2 Fun 4 - Fanawbuid tagsibaliwas Fakayabian

Sik Fagbubayun at Langis Anfamut

¹ E sik fagbubayun, ebi ataw at mangama sik taglong. Sik menit kanya naet sas Elisyu sik fanggubukun. Nalong te, “Ku mangama, ebi am fagsuguan at sadi, anbul wan, ay nasaful wo te, kanya nafaning tua Yawi. Katsi at fagbedanan fag taw andasug laman namul ku sisian fag duak mangama laman nanfagsuguan tuga famayad at mama at bedan.”

² Elisyu nalong anya te, “Tain ro ku fagmagubukun emu? Longi angku, nataw ya am ramraman sim bale?” Kanya fag fagbubayun nabalus te, “Fagayu namin wan sangay sik langis ya sirut si em fagsuadan.”

³ Elisyu nalong te, “Loi sam ngay fasabale ay nangulbus o at ngay fagsuadan langis.

⁴ Am fag talnayan sakboi say bale ay dingdingi ay sakbawan. Talini langis sas fagayu fagsuadan. Galay sik fagsuadan at kinkapnu fasariui wan.”

⁵ Nu katanya, kanya fag mangena nafakamulun Elisyu at suguan ay kanya nadingding at sakbawan. Ay at duksay nabuba sa anya ngay fagsuadan ay kafag mangena natalin langis.

⁶ Ay fagayu at ba fagsuadan, nu nkapnu wan, kanya nalong sat duksay te, “Fastiei at sadik fagsuadan.” Ay duksay nabalus te, “We fagsuadan ya.” Ay langis nu ganting anragang wan.

⁷ Ay kanya fag fagbubayun nalao sas Elisyu, Dius at fagsuguan, ay nafoyung at kinfasludan sa anya. Elisyu nalong anya te, “Loi wan namalao wo langis, ay bayadi am bedan. Ay am nagbulan ban e sawad yay laman ban famul ay ngay fagayudanun.”

Elisyu ay sik Mangena tagsis Sunem

⁸ Sik menit, Elisyu nalao sas Sunem. Ay sanya e sik mangena at maramraman, ay kanya nafafangon Elisyu. Siginan ginanya, Elisyu galay gdalan sas Sunem, gdalan gugat sanya fag mangena at bale laman nanfangon.

⁹ Sik menit, kafag mangena nalong sat mangama te, “Nasaful au te, tagdalan gugat stie sa antam, Dius at fagsuguan at yud e malong.

¹⁰ Namawat wata sik suluk sirut laman sa anya, sat tungud fag salug, ay namasakbo ta sanya sik fagtiugan, sik fagfatungkudan, sik faglunggungan ay sik salung, laman kanya nu nastie e fagtaglayunan tua.”

¹¹ Sik menit, Elisyu nalao sas Sunem, ay nasakbo sat fagtaglayunan fag suluk ay nafiangalay sanya.

¹² Ay kanya nasugu at fagsuguan, Gekasi, laman nanguro kafag mangena. Nu katanya, Gekasi nauro kafag mangena, ay kanya andasug.

¹³ Ay Elisyu nalong sat fagsuguan te, “Kafag mangena masine tua nu galaga anta, nu katanya nanginto o sa anya te, nataw at fakaylatun ta fagnamakamulunun sa anya? O kaylat nu namakamatoanan au tam fun ay mannga fun tagfawayan laman sa anya?” Kanya fag mangena nabalus te, “Wami e fagayudanun; manabayan tua nu mabanwan ami gasfuan em ngay iba.”

¹⁴ Elisyu nainto sas Gekasi te, “Nataw at fakaylatun ta fagnamakamulunun?” Ay Gekasi gbalus te, “Kafag dadwa we baguama ay at mangama mafagtainan wan.”

¹⁵ Elisyu nalong te, “Dogi yap uroi anya.” Nu katanya, Gekasi nauro anya ay kanya fag mangena namalindug sis sakbawan.

¹⁶ Ay Elisyu nalong sa anya te, “Fadogan ban fag banwa, gina ban kata katsi fag buknga, e faguruganun ban o sik munama.” Ay kanya fag mangena nabalus te, “Fagtainan, Dius at fagsuguan, lag o kamuag sa angku.”

¹⁷ Ay kata Elisyu at nalong, kanya fag mangena nafafion ay nafasalug sik munama ginanya mandi fag buknga at fadogan fag banwa.

¹⁸ Ay kafag sisian nu n-gurang wan, sik menit kanya nanangalo at mama ay at ngay taggutlu.

¹⁹ Ay nu ndasug sat gamasun, kanya nalong sat mama te, “Kasait au ku alfuyu! Kasait au ku alfuyu!” Ay at mama nalong sat fagsuguan te, “Bubai anya sat mina!”

²⁰ Ay at fagsuguan nabuba kafag sisian sat mina. At mina nasalilian anya sitsigons wabilug menit ay kafag sisian anbul.

²¹ Ay kanya fag mangena nabuba at sisian sas Elisyu at suluk ay nafatukan sat fagtiugan. Ay kanya naduksun siginan sad suluk ay nadingding sakbawan.

²² Kafag mangena nauro at mangama ay nalong te, “Fastiei sik fagsuguan ay sik sakayan asnu laman masakit nu glao au sas Dius at fagsuguan ay laman makafoli ktua vtv.”

²³ Ay at mangama nainto te, “Wain fagkatsiun yay nu glao o? Katsi bunwa fagmafulun sabaliwa Magdanun nu Bagu Kasure ay bunwa Famiangalay fag Menit.” Ay at mangena gbalus te, “Dewa ro.”

²⁴ Nu katanya, kanya nafae faglunggungan sis asnu at tungud guyuy, ay nalong sat fagsuguan te, “Fasakiti! Lag gfaragang yakmay au glong emu.”

²⁵ Nu katanya, kanya fag dua nalo wan, ay andasug sas buksul Karmel aroro sanya Dius at fagsuguan. Ay Elisyu nu nabanawan kafag mangena nu kadasug, kanya nalong sat fagsuguan Gekasi te, “Damai, tagsiginans Sunem fag mangena kadasug.

²⁶ Tarungi ay namablang o anya, ay nanginsaful o te, o manabayan at talame.” Kafag mangena nalong sas Gekasi te, “Manabayan tua.”

²⁷ Ay kanya fag mangena nu ndasug sas Elisyu sas buksul Karmel, kanya narungan ay nated Elisyu at darafa. Ay Gekasi ankakbang laman namayayu anya, ay Elisyu nalong te, “To sanya! Kanya e fakabaluun. Yawi we nalong sa angku te, nataw at fakabaluun.”

²⁸ Ay kanya fag mangena nalong te, “Fagtainan, kwa naet sa emu sik munama, o way at nalong te, umke sisian kban, ay nalong kyangay emu te, ‘Lag kamuag.’ ”

²⁹ Elisyu nu nasaful te, kafag munama anbul wan, nalong sas Gekasi te, “Falganani, loi sat bale. Bubai wa ku tulag ay sakiti tua. Dewa e nafablang emu, lag o kasalag, ay nu e ginsaful emu, lag o gbalus ya. Ay nu ndasug o, fatungkudi ku tulag sanya fag sisian at kamatan.”

³⁰ Ay kanya fag mangena nalong sas Elisyu te, “Gfatuyanan au sa emu ay sas Yawi, tagleleg fag Dius te, kwa ro guli nu dway o galo angku.” Nu katanya, Elisyu nanangalo anya.

³¹ Gekasi naguna ay nafatungkud at tulag sanya fag munama at kamatan. Dewa katanya, kanya fag munama wa naringang ay wa nalelegan. Ay Gekasi anfoli sas Elisyu ay nalong te, “Kafag munama wa naleleg.”

³² Elisyu nu ndasug sanya fag bale, nalag kafag sisian nu gtukan sit igyan.

³³ Ay Elisyu nasakbo ay nadingding at sakbawan ay gdarangin sas Yawi.

³⁴ Ay kanya namalub sanya fag munama at tungud, ay nafatayuk at bibig sanya fag munama at bibig, ay at mata sanya fag munama at mata, ay nafoli at daluap sanya fag munama at daluap. Ay kaduge kanya malub, kafag munama at bilug garimanan kaenbung.

³⁵ Elisyu namalindug ay nafoyfolian sisad basad suluk. Nadog yay namalub sa kafag munama. Ay kafag munama nafaslik fitu ginan ay nafandama.

³⁶ Nu katanya, Elisyu nauro Gekasi ay nalong te, “Uroi at mina.” Ay kanya nananguro. Ay kafag mangena nu ndasug, Elisyu nalong te, “Tabani wan am sisian.”

³⁷ Ay kanya fag mangena narungan sas Elisyu at daga salubangan laman gfauseganan. Sanya ginan, kanya nataban wan at sisian ay nalao wan.

At Madulo Gina e Fanlunus

³⁸ Gina Elisyu kafoli sas talun Gilgal, sanya fag talun anke fanlunus maksvn. Sik menit, kaduge ngay taglong maful gkamatoan, Elisyu nalong sat fagsuguan te, “Salei tagbia fag tikung ay fatamai sik fakonun ke sabo laman sa kafag ngay taglong.”

³⁹ Ay at sadi nalao sas gamasun laman namul ngay langbud rabung. At nalag sanya sik wat glangfad. Ay kanya narabas kafag wat at ngay rawvg ay nasuad sat lanbung. Ay nu noli, kanya naramyuk ay nasuad sas tikung, ay wa nasaful te, kafag rawvg maganga.

⁴⁰ Ay kafag sineud nu ntama wan, nafafudan sanya fag ngay taglong. Ay kanya fagayu gina nanfangon, guro te, “Dius at fagsuguan, em fakonun maganga way.” Ay kanya fagayu wa naon ya.

⁴¹ Elisyu nalong te, “Namul o sik fangawat tinapay.” Kanya nasuad at ba fangawat tinapay sas tikung ay nalong sat fagsuguan te, “Foni sa anya fagayu.” Ay kanya fag fakonun wa maganga ya.

⁴² Sik menit, sik mangama tagsiginans Baal-Salisa nabuba sas Elisyu sik saku e bilug duak safuluk tinapay at fangawat taguna fag gutluan, ay at gutluan bagu. Ay Elisyu nalong te, “Namon o sa sangay taglong laman at fakonun.”

⁴³ Ay at fagsuguan nalong anya te, “Tain ro nu mafafafud au tuy fag fakonun sas sadik sandank taw?” Ay Elisyu nabalus te, “Foni way lang. Kata tuy Yawi at longan: ‘Kafag ngay taw umkapsug, ay umke sawad yay ro.’ ”

⁴⁴ Ay kanya fag fagsuguan nafon sa kafag ngay taglong ay kanya fagayu naon ay e fasawadan yay, kata Yawi at longan.