2 Fun 13 - Fanawbuid tagsibaliwas Fakayabian

Yuakas nu Gfunan Talun Israel

¹ Gina sis faduak safulu e tuluk banwa Uas, Aasya at baguama, nu gfunan sis talun Uda, Yuakas, Yeu at baguama, gfasigad gfunan sis Israel. Kanya gbanwan sis Samarya ay gfunan labi fituk banwa.

² Yuakas mauri at fakamulun sis Yawi at daga salubangan, ay kanya anke asalanan kata Erubuam, Nebat at baguama, at nafakamulun, at nafae asalanan ngay taw Israel.

³ Nu katanya, Yawi maksvn nu kadotama ngay taw Israel, ay ngaduge wan nu gfagbilug anya fagayu sas Kasael, Aram at fun, ay at baguama Ben-Adad.

⁴ Yuakas nadarangin sas Yawi, ay nadungug tua anya, aroro Yawi nalag at kaksvnan Aram at fun nu gfaidapan Israel.

⁵ Yawi nafili sik taw at namalangfe anya fagayu siginan sangay taw Aram, nu katanya, ngay taw Israel gdog yay gbanwan manabayan.

⁶ Ay dewa katanya, kanya fagayu wa naubun at ngay asalanan, kata Erubuam fag kalongan at nafakamulun, at nafae asalanan ngay taw Israel. Ay kadugenya, maturuk yay gugat sis Samarya fag turuk fagtoglagan Asera fag fagsegan.

⁷ Yuakas at ngay tagfawayan at sawad safulu way langk libu, ay limak safuluk tagsaful gsakay sis kabayu, ay safuluk faguyudan fangawayan, aroro Aram at fun narufa wan tangayu kata lukbu sit ngay darafa.

⁸ Ay tiba ya at kinfasludan kaduge Yuakas gfunan ay fagayu at nafakamulun anriruk sis fafil fagrirukan sabaliwas Israel at ngay fun.

⁹ Yuakas nu nbul wan, nanamoli anya sas Samarya. Ay at baguama Yuas at natubus anya laman sik fun.

Yuas nu Gfunan Israel

¹⁰ Gina sis fatuluk safulu e fituk banwa Uas nu gfunan sis Uda, Yuas, Yuakas at baguama, gfasigad gfunan sis talun Israel, ay nu gfunan, labi unumk banwa.

¹¹ Kanya mauri way at ngay nafakamulun sis Yawi at daga salubangan ay kanya wa natalyuyan at asalanan, nafaning way Erubuam, Nebat at baguama at nafakamulun, at nafae asalanan ngay taw Israel. Ay Yuas nafataglayun at ngay asalanan takatanya.

¹² Ay tiba ya at kinfasludan kaduge Yuas gfunan ay fagayu at nafakamulun anggan nu gfawayan Amasya, talun Uda at fun, anriruk sis fafil fagrirukan sabaliwas Israel at ngay fun.

¹³ Yuas nu nbul wan, nanamoli anya sas fagfolian Israel at ngay fun sas Samarya. Ay at baguama Erubuam at natubus anya laman sik fun.

Elisyu nu Kabul

¹⁴ Elisyu anke fakasaitun ay gakabulun wan. Fun Yuas nalao sa anya ay gwayway. Yuas nalong te, “Ku mama! Ku mama! Israel at ngay faguyudan ay at ngay tagsaful gsakay sis kabayu!”

¹⁵ Elisyu nalong te, “Namul o sik godun ay sik ngay banyas.” Ay Yuas nafaning.

¹⁶ Elisyu nalong te, “Tedi am ba godun.” Kaduge Yuas gted, Elisyu nafasas Yuas at tungud daluap at daluap,

¹⁷ ay nalong te, “Luangi tagsibaliwas fakamenitan fag fagbanawanan.” Ay kanya naluang. Sanya ginan, Elisyu nalong te, “Fatosi.” Ay kanya nafatos, ay Elisyu nalong te, “Kanya fag banyas sik fagtoglagan te, Yawi ban gfababo emu sa sangay taw Aram. Ay gbabo ban o ngay taw Aram sis Afek yakmay ban kanya fagayu ankamin.”

¹⁸ Elisyu gdog yay nalong sas Yuas te, “Namul yap o gayvd sik ngay banyas, ay fataruki sas daga.” Ay kanya nafataruk sas daga tulu ginan ay nafaragang wan.

¹⁹ Dius at fagsuguan Elisyu andotama anya ay nalong te, “Lima ay mannga unum tua ginan nangus nu gfataruk o sas daga am ba banyas, laman ban gbabo wo fia ay gfamin fagayu taw Aram. Dewa katanya, tulu ginan way ban o gbabo.”

²⁰ Elisyu anbul ay nanamoli anya. Kayu banwa gina ngay fananumun gtugbung e sik gaban taw Muab namawayan Israel.

²¹ Sanya ginan, e ngay taw Israel gfoli sik taw at kinbul. Ay kanya fagayu nu nalag ngay taw Muab nu namawayan, naukas at fagfoliun fag taw sas Elisyu at fagfolian ay nalagyu. Ay kanya fag mabulan nu natayuk Elisyu at bini, naleleg ay anlindug.

²² Kasael, Aram at fun, nafaidapan taw Israel kaduge Yuakas gfunan.

²³ Dewa katanya, Yawi kafanyu tua gugat ay gamatang anya fagayu aroro sat fatuyanan sas Abrayam, Isak, ay Akub. Nu katanya, dasug katsi, Israel di nkamin ay di naiyanan.

²⁴ Kasael, Aram at fun anbul wan, ay at baguama Ben-Adad at natubus anya laman sik fun.

²⁵ Ay Yuas nababo Ben-Adad tulu ginan, ay kanya nadog yay nagbilug ngay furuan Ben-Adad at mama Kasael at naago siginan at mama Yuakas.