2 Fun 5 - Fanawbuid tagsibaliwas Fakayabian

Nafafia Naaman at Bangbang

¹ Talun Aram at fun gsuyu Naaman fag fun tagfawayan, aroro Yawi nagbilug Naaman laman gfababo ngay taw Aram. Kanya sik maseganama fag tagfawayan, dewa katanya, kanya gabangbang.

² Aram at ngay tagfawayan nafawayan Israel, ay nataban sik baguina, ay Naaman at mangena nafagsuguan kafag baguina.

³ Sik menit, kanya fag baguina nalong sat tagfayafun te, “Ku tagfayafun Naaman nu nalao di sas Samarya laman nanlag sanya fag taglong, gfafia ro at bangbang.”

⁴ Naaman nalao sas fun ay nafoyung kafag baguina tagsiginans Israel at nalong anya.

⁵ Aram at fun nalong te, “Loi wan, bubai ku rirukan sas Israel at fun.” Nu katanya, Naaman nalao gbuba at famonun tuluk sandan limak safuluk fabudbungguan salapi ay fituk safuluk fabudbungguan gintu ay safuluk lanbung.

⁶ Katatuy at buba fag rirukan: “Nasugu au sanya ku fagsuguan Naaman laman namafia sa emu at bangbang.”

⁷ Ay Israel at fun nu natap kafag rirukan, nagirat at lanbung ay nalong te, “Wain at fagnafastieun tuy fag taw at ke fakasaitun? O nunda Dius au? Ay o e fagmabalyananun au gfabul ay gfaleleg? Kanya at balyawvtan way laman namawayan angku.”

⁸ Dius at fagsuguan Elisyu nu nasaful at kindasug, kanya nafadasug sik rirukan sas fun te, “Wain am fagnagiratun am lanbung? Fastei kafag taw laman kanya sumaful te, e taglong sis Israel.”

⁹ Nu katanya, Naaman nalao wan gsakay sit kabayu at faguyudan, ay anragang sis Elisyu at aturunan sakbawan.

¹⁰ Elisyu nasugu at fagsuguan at sadi laman nanlong sas Naaman te, “Loi sas Liskung Urdan ay asurungi fitu ginan ay umfia ro wo.”

¹¹ Dewa katanya, Naaman andotama ay nalao wan, ay glong te, “Nu glong kro kafag taglong gduksun laman nansalubang angku, ay nandarangin sas Yawi, ay sanya ginan ro gfoli at daluap sa ku bangbang laman gfafia.

¹² Liskung Abana ay Farpar fag duak liskung tagsis Damasku, amasine yap tua tagsis Israel fag ngay liskung. Wain fagyudun sanya nu nangigus au laman umfia au?” Nu katanya, kanya nalao gindotaman.

¹³ Dewa katanya, at ngay fagsuguan ankakbang ay nalong te, “Tagfayafun, o nunda taglong nu e fafakamulun emu, o wo gfaning? Dewa katanya, wain am fagyudun gfakamulun at nalong te, asurungi ay kafia ro wo?”

¹⁴ Nu katanya, Naaman nalao sasad Liskung Urdan ay antalgub fitu ginan kata Dius at fagsuguan at longan. Ay at bangbang anfia wan, ay at balat andalusan kata sik ngenge at balat.

¹⁵ Sanya ginan, Naaman ay at ngay fagsuguan anfoli sas Dius at fagsuguan. Kanya namalindug sis Elisyu at daga salubangan ay nalong te, “Katsi, nasaful au te, sas fagdaul daga we tibak Dius sas day Israel at Dius. Nu katanya, fagtainan, aylati ku ngay famonun sa emu.”

¹⁶ Ay Elisyu nabalus te, “Gfatuyanan au sas Yawi, tagleleg fag Dius ku fagfaningun te, kwa gbul nusnge wain am famonun.” Ay Naaman nafabulun te, “Dewa, aylati wan.” Dewa katanya, Elisyu wa naylat.

¹⁷ Naaman nalong te, “Nu dway o kaylat ku famonun, foni way lang angku sik lutuk ku mola fagdua at fagmadun ay gbuba au sa em talun. Siginan katsi, kwa ban gfon ya fagirugun fag fanggalangun ay tiba yak fanggalangun sa tibak fagsegan, sa tua bans Yawi.

¹⁸ Yawi ro nangus gfalyam wan ku asalanan gina au nangalo ku fun sas fagsegan Rimun at bale. Ay Yawi ro nangus gfalyam tua ku asalanan dewa au nanantudan sanya.”

¹⁹ Ay Elisyu nalong te, “Loi wan manabayan.” Ay Naaman gina yud yay anyayu,

²⁰ Gekasi namatangan te, “Ku tagfayafun nangus wa naylat Naaman fag taw Aram nu glao yakmay nabul at famonun. Gfatuyanan au sas Yawi, tagleleg fag Dius te, nangguyan au anya ay namul at famonun.”

²¹ Nu katanya, Gekasi gabanganan nangguyan. Ay Naaman nu nalag Gekasi nu gtarung sa anya, natustus siginan at sakayan fag faguyudan, ay nafablang anya ay nainto te, “O e nfasludan at mauri?”

²² Gekasi nabalus te, “Duan. Ku tagfayafun nasugu angku laman nanlong sa emu te, e duak taglong mabaguama andasug tagsiginans Efraim at fagagbilugun fag ngay buksul. Foni anya tuluk safulu e limak fabudbungguan salapi, ay duak lanbung.”

²³ Ay Naaman nalong te, “Kin, bubai tuy fag fituk safuluk fabudbungguan salapi.” Ay kanya nafabulun sas Gekasi te, “Aylati.” Ay Naaman nasuad at fon fag salapi sat fagsuadan fagdua magamut at buba fag duak lanbung. Ay Naaman nafon sat fagsuguan fagdua ay kafag dua nafon sas Gekasi.

²⁴ Ay kafag duak fagsuguan nu ndasug sas buksul, Gekasi nabul at ba fagsuadan, ay nalong sas duama te, “Afolii wan.” Sanya ginan, Gekasi nabuba sat bale kafag ngay famonun ay nafasuksuk.

²⁵ Kanya nu nalo sas Elisyu, Elisyu nainto anya te, “Gekasi, daginan o?” Ay Gekasi nabalus te, “Ste kway gugat.”

²⁶ Ay Elisyu nalong te, “O wo nasaful te, ku falad galo emu gina Naaman gduksun siginan at sakayan fag faguyudan laman namablang emu? Katsi bunya buknga laman gbul salapi, lanbung, tanuman ulibu, ay tanuman wat ubas, ngay baka, tupa, ay ngay fagsuguan.

²⁷ Nu katanya, aroro nafakamulun takatanya, Naaman ro at bangbang umtayuk sa emu, anggan ban sa am ngay kasugfunanan kabavn.” Ay Gekasi nu nalao, kanya anke bangbang ay at balat anlaksi.