2 Fun 18 - Fanawbuid tagsibaliwas Fakayabian

Esekyas nu Gfunan Talun Uda

¹ Gina sis fatuluk banwa Usea, Ela at baguama, nu gfunan sis Israel, Esekyas, Akas at baguama, gfasigad gfunan sis talun Uda.

² Esekyas at banwa duak safulu e lima gina gfasigad gfunan, ay kanya nabanwan sis Erusalem, ay nu gfunan duak safulu e siamk banwa. At mina Abya, Sakaryas at baguina.

³ Esekyas nafakamulun at matuyan sis Yawi at daga salubangan, kata at mangaguyang Dabid.

⁴ Ay kanya naiklas ngay bale fagnansegan sa tangabat fag ngay buknga, ay narufa ngay tagfamatang fag gang, ay narasras ngay turuk fagtoglagan Asera fag fagsegan. Ay kanya narufa yangay ule at mawatan tansu Muisis at nawat, aroro ngay taw Israel gseg wan kafag ule, siginan nu girug ngay famaebebanglu. Nafangayan kafag ule te, Nekustan.

⁵ Ay Esekyas gafanud sas Yawi, Israel at Dius. We nafunan sis Uda takata anya, dewa at ngay naguna ay at nanfunan yay ban.

⁶ Ay kabavn kanya matuyan sas Yawi sas fagayu nusnge wain ay gfaning fia fagayu at suguan at nafon sas Muisis.

⁷ Yawi gufud anya, nu katanya fagayu at fakamulun anfasludan. Ay kanya nafamabo Asirya at fun ay wa nafaning.

⁸ Esekyas nagbilug Filistia anggan Gasa at ngay fatuan talun, siginan tangabat fag ngay fagulitan ay sitsigon at maaladan fag furuan daul.

⁹ Gina sis faufatk banwa Esekyas nu gfunan, ay gina sis fatuluk banwa Usea nu gfunan sis Israel, Asirya at fun Salmaneser nafawayan Israel ay nafasigad naligung furuan Samarya.

¹⁰ Nu nlangfe tuluk banwa, gina sis faunumk banwa Esekyas nu gfunan, ay sis fasiamk banwa Usea nu gfunan, taw Asirya nagbilug furuan Samarya.

¹¹ Asirya at fun nataban ngay taw Israel sas Asirya ay nafabanwan sas furuan Kalak, ay sa sangay talun at munakbang sis Liskung Kabur sis talun Gusan, ay sa sangay taw Medya at ngay furuan ayu daul.

¹² Anfasludan takatanya sa sangay taw Israel aroro wa nafaning at Dius Yawi. Kanya fagayu nafamabo at nasadian. Ay wa nafaning Yawi at ngay suguan at nafon sat fagsuguan Muisis. Kanya fagayu wa nadungugan ay wa nafaning kafag ngay suguan.

Asirya Nafawayan Uda

¹³ Gina sis falabi ufatk banwa Esekyas nu gfunan, Senakerib, Asirya at fun, nafawayan ay nagbilug fagayu at maaladan fag furuan sis Uda.

¹⁴ Nu katanya, fun Esekyas nafabuba sik fansulitan sas fun Asirya sis Lakis te, “Nasalan au ay nafamabo au emu. Gbayad au nusnga setaw am fagetun, nu nalo tua ro wo ste ginan.” Nu katanya, fun Asirya nafabayad sas fun Esekyas safuluk libuk fabudbungguan salapi ay sadik libuk fabudbungguan gintu.

¹⁵ Nu katanya, Esekyas nafon fagayu salapi tagsis Yawi at bale ay anggan tagsit bale daul at fagfungsuan ramraman.

¹⁶ Esekyas nabul anggan at ngay gintu siginan sa ngay sakbawan at fagsakboan Yawi at bale ay kanya fagayu nafon sas Asirya at fun.

¹⁷ Ay gina Asirya at fun sis furuan Lakis, kanya nasugu at fun tagfawayan, ay tagfangguna ngay fagsuguan, ay tagfangguna ngay tagfawayan, anggan ngayuk tagfawayan sas fun Esekyas sis furuan Erusalem. Ay gina kanya fagayu ndasug sis day Erusalem, anragang si sik fagfamiluganan sis buid fag fagfungsuan mamam, sa sangaba dalan tagsas tagbakbak at gamasun.

¹⁸ Kanya fagayu nafauro fun Esekyas, ay dewa katanya, at nasugu Elyakim, Kilkya at baguama, tagfunan sis fun at bale, ay Sebna fag tagalaga salapi, ay Ua, Asaf at baguama, tagalaga ngay rirukan sit fagfagtainanan nanamablang anya fagayu.

¹⁹ Ay Asirya at tagfangguna tagfawayan nalong te, “Nanlong am sas fun Esekyas te, katatuy Asirya at fun at mabalyanan at longan: Nataw am fakamatungudunun?

²⁰ Nalong o te, ngayu tua am ngay nasafulan ay mabalyanan am ngay tagfawayan, ay dewa katanya, am longan fagayu we masuad. Sinu at mabalyanan am fagsegun, am nafamaboan angku?

²¹ O talun Igiptu? Kanya fag talun at ngay taw ay at fun kata way sik magatvngan fag tulag tagurus am daluap nu gatulagan o.

²² Nute glong o te, ‘Gafanud ami sa em Dius Yawi,’ O nunda bunwa o Esekyas at nasugu te, ‘Rasrasi wan ngay bale fakafulan sa tangabat fag ngay buknga anggan tagsanya fag ngay fagirugan fanggalangun?’ Ay nalong yay o sas fagayu tagbanwan sis furuan Erusalem ay anggan sa sangay furuan sas Uda te, ‘Nu gseg am, sa yakman Erusalem fag fagirugan.’

²³ “Ay katsi ku tagfayafun, Asirya at fun, e fagyafonun emu. Namon ami emu duak libuk kabayu nu e duak libu tuok taw tagsaful gsakay sas kabayu.

²⁴ Wa ro wo mababo nusdi way ku tagfayafun at fagsuguan tiba daga. Nu katanya, wain am fagsegun yay te, talun Igiptu namon ban emu sik ngay faguyudan fangawayan anggan sik ngay taw tagsaful gsakay sas kabayu?

²⁵ Ay sadi ya, o gamatangan o te, Yawi wa kaylat ku naloan stie? Kanya wa ngap karo at nasugu angku te, ‘Farasrasi wan ay famini tuy fag talun.’ ”

²⁶ Ay Elyakim, Sebna ay Ua nalong sas tagfangguna tagfawayan te, “Anin, nu gfakamatoan o emi sa yakmans taw Aram at fangaringang, aroro kanya way em fagtogdungugun. Lag garingang sas Ebreu fag fangaringang aroro tagsis alad furuan fag ngay taw gdungug way.”

²⁷ Dewa katanya, kanya fag tagfangguna tagfawayan nabalus te, “O nunda sa way lang ay fun ay sa ayu ku tagfayafun at fagnasuguun angku ste laman gfadungug ayu tuy? Bundi, anggan tua sas fagayu taw tagbanwan iste sis furuan Erusalem? Fagayu ban am umlunus wam ay umdanum nu gfawayan wami ayu. Ay nu katanya, ay fakonun ban ay kek mandi ay ay fanginum ay tifus.”

²⁸ Sanya ginan, kanya fag tagfangguna tagfawayan anlindug ay nauro sas Ebreu fag fangaringang te, “Dungugani Asirya at mabalyanan fag fun at foyungan.

²⁹ Katatuy at longan: Lag am gadayan Esekyas. Kanya wa mafalangfe ayu siginan ku daluap.

³⁰ Lag am gafaylatan, kanya gina gafanud sas Yawi glong te, ‘Matuyan wan Yawi namalangfe wan antam, ay di ban gfatigwanan ya tuy fag furuan sas Asirya at fun.’

³¹ “Lag am gdungugan Esekyas! Katatuy Asirya at fun at longan: Lag am namawayan angku; luangi sakbawan ay duksuni wan sa angku. Kaylat kwan nu nangon am ay tanuman at rawvg ay nanginum mamam sa ay sadili saguban,

³² yakmay au umdasug ay tumaban au ayu sa sik talun kamasine yangay ay talun, tangayu at ubas ay fagnamulan ay fanlangu ay ngayu yangay at fangawat tinapay, ay ngay fun ulibu ay deut. Sanya ban nu gleleg tuam ay di ban am kabul. Lag am gdungugan Esekyas; kanya kamuag way sa ayu te, ‘Yawi wan tagfalangfe antam!’

³³ O nunda e tibak dius sa tibak gaban taw at mafalangfe at talun siginans Asirya at fun at daluap?

³⁴ Dada wan furuan Amat, Arpad ay Sefarbaim, Ena, ay Iba at ngay fagsegan? O nunda kanya nafalangfe Samarya siginan ku daluap?

³⁵ Kayunya fag ngay dius, inday at nafalangfe at ngay talun at ngay taw siginan angku? Nu katanya, tain ro Yawi nu mafalangfe furuan Erusalem siginan ku daluap?”

³⁶ Sanya fag ngay taw wa nabalus, aroro fun Esekyas nalong te, “Lag gbalus.”

³⁷ Sanya ginan, Elyakim, Sebna ay Ua nagirat at ngay lanbung at kaksvnan nu kabalu, ay anfoli yay sas Esekyas ay nafoyung tagfangguna tagfawayan at ngay nalong.