2 Fun 8 - Fanawbuid tagsibaliwas Fakayabian

Sik Mangena Tagsiginans Sunem Noli

¹ Elisyu nafakamatoan at nafaleleg fag munama at mina te, “Tabanani am sisian ay loi sa tibak talun aroro Yawi ban namae fanlunus sas Israel kaduge fituk banwa.”

² Nu katanya, kafag mangena nafaning Dius at fagsuguan at longan. Ay talanak nalo wan, ay nanamanwan sa sangay taw Filistia at talun kaduge fituk banwa.

³ Ay nu nlangfe fituk banwa, talanak noli sas Israel ay nalao sas fun laman namainfanyuan te, fafolii wan sa anya at bale ay at daga.

⁴ Gina talanak gsakbo, at fun gfakamatoan Gekasi, Elisyu at fagsuguan ay glong te, “Longi angku Elisyu at ngay nafakamulun nusnge wain at madulo.”

⁵ Ay gina Gekasi glong sas fun nu setain Elisyu nu gfaleleg kafag munama at kinbul, kafag munama at mina ankakbang sas fun ay gfainfanyuan te, “Gubuki angku ay fafolii wan sa angku ku bale ay ku daga.” Gekasi nalong te, “Mesug fag fun, in ku nalong fag mangena ay in at munama Elisyu at nafaleleg.”

⁶ Ay fun nainto kafag mangena sabaliwa nu gfaleleg at munama, ay kafag mangena nafoyung sas fun at kinfasludan, ay fun nafauro at sadi at tagfakamulun laman ggubuk kafag mangena. Fun nalong sa kafag tagfakamulun te, “Gubuki anya ay fafolii fagayu at nalyam si anya, anggan nu seyu at nagbulan siginan at gutluan, siginan nu glao ste ginan dasug katsi.”

Kasael Nafabul Ben-Adad

⁷ Sanya ginan, Elisyu nalao sas furuan Damasku, sas talun Aram, ay ginanya antunggu fun Ben-Adad, Aram at fun nu e fakasaitun. Ay kafag fun nu nadungug te, Dius at fagsuguan andasug,

⁸ kanya nalong sas Kasael te, “Bubai sik famonun ay namablang o Dius at fagsuguan. Longi anya te, ‘Intoi sas Yawi te, o kafia yay ban ku fakasaitun?’ ”

⁹ Ay Kasael nalao sas Elisyu ay gtabanan ufatk safuluk kamelyu e buba at mafamilian fag ngay famaloun siginans Damasku laman at fon sas Elisyu. Ay kanya nu ndasug sas Elisyu, nalong te, “Am fagsuguan Ben-Adad, Aram at fun, nasugu angku, laman nanginto emu te, o kafia yay ban at fakasaitun?”

¹⁰ Ay Elisyu nabalus te, “Ulii wan ay nanlong o anya te, ‘Sabv, kafia yay ban.’ Dewa katanya, Yawi nalong sa angku te, kanya ban kabul way.”

¹¹ Elisyu gdama Kasael ay Kasael ankapla. Ay sanya ginan, Elisyu nawayway.

¹² Ay Kasael nainto anya te, “Fagtainan, wain am fagwaywayun?” Ay Elisyu nabalus te, “Aroro nasaful au te, gfakamulun ban o at mauri sa sangay taw Israel. Girug ban o at mogat fag ngay furuan, ay gagbilug ban o am fiso laman am famabul tagsanya fag ngay baguama. Namafalang ban o at ngay sisian, ay gbaltak ban o ngay tagfafion at ngay ungdan.”

¹³ Kasael nainto te, “O nunda sik idu au? Tain ban nu mafakamulun au takatanya?” Ay Elisyu nabalus te, “Yawi nafasaful sa angku te, umsik fun ban o sas talun Aram.”

¹⁴ Kasael nalo wan ay anfoli sat tagfayafun, Ben-Adad. Ay fun Ben-Adad nainto anya te, “Nataw Elisyu at nalong sa emu?” Ay Kasael nabalus te, “Kanya nalong angku te, anud wan kafia yay ban o.”

¹⁵ Ay balabag di, Kasael nabul sik madamvl fag ramit, ay nafasurung sasad mamam ay natabun at fun at kamatan ay nafabul. Nu katanya, Kasael natubus anya laman Aram at fun.

Euram nu Gfunan Talun Uda

¹⁶ Eusafat at baguama Euram ansik fun sis Uda, gina Uram at falimak banwa nu gfunan sis Israel. Uram, Akab at baguama.

¹⁷ Euram tuluk safulu e duak banwa gina gfasigad gfunan. Ay kanya gbanwan sis Erusalem, ay nu gfunan waluk banwa.

¹⁸ Kanya nafaning Israel at ngay fun at ugali, kata Akab fag talanan at nafakamulun, aroro kanya nabubay Akab at baguina. Euram nafakamulun at mauri sis Yawi at daga salubangan.

¹⁹ Yawi wa kaylat gfamin ngay taw Uda aroro kanya nawat sik nasadian sas Dabid te, at ngay kasugfunanan ban gfunan tua gugat.

²⁰ Gina Euram gfunan, ngay taw Edum nafamabo Uda, ay kanya fagayu nafili sik taw laman at fun.

²¹ Nu katanya, Euram ay at ngay tagsaful gsakay sis faguyudan fangawayan nalangfe Sair fag furuan ay nasas Edum. Ay ngay taw Edum naligung anya fagayu. Dewa katanya, nu nyabi wan kanya fagayu nafawayan ngay taw Edum, ay kanya fagayu nalagyu, ay anfoli sat ngay bale ramit.

²² Ay dasug katsi ngay taw Edum kamabo yay gugat ngay taw Uda. Ay ginanya anggan ngay taw Libna nafamabo yangay.

²³ Ay tiba ya at kinfasludan kaduge Euram gfunan ay fagayu at nafakamulun anriruk sis fafil fagrirukan sabaliwas Uda at ngay fun.

²⁴ Uram nu nbul wan, nanamoli anya sas Dabid at furuan daul ay at baguama Aasya at natubus anya laman sik fun.

Aasya nu Gfunan Talun Uda

²⁵ Aasya, Euram at baguama ansik fun sis talun Uda, gina labi duak banwa Uram nu gfunan sis Israel. Uram, Akab at baguama.

²⁶ Aasya nu gfasigad gfunan, at banwa duak safulu e dua. Ay kanya gbanwan sis Erusalem, ay nu gfunan sadik banwa. At mina Atalya ay at fufuama Umri, Israel at fun.

²⁷ Ay Aasya nafaning Akab fag talanan at ugali. Kanya nafakamulun at mauri sis Yawi at daga salubangan kata Akab fag talanan at nafakamulun, aroro kanya nafamubay Akab at kalongan at sadi.

²⁸ Aasya nanangalo Uram, Akab at baguama laman namawayan Kasael, talun Aram at fun. Ay kanya fagayu nawayan sis Ramut-Gilyad ay Uram natayukan.

²⁹ Nu katanya, kanya noli yay sas furuan Esreel laman namafia at natayukan, ay kaduge sanya, Aasya, Uda at fun gsibo anya.