2 Fun 3 - Fanawbuid tagsibaliwas Fakayabian

Israel ay Muab Gawayan

¹ Uram, Akab at baguama, ansik fun sis Israel, gina sis falabi waluk banwa Eusafat nu gfunan sis Uda. Uram gbanwan sis Samarya, ay labi duak banwa nu gfunan.

² Kanya mauri at nafakamulun sis Yawi at daga salubangan. Dewa katanya, wa kaksvn at mama ay at mina at nafakamulun mauri. Kanya narufa at mama at nafalindug fag gang famauseganan Baal.

³ Dewa katanya, kanya nafakamulun way kata Erubuam, Nebat at baguama, at nafakamulun, at nafae asalanan ngay taw Israel. Kanya wa naubun ya at ngay asalanan.

⁴ Mesa, talun Muab at fun, e ngay tupa. Aroro Israel tagagbilug at talun, galay banwa kafag fun gfon sas Israel at fun sadik sandank libuk tupa riangan at sigyu, ay sadik sandank libuk tama tupa.

⁵ Dewa katanya, Akab nu nbul wan, Muab at fun nafawayan Israel at fun.

⁶ Ginanya, Uram nafaful taw Israel at tagfawayan fagayu ay narigbuan nalao sas Samarya laman namawayan talun Muab.

⁷ Kanya fag fun nafabuba sik longan sas Eusafat, Uda at fun te, “Muab at fun nafamabo angku. O wo gayvd magubuk angku laman namawayan anya?” Eusafat nabalus te, “Kin, nangalo au emu. Ku ngay taw am ngay taw yangay, ay anggan ku ngay sakayan kabayu emu yangay.”

⁸ Eusafat nainto te, “Dada ro ta dalan nu namawayan ta anya?” Uram nabalus te, “Sa sik afud talun Edum at yud e taw.”

⁹ Nu katanya, Israel at fun ay Uda at fun anggan Edum at fun nalo wan. Nu glao nu siwas fafituk menit, ngay tagfawayan at fetus mamam namin wan anggan at famainum at ngay fagbaugun.

¹⁰ Israel at fun nalong te, “Tain ro tam fakamulun? O Yawi nafauro antam fag tulu laman namon antam sa sangay taw Muab?”

¹¹ Dewa katanya, Eusafat nainto te, “O Yawi we taglong ya ste laman nanginto tam sas Yawi?” Ay fun Uram at fun tagfawayan at sadi nabalus te, “Sabv. Ste, Elisyu, Safat at baguama. Kanya Elyas at fagsuguan.”

¹² Ay Eusafat nalong te, “Yawi at longan si anya.” Nu katanya, Israel at fun ay Eusafat ay Edum at fun nalao sas Elisyu.

¹³ Elisyu nalong sas Israel at fun te, “Lag ta kadkasalagan. Loi wan sa am mama ay am mina at ngay taglong!” Israel at fun nalong te, “Duan! Aroro Yawi wan at nafauro emi fag tulu laman namon emi sa sangay taw Muab.”

¹⁴ Elisyu nalong te, “Gfatuyanan au sas Yawi at Mabalyanan, tagleleg fag Dius ku fagfaningan te, kwa ro gdama emu, nusdi takasalag, kyaman gsuyu Eusafat, Uda at fun.

¹⁵ Katsi tabani stie sik taw tagsaful gfawang fagfawangun.” Ay kaduge e gfawang fagfawangun, Yawi at fagmabalyananun antayuk sas Elisyu,

¹⁶ ay kanya nalong te, “Yawi glong te, umke mamam ro ste fag datag.

¹⁷ Dewa yud e tagmara ay arak, tuy fag datag umkapnu mamam. Ay ginum am, ay anggan ay ngay baka ginum yangay, ay tiba ya ay ngay fagbaugun.

¹⁸ Yawi mafakamulun takatanya, ay namababo ayu sa sangay taw Muab.

¹⁹ Matuyan, grasras ban am fagayu furuan at maaladan ay at tagbia fag ngay furuan. Ay gfuan ban am fagayu kayu at masine, ay gtabun ban am at ngay bulbug ay namasik tagagangun ban am at ngay gamasun at masine.”

²⁰ Balabag di, gina buknga gfon fanggalangun, mamam nafamilugan siginans Edum ay kafag daga ankapnu mamam.

²¹ Sanya ginan, e nafansulitan sas fagayu taw Muab te, kanya ban fag tuluk fun namawayan anya. Nu katanya, kanya nafaful fagayu mangama, ngay sisian anggan at mafagtainan, ay at ke fagmakatuun gfawayan, ay nafafalganan kanya fagayu sis fatuan talun Muab.

²² Ngay taw Muab nu nfulo masurip, nalag te, mamam nu nadamlagan menit ansik maraska kata taguk.

²³ Kanya fagayu nalong te, “Kanya taguk! Malgau kanya fag tuluk fun nawayan ay nafadfabulan. Nu katanya, namul watam at ngay fagagbilugun fagayu!”

²⁴ Dewa katanya, ngay taw Muab nu ndasug sas fun Israel at fagmafulan, ngay taw Israel naduksun ay nafawayan yakmay kanya fagayu nalagyu. Ngay taw Israel nasakbo sanya fag talun ay nafabul fagayu taw Muab.

²⁵ Narasras wan at ngay furuan, ay naukas ngay gang sas fagayu gamasun at masine yakmay nagangun. Natabun wan at ngay bulbug, ay nafuan wan at masine fag ngay fun kayu. Ay furuan Kir-Kareset way lang at sawad, dewa katanya, ngay mangama at ke buba aruranggut naligung kafag furuan ay kanya fagayu nafawayan.

²⁶ Muab at fun nu nalag te, gababawan wan, kanya nataban at tagfawayan fag fituk sandan at ke ngay fiso tagsumbalian at uyup, laman namawayan fun Edum at ngay tagfawayan, dewa katanya, wa nakatu.

²⁷ Nu katanya, Muab at fun nabuba at sisian taguna, fantubus ma anya laman sik fun, ay nairug sis tungud alad laman at fanggalangun. Ngay taw Israel nu nalag takatanya, kanya fagayu ankuri maksvn, ay nafabayan wan Muab at fun ay noli wan sat talun.