2 Fun 11 - Fanawbuid tagsibaliwas Fakayabian

Atalya ay Uas

¹ Atalya nu nasaful te, at baguama Aasya anbul wan, kanya anke algan namabul Uda at fun at ngay kalongan fagayu.

² Dewa katanya, Euseba nafalangfe Uas, Aasya at baguama, gina e ganamabulun kafag duksayan. Euseba, fun Euram at baguina ay Aasya at arian. Kanya nafasuksuan Uas ay at fangkamato sa sik suluk sis Yawi at bale. Nu katanya, Atalya wa nakatu gfabul anya.

³ Kaduge unumk banwa, Uas ay anggan at fangkamato gsuksuan sis Yawi at bale gina Atalya gfangguna sanya fag talun.

⁴ Ay sis fafituk banwa, Euyada fag tagfon fanggalangun nafauro ngay tagfangguna ngayuk sandank tagfawayan ay ngay tagulit fun at bale, laman maful sas Yawi at bale. Kanya nawat at nasadian sa anya fagayu ay nafafatuyanan sa anya fagayu gina sis Yawi at bale. Sanya ginan, nafalag fun at baguama sa anya fagayu.

⁵ Kanya nalong sa anya fagayu te, “Am fag tuluk gaban tagulit gina Famiangalay fag Menit, katatuy ay fakamulun: at sadik gaban tagulit fun at bale,

⁶ ay at faduak gaban tagulit Sur fag sakbawan, ay at fatuluk gaban tagulit fun at bale at sakbawan, laman gungbus tuam tibak tagulit tagsanya.

⁷ Ay am fag duak gaban at yud gulit gina Famiangalay fag Menit nangulit am Yawi at bale laman gdiri ay fun.

⁸ Bitbitani ay ngay famawayan gina am gulit anya, ay aloi tua gugat anya nusnga nday nu glao. Ay fabuli nusnga sinu at kinkakbang sa anya.”

⁹ Kafag ngay fun tagfawayan nafakamulun kata Euyada fag tagfon fanggalangun at suguan. Kanya fagayu nafaful at ngay tagfawayan tagulit gina Famiangalay fag Menit, ay anggan at yud gulit ginanya fag menit, ay kanya fagayu ankakbang sas Euyada.

¹⁰ Ay Euyada nafon sa kafag ngay fun tagfawayan ngay bangko ay ngay famalabag ebi fun Dabid at fagagbilugun tagsis Yawi at bale.

¹¹ Ay kafag ngay tagulit malindug gbitbitan at mesa famawayan, maligung Yawi at bale ay sis fagirugan laman gulit at fun.

¹² Sanya ginan, Euyada nafaduksun Uas, fun at baguama, ay nafoli sat alfuyu at sangbo, ay nafon sa anya sik fagaloan fag rirukan sabaliwa nu gfunan, ay nafili anya laman sik fun. Ay kanya nararus sa anya langis laman famasaful te, sia wan at fun. Ay kanya fagayu natalaptap ay nauro te, “Fagmanabayanun sa tam fun!”

¹³ Ay Atalya nu nadungug ngay tagulit ay ngay taw nu guro, kanya nalao yangay sas Yawi at bale.

¹⁴ Ay kanya nalag at bagu fag fun malindug sis day turuk, kata at ugali nu gfoyung sa sik fun. Ay sis fun at day tigyangan, ngay fun tagfawayan ay ngay tagfawang budyung, ay fagayu taw tagsanya guseganan. Ay Atalya nu nalag takatanya fagayu, kanya nagirat at lanbung at kaksvnan nu kauri, ay nauro te, “Ngay takamabo am! Ngay takamabo am!”

¹⁵ Ay Euyada nasugu sa sangay fun tagfawayan te, “Faduksuni Atalya ay fabuli wan fagayu takaylat ggubuk anya. Lag am gfabul anya iste sis Yawi at bale.”

¹⁶ Ay kanya fagayu nagamat Atalya, ay nataban sas day sakbawan sa sangay kabayu at fagsakboan sas fun at bale, ay sanya wan nu gfabul.

Euyada at ngay Nafabagu

¹⁷ Sanya ginan, Euyada nawat sik nasadian sas Yawi ay sa sangay taw ay sat fun te, kanya ban fagayu Yawi at ngay taw. Euyada nawat yangay sik nasadian laman sas fun ay sat ngay taw.

¹⁸ Ay fagayu taw nalao sas Baal at bale ay naiklas. Ay kanya fagayu narufa at ngay fagirugan fanggalangun ay anggan tagsanya fag ngay fagsegan, ay nafabul Matan, Baal at tagfon fanggalangun, sis salubangan fagirugan. Sanya ginan, Euyada nafae ngay tagulit Yawi at bale.

¹⁹ Ay kanya nataban ngay fun tagfawayan, ay fun at ngay tagulit ay ngay tagulit fun at bale, ay fagayu taw, ay kanya fagayu nataban at fun sat bale siginans Yawi at bale. Kanya fagayu nadalan sa sangay tagulit at sakbawan. Sanya ginan, at fun namalunggung sat faglunggungan,

²⁰ ay fagayu taw guseganan. Ay nu nafabul wan Atalya sis fun at bale, anke fagmanabayanun sit talun.

²¹ Uas fituk banwa gina gfasigad gfunan.