2 Fun 2 - Fanawbuid tagsibaliwas Fakayabian

Nabuba Elyas sas Banwa

¹ Yawi gina ganamubaun Elyas sas banwa, siginan sik magaras fag tagmara, Elyas ay Elisyu glao siginans Gilgal.

² Elyas nalong sas Elisyu te, “Ste yap o, aroro Yawi nasugu angku sas Betel.” Dewa katanya, Elisyu nalong te, “Gfatuyanan au sa emu ay sas Yawi, tagleleg fag Dius te, kwa gubun emu.” Nu katanya, kanya fag dua nadgaloan sas Betel.

³ E sik gaban taglong sis Betel at nasas Elisyu ay ginto te, “O nasaful wo te, katsi ro fag menit Yawi gbul wan am takamoyung?” Elisyu gbalus te, “Sabv, saful kwan. Lag glong ya.”

⁴ Sanya ginan, Elyas nalong sas Elisyu te, “Ste yap o, aroro Yawi nasugu angku sas Eriku.” Elisyu gbalus te, “Gfatuyanan au sa emu ay sas Yawi, tagleleg fag Dius te, kwa gubun emu.” Nu katanya, kanya fag dua nadgaloan sas Eriku.

⁵ E sik gaban taglong sis Eriku at nasas Elisyu ay ginto te, “O nasaful wo te, katsi ro fag menit Yawi gbul wan am takamoyung?” Elisyu nabalus te, “Sabv saful kwan. Lag glong ya.”

⁶ Sanya ginan, Elyas nalong sas Elisyu te, “Ste yap o, aroro Yawi nasugu angku sas Liskung Urdan.” Elisyu nabalus te, “Gfatuyanan au sa emu ay sas Yawi, tagleleg fag Dius te, kwa gubun emu.” Nu katanya, duama nataglayun glao.

⁷ Sanya e limak safuluk taglong malindug sis fagunan, ay kanya fagayu gsalubang sas Elyas ay Elisyu at fakaragangan sis Liskung Urdan.

⁸ Elyas nabul at lanbung, ay nalibud ay nafafalang sas mamam. Ay mamam ankafud ay duama gdife sit matat fag daga.

⁹ Ay nu ndife wan, Elyas nalong sas Elisyu te, “Nu e gbul wa ro angku siginan emu, longi sa angku am fakaylatun ku fakamulun sa emu.” Elisyu nabalus te, “Kaylat au nu gfalin o sa angku duak kaksvn am fagmabalyananun.”

¹⁰ Elyas gbalus te, “Maidap am fagetun. Dewa katanya, mabul ro wo takatanya nu glag tua ro wo nu gbul angku sim salubangan, ay nu dway ro wo glag angku wo mabul am fagetun.”

¹¹ Kaduge duama glao gfansulitan, sik ngay kabayu tagigang at ke faguyudan tagigang yangay masakit andasug. Ay kanya nadalan sas duama at wabilug ay nafasaruayan duama, ay nabuba Elyas sas banwa siginan sik tagribungan fag tagmara.

¹² Ay Elisyu nalag ay nauro te, “Ku mama! Ku mama! Israel at ngay faguyudan ay at ngay tagsaful gsakay sis kabayu!” Ay Elyas we kalag ya. Sanya ginan, Elisyu nagirat at lanbung laman gfatoglag te, kabalu.

¹³ Ay kanya nafuyut Elyas at lanbung at kintong, ay anfoli wa sas tigyangan Liskung Urdan ay namalindug sanya.

¹⁴ Kanya nafafalang sas mamam Elyas at lanbung ay nalong te, “Dada wan Yawi, Elyas at Dius?” Nu nafakamulun katanya, mamam ankafud ay kanya nadife wan.

¹⁵ Tagsiginans Eriku fag ngay taglong nu nalag, nalong te, “Elyas at fagmabalyananun siwas Elisyu.” Nu katanya, kanya fagayu nafablang Elisyu ay natudan laman gfababaun sa anya.

¹⁶ Ay nalong te, “E limak safuluk mangama at mabitsug si emi. Aylati nu nanrvbvy ami am takamoyung. Malgau Yawi at Falad nabuba anya sa sik buksul ay sa sik datag.” Elisyu nabalus te, “Deyud ya.”

¹⁷ Dewa katanya, kanya fagayu gfabulun ay Elisyu nainkaplan way lang naylat. Nalong te, “Kin, sugui wan kanya fag ngay taw.” Nu katanya, nasugu wa kanya fag limak safuluk taw. At kadugean tuluk menit nu grvbvy Elyas, ay wa ngap e nalag.

¹⁸ Nu nfoli sas Elisyu, kanya siyay gugat sEriku, ay Elisyu nalong sanya fagayu te, “O nunda kwa nalong ayu te, ‘Deyud ya’?”

Elisyu at Nafakamulun fag ngay Madulo

¹⁹ Sis Eriku fag furuan e nalong sas Elisyu te, “Fagtainan, nalag wo te, manabayan tua em furuan. Dewa katanya, em mamam masuya way ay si em daga we katugbung fananumun.”

²⁰ Elisyu nalong te, “Bubai sa angku sik bagu fag taya at ke bilug barara.” Nu katanya, nabuba sa anya.

²¹ Elisyu nalao sas bulbug ay narapyag sanya at buba fag barara ay nalong te, “Yawi glong te, ‘Nafasine kwan tuy fag mamam, ay siginan katsi, wa ban gfadasug ya fakabulun ay wa yangay ban gfayud gtugbung ngay fananumun.’ ”

²² Ay siginan ginanya, mamam ansine wan.

E Gfalingun Elisyu

²³ Elisyu nalao siginans Eriku tagsas Betel, ay kaduge glao sa sangaba dalan, e sik ngay baguama siginan sik furuan gfalingun anya. Nalong te, “O fag malanu, lag sanya! O fag malanu, lag sanya!”

²⁴ Elisyu anbiling ay nadama kanya fag ngay baguama, ay nafaurianan anya fagayu sas Yawi at ngayan. Sanya ginan, e duak usu tina andasug siginan sad araw ay nagarit ay naradranggutan at ufatk safulu e duak baguama.

²⁵ Sanya ginan, Elisyu nalao sas buksul Karmel, ay nataglayun sas Samarya.