sis Gibyun. Nu katanya, sanya yay Sulumun ay ngay taw Israel nu nangaful laman nanginto sas Yawi.

⁶ Ay Sulumun naundaud sas fagirugan fanggalangun at mawatan siginans tansu, tagsis Yawi at daga salubangan, tagsit Bale ay kanya nairug sadik libuk fagirugun fag ngay fanggalangun.

⁷ Ay ginanya fag yabi Dius ansure sas Sulumun ay nalong anya te, “Eti nusnga setaw ay gfon kro sa emu.”

⁸ Ay Sulumun nabalus te, “Nafalag o am fagmatuyanun sa ku mama Dabid. Ay katsi nafili o angku laman fantubus anya.

⁹ Ay katsi, Yawi em Dius, fafasludani am fatuyanan sa ku mama Dabid, aroro katsi nafili o angku laman sik fun sa sangay taw takayu ngay lagnas.

¹⁰ Nu katanya, katsi, get au sa emu te, foni angku fagsafulun ay fagmamatanganun, laman ban mafunan au am ngay taw. Sinu nunda at mananfunan am ngay taw ay kanya fagayu ngayu mandi?”

¹¹ Ay Dius nalong sas Sulumun te, “Aroro am naet sa angku fagsafulun tua ay fagmamatanganun, laman mafunan o ku ngay taw, ay nafili au emu laman at fun, ay am naet bunwa ramraman, ay fagmabalyananun, ay wo yangay naet te, fabuli am ngay fawayan, ay fadugei am leleg,

¹² namon au sa emu kata am fagetun. Ay saman ya kanya, namon kyangay sa emu ngay ramraman, ay famauseganan, ebi fag ngay fun at yud yay nagbilug at nangasik ngay fun yay ban at yud ya magbilug.”

¹³ Sanya ginan, Sulumun nalao siginan Yawi at bale, sis buksul Gibyun fag fagnansegan, ay noli wan sas Erusalem. Ay kanya gfunan ngay taw Israel.

Sulumun at ngay Ramraman

¹⁴ Sulumun nafaful ngayuk faguyudan fag fangawayan ay ngayuk kabayu, sadik libu ufatk sandank faguyudan ay labi duak libuk kabayu, ay nafasarirung sat nafili fag ngay furuan ayu daul ay sas Erusalem.

¹⁵ Ay gina Sulumun gfunan, ngay salapi ay gintu sis Erusalem, at kamafanudan kata way lang ngay gang, ay ngay kayu sidru ngayu kata ngay almuyu tagsis fun buksul.

¹⁶ Sulumun nabayad ngay kabayu siginans talun Igiptu ay Silisya. Ay at fagfatigwanan fag ngay taw sanya baliwa, nafon at kasakan fag famayad sa sangay taw sis talun Silisya.

¹⁷ Ay ginanya tagsiginans talun Igiptu fag faguyudan nu kabayad, unumk sandank lifung salapi, ay galay sik kabayu sadik sandan limak safuluk lifung salapi. Ay ngay taw Igiptu nafalo yangay kafag ngay faguyudan, ay fag ngay kabayu sa sangay taw Ket ay sa ngay taw Aram at ngay fun.