2 Fun 23 - Fanawbuid tagsibaliwas Fakayabian

Usyas at Nafabagu fag ngay Fakamulun

¹ Sanya ginan, fun Usyas nafauro fagayu fagtainan sis Uda ay sis Erusalem.

² Ay kanya nalao sas Yawi at bale gadgaloan fagayu taw tagbanwan sis Uda ay sis Erusalem, fagayu taw takadungug ay at yud kadungug. Ay nanangalo yangay anya ngay tagfon fanggalangun ay ngay taglong. Ay Usyas natap sa anya fagayu at marirukan sis Yawi at Nasadian fag Fafil, at nalag sis Yawi at bale.

³ Ay sanya ginan, Usyas nananmalindug sas day turuk ay nafaksvn kafag nasadian sis Yawi at daga salubangan te, kanya ban gfaning tua gugat Yawi, siginan nu gfafasludan at ngay suguan, at ngay faugali, ay at ngay fagaloan sas fagdaul at amatanganan ay at basad taw. Ay kanya nafatuyanan te, namafasludan ban Yawi at nasadian at marirukan sanya fag fafil. Ay sanya ginan fagayu taw nafatuyanan te, namaning ban kafag nasadian.

⁴ Ay sanya ginan, fun Usyas nasugu Kilkya fag fun tagfon fanggalangun, fagayu tagsit daga vtv fag ngay tagfon fanggalangun ay ngay tagulit Yawi at bale at ngay sakbawan, laman namaduksun siginans Yawi at bale, ngay fagagbilugun gina gseg Baal ay Asera, ay fagayu tagdamlag sis banwa. Fun Usyas nasugu anya fagayu laman nangirug kafag ngay fagagbilugun sas day furuan Erusalem, sas Liskung Kidrun, ay kanya fagayu nabuba at nagdafugan sas Betel.

⁵ Kanya naiyan tibak fagsegan at ngay tagfon fanggalangun. Kafag ngay tagfon fanggalangun, Uda at ngay fun at nafili, laman at nangirug famaebebanglu sa sangay bale fagnansegan sa tangabat fag ngay buknga sis talun Uda ay sis furuan Erusalem laman sas Baal, ay sas menit ay sas magdanun ay sa sangay galeme.

⁶ Ay fun Usyas nasugu yangay sa kafag ngay taw laman namaduksun siginans Yawi at bale turuk fagtoglagan Asera fag fagsegan ay namuba sas day Erusalem, sas Liskung Kidrun, ay nangirug. Sanya ginan, kanya fagayu narufa ay nafarapyag at dafug sas fagfolian.

⁷ Fun Usyas nasugu yangay laman giklas ngay tagfaebayad fag ngay mangama at bale tagsis Yawi at basad bale. Sanya yangay fag bale ngay mangena at fakawatan lanbung gina nanseg Asera fag fagsegan.

⁸ Fun Usyas nafafoli sas Erusalem ngay tagfon fanggalangun siginans Uda at ngay furuan. Kanya nasugu laman giklas ngay bale fagnansegan sa tangabat fag ngay buknga, siginans Geba sitsigons Beerseba, nu inda ngay tagfon fanggalangun nu girug ngay famaebebanglu. Ay nasugu yangay laman giklas ngay fagnansegan sis Uswe at day sakbawan bale, sis fasiunan baliwa furuan at sakbawan. Uswe, Erusalem at fun sirut.

⁹ Ngay tagfon fanggalangun tagsi sangay bale fagnansegan sa tangabat fag ngay buknga wa gfadiuganan nu gfakamulun sas Yawi at bale sis Erusalem. Dewa katanya, kanya fagayu naon tinapay yud e famabia gasfuan tibak tagfon fanggalangun.

¹⁰ Fun Usyas nasugu yangay laman giklas fagnansegan sis Tufet, sis datag Ben-Inum, laman we namon ya at ngay sisian laman at fanggalangun sas Mulek.

¹¹ Kanya nabul yangay siginans Yawi at bale at sakbawan ngay fagsegan fag ngay kabayu, Uda at ngay fun at nafalganan gina gseg menit. Kafag ngay kabayu sisad basad alad munakbang sis Yawi at bale, ay sis Natan-Melek fag tagfangguna at fagtaglayunan fag suluk. Ay fun Usyas nasugu yangay laman girug ngay kabayu at ngay faguyudan, ngay fun at nafalganan gina gseg menit.

¹² Usyas nasugu laman giklas Uda at ngay fun at nafawat fag ngay fagirugan sis Akas at tungud bale, ay Manase at nafawat fag ngay fagirugan sis Yawi at bale at duak fagaweanan, ay kanya narufa wan kafag ngay fagirugan ay naukas sas Liskung Kidrun.

¹³ Kanya nasugu yangay laman giklas ngay bale fagnansegan sa tangabat fag ngay buknga sas Erusalem at fakamenitan ay sit Mauri fag Buksul at fasiunan fag alvngvdan. Kanya fag ngay bale fun Sulumun at nafawat laman sas Asturet, ngay taw Sidun at fagsegan at maksvn nu mauri, ay Kemus, taw Muab at fagsegan at maksvn nu mauri, ay anggan Mulek, ngay taw Amun at fagsegan at maksvn nu mauri.

¹⁴ Usyas nasugu laman grufa ngay famamatang fag gang ay gfuan ngay turuk fagtoglagan Asera fag fagsegan. Sanya ginan, kanya nafasuya sanya fag daga siginan nu gfarapyag ngay taw at bini.

¹⁵ Usyas nasugu yangay laman grufa fagirugan tagsisad basad bale fagnansegan sa tangabat fag buknga sis furuan Betel. At nafawat kafag bale, Erubuam, Nebat at baguama, at nafae asalanan ngay taw Israel. Usyas nasugu laman namuan ay nangirug tagsanya fag ngay turuk fagtoglagan Asera fag fagsegan.

¹⁶ Kaduge Usyas gdama at furuan, kanya nalag sik fagfolian tagsis tungud buksul. Kanya nasugu laman namul ngay taw at bini siginan kafag fagfolian ay nairug sas fagirugan, laman gfauri kafag fagirugan, ay gfafasludan Yawi at longan ebi at nalong sat fagsuguan.

¹⁷ Fun Usyas ginto te, “Sinu ke fagfolian ku nalag?” Ngay taw gbalus anya te, “Kanya fagfolian Dius at fagsuguan siginans talun Uda, ebi at nalong fagayu am nafakamulun katsi ste fag fagirugan sis Betel.”

¹⁸ Fun Usyas nalong te, “To sanya! Lag kasalag kanya fag taglong at bini.” Nu katanya, kanya fagayu wa nabul kafag ngay bini anggan tagsiginans Samarya fag taglong at ngay bini at mafolian yangay sanya.

¹⁹ Sanya ginan, fun Usyas nabul fagayu fagsegan siginans fagnansegan fag ngay bale sa tangabat fag ngay buknga sis Samarya, Israel at ngay fun at nafawat ay at nafadotama Yawi. Fun Usyas nafakamulun sa kafag ngay fagnansegan kata at nafakamulun sas Betel fag fagnansegan.

²⁰ Ay kanya nafabul fagayu tagfon fanggalangun tagfakamulun sanya fag ngay bale fagnansegan si tangabat fag ngay buknga, ay nairug at ngay bini. Sanya ginan, kanya noli wan sas Erusalem.

Usyas Nafalganan sik Fagmafulun sabaliwa Tagbarita nu Glangfe

²¹ Fun Usyas nasugu fagayu taw te, “Maful tam sabaliwa Tagbarita nu Glangfe laman sas Yawi, kata at marirukan ste sit Nasadian fag Fafil.”

²² Ya batang e fagmafulun takatanya siginan ebi ngay tagwabilug nu gfangguna ngay taw Israel, ay kaduge nu e ngay fun sis Israel ay sis Uda.

²³ Ngay taw anful sabaliwa Tagbarita nu Glangfe laman sas Yawi, gina sis falabi waluk banwa fun Usyas nu gfunan sis Erusalem.

²⁴ Fun Usyas naiyan taguro ngay kinbul at falad, ay naukas ngay fagsegan tagsi sangay bale, ay tiba yak fagsegan, ay at maksvn nu mauri fag ngay fagsegan sis talun Uda ay sis furuan Erusalem. Kanya nafakamulun takatanya laman gfaning fagayu at marirukan sis nasadian fag fafil, Kilkya fag tagfon fanggalangun at nalag sis Yawi at bale.

²⁵ Ya batang e fun takata fun Usyas, at nafaning Yawi sas fagdaul at amatanganan, ay sas fagdaul at fakaylatun, ay sas fagdaul at fagmabitsugun. Kanya nafaning Muisis at Faugali fagayu.

²⁶ Kanya dewa nafaning takatanya, Yawi kadotama yay gugat Uda aroro sas Manase at nafakamulun mauri.

²⁷ Nu katanya, Yawi glong te, “Gaiyan kwan Uda siginan ku daga salubangan kata ku nafakamulun sas Israel, ay gaiyan kyangay Erusalem ku nafili fag furuan, ay ku bale, ku nalong te, ku fagbanwanan.”

Fakatabuan Usyas nu Gfunan

²⁸ Ay tiba ya at kinfasludan kaduge Usyas gfunan ay fagayu at nafakamulun anriruk sis fafil fagrirukan sabaliwas Uda at ngay fun.

²⁹ Gina Usyas gfunan, Igiptu at fun Neku, Igiptu at fun nalao sas Liskung Eufrates laman nanggubuk fun Asirya. Ay fun Usyas nalao namawayan Igiptu at fun Neku, dewa katanya, kanya fag duak gaban nu nablangan sis Megidu, Neku nafabul anya.

³⁰ Ay at ngay fagsuguan nabuba at bilug siginans Megidu ay nafasakay sas faguyudan kabayu ay nafauli sas Erusalem, ay nanamoli sat sadili fagfolian. Sanya ginan ngay taw Uda nafili Yuakas, Usyas at baguama, laman sik fun, fantubus anya, siginan nu grarus langis sat alfuyu.

Yuakas nu Gfunan Talun Uda

³¹ Yuakas duak safulu e tuluk banwa gina gfasigad gfunan. Ay kanya gbanwan sis Erusalem, ay nu gfunan tuluk magdanun. At mina Kamutal, Eremyas at baguina tagsiginans furuan Libna.

³² Ay Yuakas nafakamulun at mauri sas Yawi at daga salubangan, kata at mangaguyang at nafakamulun.

³³ Ay Neku, Igiptu at fun, naubung anya sis Ribla sis talun Amat ay nafaragang nu gfunan sas Erusalem, ay naet famayad siginan sangay taw Uda tuluk libu limak sandank fabudbungguan salapi ay tuluk safulu e limak fabudbungguan gintu.

³⁴ Ay fun Neku nafili Elyakim, Usyas at baguama, laman sik fun fantubus at mama, ay nafangayan anya te, Yuyakim. Ay kanya nataban Yuakas sas talun Igiptu, ay sanya wan Yuakas nu kabul.

³⁵ Yuyakim nabul ngay taw Israel at famayad fag salapi ay gintu, nu seyu sik taw at fagmakatuun. Ay kanya nafon sas fun Neku kata at fagetun.

Yuyakim nu Gfunan Talun Uda

³⁶ Yuyakim duak safulu e limak banwa gina gfasigad gfunan, ay kanya gbanwan sis Erusalem, ay nu gfunan labi sadik banwa. At mina Sebida, Pedaya at baguina tagsiginans Ruma.

³⁷ Ay kanya nafakamulun at mauri sis Yawi at daga salubangan, kata at mangaguyang at nafakamulun.