2 Fun 1 - Fanawbuid tagsibaliwas Fakayabian

Elyas ay Fun Aasya

¹ Akab nu nbul wan, ngay taw Muab nafamabo ngay taw Israel.

² Sik menit, sis furuan Samarya, Aasya antong siginan tiba tungud fag salug at ke balaba ay naslu. Nu katanya, kanya nasugu ngay tagfosuk longan sas Baal-Sebub, furuan Ekrun at fagsegan, laman nanginto te, o kafia yay ban at aslu.

³ Ay Yawi at tagbarita glong sas Elyas fag taw Tisbe te, “Namablang o Samarya at fun at ngay tagfosuk longan ay intoi sa anya fagayu te, ‘Wain yay ay fagnangakbangun sas Baal-Sebub, furuan Ekrun at fagsegan? O nunda we Dius sis Israel?’

⁴ Nu katanya, nanlong am sas Aasya te, katatuy Yawi at longan sa anya: ‘Wa ban o kalunggung ya siginan am fagtiugan. Matuyan, kabul ban o!’ ” Ay Elyas nalao wan.

⁵ Ay kafag ngay tagfosuk longan nu nfoli sat fun, fun nainto sa anya fagayu te, “Wain ay faginfoliun wan?”

⁶ Ay kanya fagayu nabalus te, “Sik taw nafablang emi, ay nalong emi te, ‘Afolii wan sa ay fun ay nanlong am sa anya Yawi at longan te, Wain yay am fagnasuguun sik ngay taw laman nangakbang sas Baal-Sebub, furuan Ekrun at fagsegan? O nunda we Dius sis Israel? Aroro sa takatatuy, wa ban o kalunggung ya siginan am fagtiugan. Matuyan kabul ban o!’ ”

⁷ Nu katanya, at fun nainto sanya fagayu te, “Setain ay nafablang fag taw at kawalungan, at nalong sa ayu takatanya?”

⁸ Ay kanya fagayu nabalus te, “At lanbung mawatan siginans fagbaugun at sigyu, ay e famutus fagwan mawatan yangay siginan fagbaugun at balat.” Fun nalong te, “Ay nalag Elyas, fag taw Tisbe.”

⁹ Sanya ginan, fun nasugu sik fun tagfawayan gadgaloan limak safuluk tagfawayan, laman nanggamat Elyas. Ay kanya fag fagsuguan naundaud sas tungud buksul nu inda Elyas nu malunggung, ay nalong te, “Dius at fagsuguan, em fun glong emu te, loi yap sa anya.”

¹⁰ Ay Elyas nabalus sa kafag fun tagfawayan te, “Nu Dius ktua at fagsuguan, sik afuy nangus umtong siginans banwa laman girug emu gasfuan am fadgaloan fag limak safuluk tagfawayan.” Ay tagsiginans banwa fag afuy antong, ay kanya fag tagfawayan at fun ankirug gasfuan at tagfawayan fag limak safulu.

¹¹ At fun nadog yay nasugu sik fun tagfawayan gadgaloan limak safuluk tagfawayan, laman nanggamat Elyas, ay kanya fag fun tagfawayan nalong sas Elyas te, “Dius at fagsuguan, em fun glong emu te, loi yap sa anya katsi.”

¹² Ay Elyas nabalus te, “Nu Dius ktua at fagsuguan, sik afuy nangus umtong siginans banwa laman girug emu gasfuan am fadgaloan fag limak safuluk tagfawayan.” Ay tagsiginans Dius fag afuy antong siginans banwa, ay kanya fag tagfawayan at fun ankirug gasfuan at tagfawayan fag limak safulu.

¹³ Ay fun Aasya gdog yay fia nasugu at fatuluk fun tagfawayan gadgaloan limak safuluk tagfawayan. Kanya fag fun tagfawayan nu ndasug sas Elyas, natudan laman kamababaun ay gfainfanyuan te, “Dius at fagsuguan, afanyui angku ay ku fadgaloan fag ngay tagfawayan. Lag o gfabul emi am ngay fagsuguan.

¹⁴ Nasaful au te, at kintong fag afuy tagsiginans banwa nairug wan duak fun tagfawayan gasfuan at fadgaloan fag ngay tagfawayan. Nu katanya, afanyui emi.”

¹⁵ Yawi at tagbarita nalong sas Elyas te, “Nangalo wo anya, lag o kalimu.” Nu katanya, Elyas nanangalo kanya fag taw sas fun.

¹⁶ Ay Elyas nu ndasug sas fun, nalong te, “Katatuy Yawi at longan te, ‘Wain am fagnasuguun ngay tagfosuk longan laman nangakbang sas Baal-Sebub, furuan Ekrun at fagsegan? O nunda we Dius sis Israel, laman am fagnangakbangan? Aroro sa am nafakamulun takatanya, wa ban o kalunggung ya siginan am fagtiugan. Kabul ban o!’ ”

¹⁷ Ay Aasya anbul kata Yawi at longan sas Elyas. Aroro Aasya we baguama, at natubus anya laman sik fun at arian way Uram. Uram gfasigad gfunan gina faduak banwa Euram, Eusafat at baguama, nu gfunan sis Uda.

¹⁸ Ay tiba ya at kinfasludan kaduge Aasya gfunan ay fagayu at nafakamulun anriruk sis fafil fagrirukan sabaliwas Israel at ngay fun.