2 Fun 22 - Fanawbuid tagsibaliwas Fakayabian

Usyas nu Gfunan Talun Uda

¹ Usyas waluk banwa gina gfasigad gfunan. Ay kanya gbanwan sis Erusalem, ay nu gfunan tuluk safulu e sadik banwa. At mina Edida, Adaya at baguina, tagsiginans Buskat.

² Ay Usyas matuyan at fakamulun sis Yawi at daga salubangan, kata at mangaguyang Dabid at nafakamulun, ay di gfaragang nu gfakamulun at masine.

Nalag sis Yawi at Bale Fafil Fagrirukan Yawi at Faugali

³ Gina sis falabi waluk banwa Usyas nu gfunan, kanya nasugu Safan fag tagriruk, Asalya at baguama ay Mesulam at fufu, sas Yawi at bale, ay glong te,

⁴ “Loi sas Kilkya fag fun tagfon fanggalangun ay nanlong o sa anya te, ‘Fafuli ngay salapi ngay taw at nabuba sas Yawi at bale, ngay tagulit sakbawan at nafaful.

⁵ Ay foni kafag salapi sa sangay tagfangguna tagfasine Yawi at bale, laman kanya fagayu gbayad sa sangay tagfakamulun,

⁶ ngay tagsaful kawat, ngay takamale ay tagfasine ngay gang. Ay tibak salapi famayad ngay kayu ay at madasdasan fag ngay gang.’

⁷ Ay kanya fag ngay fagfatigwanan wa griruk ya nu setain nu gfalao kafag ngay salapi aroro kanya fagayu matuyan.”

⁸ Kilkya fag fun tagfon fanggalangun nalong sas Safan fag tagriruk te, “Nalag au sis Yawi at bale at Faugali fag Fafil.” Ay arodi nafon kafag fafil sas Safan, ay Safan natap.

⁹ Sanya ginan, Safan nalao sas fun ay nalong te, “Am ngay fagsuguan nabul wan salapi tagsis Yawi at bale ay nafon sa sangay tagfasine Yawi at bale ay sa sangay tagfangguna.”

¹⁰ Kanya nalong yay fia sas fun te, “Kilkya fag tagfon fanggalangun nafon sa angku tuy fag fagrirukan.” Ay kanya natap kafag rirukan sis fun at daga salubangan.

¹¹ Ay fun nu nadungug Yawi at Faugali at marirukan sanya fag fafil, kanya nagirat at lanbung laman gfalag te, kabalu.

¹² Ay kanya nasugu sas Kilkya fag tagfon fanggalangun, ay Akikam, Safan at baguama, Akbur, Mikaya at baguama, Safan fag tagriruk, ay sas Asaya, at fagsuguan fia, te,

¹³ “Nanginto am sas Yawi laman sa angku ay sa sangay taw Uda sabaliwa at marirukan si ay nalag fag fafil. Yawi maksvn nu kadotama antam aroro tam ngay mangaguyang wa nafaning at marirukan sanya fag fafil. Ay anggan itam wa tam nafakamulun takatanya.”

¹⁴ Nu katanya, Kilkya, Akikam, Akbur, Safan ay Asaya nalao sas Kulda fag taglong laman namakamatoan. Kulda gbanwan sit bagu fag afud furuan Erusalem. At mangama Salum, Tikba at baguama ay Karkas at fufu. Ay Salum tagalaga ngay lanbung sis Yawi at bale.

^15-16 Ay Kulda nalong sa anya fagayu te, “Nanlong am sat nasugu ayu stae te, katatuy Yawi, Israel at Dius, at longan: ‘Gfaurianan kban tuy fag furuan ay fagayu tagbanwan ste, kata at marirukan sanya fag fafil, Uda at fun at natap.

¹⁷ Namalag au ku dotama stae fag furuan, ay wa ban e mafaragang, aroro ku ngay taw natalyuyan angku ay nawat tibak fagsegan ay naseg.’

¹⁸ “Ay nanlong am sas Uda at fun at nasugu ayu laman nanginto sas Yawi te, ‘Lag o gafanawa am nadungug fag longan, aroro Yawi, ngay taw Israel at Dius, glong te,

¹⁹ Nadungug au am darangin ay nu kamababaun o sa ku daga salubangan, gina o nadungug ku longan sabaliwa nu gfauri au ay gfamin tuy fag furuan ay ngay tagbanwan ste. Ay ginanya nagirat o am lanbung ay nawayway si ku daga salubangan laman gfalag o te, kabalu o. Nu katanya, au, Yawi, glong au te,

²⁰ Kaduge ban o gleleg, di ban kadasug ku faurianan stae fag furuan. Manabayan tua ban nu kabul o.’ ” Sanya ginan, kanya fagayu nananlong Ulda at ngay famalus sas fun.