2 Fun 9 - Fanawbuid tagsibaliwas Fakayabian

Yeu Ansik Fun sis Israel

¹ Elisyu nafauro sik taglong siginan ngay taglong at fagmafulan ay nalong anya te, “Falganani, bubai sik fagsuadan langis, ay loi sas Ramut-Gilyad.

² Ay nu ndasug o sanya, rvbvyi Yeu, Eusafat at baguama, Nimsi at fufu, ay tabanani anya siginan at ngay ufud ay am yakman lang fagdua tagsakbo sa sik suluk.

³ Sanya ginan, buli sik langis, ay ugwagi sat alfuyu ay longi te, ‘Yawi nalong te, nafili au emu laman Israel at fun.’ Nu nafakamulun wo takatanya, luangi sakbawan ay tarungi wan.”

⁴ Ay kanya fag taglong at mabaguama nalao sas Ramut-Gilyad.

⁵ Ay kanya nu ndasug sanya, nalag ngay fun tagfawayan nu malunggung ay nalong te, “E fansulitan au sa emu, fag fun tagfawayan.” Ay Yeu nainto te, “Dada am fagfatungulan?” Ay kafag taglong nabalus te, “Sa emu.”

⁶ Ay Yeu anlindug ay nasakbo sanya fag bale. Sanya ginan, kanya fag taglong naugwag langis sas Yeu at alfuyu ay nalong te, “Katatuy Yawi, Israel at Dius, at longan: nafili au emu laman ku ngay taw Israel, at fun.

⁷ Namabul o am tagfayafun Akab at talananan. Takatanya mafasud au Esebel nu gfabul ku ngay fagsuguan fag ngay taglong ay tiba ya ku ngay fagsuguan.

⁸ Akab nangus fag talanan umbul wan. Ay kwa kaylat ya nu e gleleg nusnga sinu fag mangama, fagsuguan man ay yud fagsuguan.

⁹ Namakamulun au sas Akab at talananan ku nafakamulun sas Erubuam at talananan, Nebat at baguama, ay sas Baasa, Akya at baguama.

¹⁰ Ngay idu ban kon Esebel sis talun Esreel ay we namoli ya anya.” Ay kafag taglong at mabaguama nu nalong wan takatanya, naluang sakbawan ay natarung wan.

¹¹ Yeu nu nfoli sat ngay ufud fag ngay fun tagfawayan, at sadi fag fun tagfawayan nainto anya te, “O e nfasludan at mauri? Wain kafag tagfansaful at faginkakbangun sa emu?” Ay Yeu nabalus te, “Gtoglag wayam anya, ay saful wayam nu setain nu garingang.”

¹² Ay kanya fagayu nabalus te, “Kamuag o. Foyungi emi at nalong at matuyan.” Ay Yeu nalong te, “Katatuy at nalong sa angku. ‘Yawi, Israel at Dius glong te, Nafili au emu laman Israel at fun.’ ”

¹³ Ay kafag ngay fun tagfawayan nu nadungug, kanya fagayu nabul at ngay lanbung tangaba ay naigyan sas agdan laman sas Yeu. Ay kanya fagayu nafawang at budyung ay nauro te, “Yeu tam fun.”

Yeu Nafabul Uram ay Aasya

¹⁴ Yeu, Eusafat at baguama, Nimsi at fufu, anke algan at mauri sas Uram. Ginanya, Uram ay taw Israel at ngay tagfawayan sis Ramut-Gilyad laman ggubuk sanya fag ngay taw laman gfawayan Kasael, Aram at fun.

¹⁵ Ay Uram natayukan gina gfawayan ngay taw Aram, ay kanya noli wan sas Esreel laman namafia. Ay Yeu nalong sat ngay ufud fag ngay fun tagfawayan te, “Nu kaylat am nu sik fun au, lag am kaylat nu e glao sas Esreel laman namansulit te, nafili am angku sik fun.”

¹⁶ Yeu masakit nasakay sat faguyudan ay nasas Esreel nu inda Uram nu gfafian. Ginanya, fun Aasya sanya yangay aroro nanansibo Uram.

¹⁷ Ay tagulit sis Esreel at fagulitan fag bale ngabat nalag Yeu nu kadasug gadgaloan at ngay tagfawayan, ay kanya nauro te, “E kadasug sik ngay tagfawayan!” Ay Uram nabalus te, “Sugui tagsaful gsakay sis kabayu, laman nanginsaful te, o fagmabayanun tua at fagnastaeun?”

¹⁸ Nu katanya, tagsaful gsakay sis kabayu nalo wan laman namablang Yeu ay nalong te, “Fun kaylat gyasafulun te, o fagmanabayanun tua ay fagnasteun?” Ay Yeu nainto te, “Nataw am fagsafulun sabaliwas fagmanabayanun? Aloi angku.” Ay tagulit nauro sat fun te, “Am nasugu fag tagsaful gsakay sis kabayu andasug oma, ay newa ya kafoli.”

¹⁹ Ay fun nasugu sadi yak tagsakay sas kabayu. Ay kanya nu ndasug sas Yeu nalong te, “Em fun kaylat gyasafulun te, o fagmanabayanun tua ay fagnastaeun.” Yeu nalong te, “Nataw am fagsafulun sabaliwas fagmanabayanun? Aloi angku!”

²⁰ Tagulit gdog yay nafauro at fun te, “Andasug wa sanya at faduak tagsakay sas kabayu, ay anggan kanya ya kafoli! Kanya fag mangama tagfatarung at faguyudan nafasakit mandi kata Yeu, Nimsi at fufu nu gfatarung kabayu at ke faguyudan!”

²¹ Uram nalong te, “Falganani ku faguyudan at ke balingkitan.” Ay nu nafalganan wan, Israel at fun Uram ay Aasya, Uda at fun, nalo wan laman namablang Yeu. Kanya fag dua gsakay sit mesa faguyudan. Kanya fagayu ay Yeu nablangan sis Nabut fag taw Esreel at daga.

²² Uram nu nalag Yeu, kanya nainto te, “Yeu, o fagmanabayanun tua am fagnastaeun?” Ay Yeu nabalus te, “Kabavn ban wam kae fagmanabayanun ya kaduge ban am gseg tibak fagsegan siginan am mina Esebel at nafasigad ay at nafafagdaul fag fagmauriun.”

²³ Uram nafabiling tagguyud anya fag kabayu ay masakit nu gfatarung. Ay Uram nauro Aasya te, “Yeu nafamabo anta.”

²⁴ Yeu nabul at godun ay nafana Uram sit wabilug lafi. Banyas natalfus sat baga ay kanya antaygilid sit sakayan fag faguyudan.

²⁵ Yeu nalong sat fun tagfawayan, Bidkar, te, “Namul o Uram at bilug ay nangukas o sas Nabut fag taw Esreel at gamasun. O gamatang yay o ebi gina ta gfadgaloan Akab at mama? Katatuy Yawi at nalong sabaliwa anya:

²⁶ ‘Egmenit nalag au Nabut talamean at taguk.’ Yawi nalong te, ‘Gfaurianan au Akab sis Nabut at daga.’ Nu katanya, namul o Akab at bilug ay nangukas o sas Nabut at daga kata Yawi at longan.”

²⁷ Ay Aasya, Uda at fun, nu nalag at kinfasludan, kanya nalagyu sas furuan Bet-Agan. Ay Yeu gfafalo anya ay guro te, “Fanai yangay anya!” Nu katanya, kanya fagayu nafana Aasya sit sakayan fag faguyudan sangaba dalan tagsas Gur, munakbang sis Ibleam. Kanya natayukan ay nalagyu ay andasug sas Megidu, ay sanya wan nu kabul.

²⁸ Ay at ngay fagsuguan naurug Aasya at bilug ay nafasakay sat sakayan fag faguyudan ay nabuba sas Erusalem ay nanamoli anya sas Dabid at furuan sis fagfolian at ngay mangaguyang.

²⁹ Gina sis falabi sadik banwa Uram, Akab at baguama nu gfunan sis Israel, Aasya ansik fun sis talun Uda.

Nafabul Esebel

³⁰ Gina Yeu nalao sas Esreel, Esebel nasaful ay nararus sat mata sik famasine, ay nafasine fia at buk ay gbanawan sis fagbanawanan.

³¹ Yeu gina gsakbo sis fun at sakbawan bale, Esebel nalong anya te, “O fagmanabayanun tua am fagnastaeun, o fag takamabul? Kata o Simri at nafabul at tagfayafun!”

³² Yeu natangda ay nalag Esebel sis fagbanawanan ay nainto te, “Sinu tagfadiuganan angku?” E dua ay mannga tuluk fagsuguan tagbanawan anya sis fagbanawanan.

³³ Yeu nalong sanya fagayu te, “Fatongi anya!” Ay kanya fagayu nafatong Esebel. Ay ngay kabayu nasiad anya, ay at taguk naramsig sas alad ay sa sangay kabayu.

³⁴ Ay sanya ginan Yeu nasakbo sas fun at bale ay nafangon ay nainum sanya. Ay kanya nalong te, “Namul am kanya fag mangena at natuyan te, nafauri, ay namoli am anya aroro kanya sik fun at baguina.”

³⁵ Dewa katanya, kanya fagayu gina namul at bilug laman namoli, at lagan at bini way lang, at ngay darafa ay at ngay daluap.

³⁶ Nu katanya, kanya fagayu anfoli sas Yeu ay nalong at nalag, ay Yeu nalong te, “Anfasludan Yawi at longan siginan at fagsuguan Elyas fag taw Tisbe te, ‘Tagsiginan Esreel at talun, ngay idu kon Esebel at bilug.’

³⁷ Kafag mangena at bilug anrapyag kata sik masuya sas Esreel at gamasun ay we toglag ya anya.”