2 Fun 7 - Fanawbuid tagsibaliwas Fakayabian

¹ Elisyu nalong te, “Dungugani Yawi at longan: balabag ban kata katsi fag buknga, umkagan wan nu kabayad nusnge wain sis Samarya, sadik tasan fangawat tinapay nu kabayad sadik salapi way lang, ay katanya yangay duak tasan barli.”

² Fun at fagadgalangan fag fagsuguan nalong sas Elisyu te, “Yawi ro dewa nafarak maksvn, wa mfasludan kata am longan.” Ay Elisyu nabalus te, “Lumag ro wo te, matuyan umfasludan takatanya, ay wa ro wo naon nusdi alay.”

Ngay Taw Aram Anragang nu Gfawayan

³ Ay e ufatk taw ke bangbang malunggung sis sakbawan furuan, gkamatoan te, “Wain tam fagmalunggungun lang ste nangabul?

⁴ Nu nasakbo ro tam sas furuan, umbul tam sas lunus, ay nu ste way ngap ro tam gugat malunggung umbul yangay ro tam. Nu katanya, glao watam ay nansuyu sa sangay taw Aram. Siwa ro anya nu gfabul wan antam o mannga dia.”

⁵ Ay ginanya fag yabi, kanya fag ufatk taw nalo sa sangay taw Aram at fagmafulan, ay nu ndasug sanya wa mangaro e taw.

⁶ Aro taw wan, Fun Dius nu gfadungug sas Aram at ngay tagfawayan sik ngay faguyudan ay sik ngay kabayu ay sik ngay tagfawayan nu kadkalungan. Ay kafag ngay tagfawayan nu nadungug, nakamatoan te, “Israel at fun nabayad taw Ket ay taw Igiptu at ngay fun laman namawayan antam.”

⁷ Nu katanya, gina gakayabiun kafag ngay tafawayan nalagyu ay naubun at ngay bale ramit, at ngay kabayu, ay at ngay asnu, ay naubun yangay at fagmafulan laman gfalangfe at ngay sadili.

⁸ Ay kafag ufatk taw tagabangbang nu ndasug sa sangay taw Aram at fagmafulan, nadalanan nasakbo sa kafag ngay bale ramit ay nafangon ay nainum ay nabul ngay salapi ay gintu ay ngay lanbung ay nasuksuk.

⁹ Ay arodi, kanya fag ufat nakamatoan te, “Wa masine takatatuy tam fakamulun. Tuy sik masine fag barita, nu katanya namoyung yap tam sa tam ngay iba. Nu balabag ya ban nu nanlong tam, anud gfaurianan ban antam. Katsi glao watam sas fun at bale ay namasaful tam sa anya.”

¹⁰ Nu katanya, kanya fagayu anfoli wan sas Samarya ay nauro sa sangay tagulit sakbawan ay nalong te, “Nalo ami sa sangay taw Aram at fagmafulan ay we taw ya, nu bunway em nalag at ngay kabayu way lang ay at ngay asnu masiukan, ay at ngay fagagbilugun mafasakboan sit ngay bale ramit.”

¹¹ Nu katanya, kafag ngay tagulit nauro, ay nabarita sa sangay taw tagsis fun at bale.

¹² Ginanya fag yabi at fun anlunggung ay nalong sat ngay fun tagfawayan te, “Glong au ayu ngay taw Aram at ngay algan. Kanya fagayu saful wa te, kalunus tam, nu katanya, naubun wan at fagmafulan ay nasuksuan sat ngay gamasun ay gamatangan te, ‘Ngay taw Israel ro nu nalo wan siginan at furuan, nanggamat ro tam anya fagayu, ay gsakbo ro tam sat furuan.’ ”

¹³ Ay at sadi at fun tagfawayan nabalus te, “Gsugu yap tam nu seyuk taw laman nanginsaful at kinfasludan. At sakayan ro at sawad fag limak kabayu. Nusnga setaw ro at kumfasludan sa anya, katanya wan, nu gamut ban kanya fagayu gfasfuan antam kabul.”

¹⁴ Nu katanya, kanya fagayu nafalganan duak kabayu at ke ngay faguyudan, ay fun nasugu kafag ngay mangama laman nanginsaful te, setain fia at kinfasludan sa sangay taw Aram at ngay tagfawayan.

¹⁵ Kanya fagayu naguyan ngay taw Aram sitsigons Liskung Urdan ay nalag sad dalan ngay taw Aram at naukas at ngay fagagbilugun ay at ngay lanbung aroro gabanganan glagyu. Ay kafag ngay fagsuguan anfoli ay nafasaful sat fun.

¹⁶ Sanya ginan, ngay taw tagbanwan sanya fag furuan nalao sa sangay taw Aram at fagmafulan ay nabul at ngay fagagbilugun at mafanud. Nu katanya, anfasludan Yawi at longan te, “Anud, sadik tasan fangawat tinapay nu kabayad sadik salapi way lang, ay katanya yangay duak tasan barli.”

¹⁷ Fun nafili at fagadgalangan fag fagsuguan laman gulit furuan at sakbawan. Gina ngay taw gtarung, kafag fagsuguan antaygilid ay nasiadan ay anbul wan kata Dius at fagsuguan Elisyu at longan gina at fun nalao sa anya.

¹⁸ Anfasludan yangay Dius at fagsuguan at nalong sas fun te, “Balabag ban kata katsi fag buknga, sis Samarya at fungsuan nu kabayad umkagan, sadik tasan fangawat tinapay nu kabayad sadik salapi way lang, ay katanya yangay duak tasan barli.”

¹⁹ Kafag fagsuguan gina yay gleleg nalong te, “Yawi ro dewa nafarak maksvn, wa mfasludan kata am longan.” Ay ginanya, Elisyu nabalus te, “Lumag ro wo te, matuyan umfasludan takatanya, ay wa ro wo naon nusdi alay.”

²⁰ Kata kanya at kinfasludan sa kafag fagsuguan, kanya antaygilid sis sakbawan ay nasiadan ay anbul.